Mataio

17 KUA mole atu ono e aho, ati uta ai e Iesu a Peteru, mo Iakopo, mo Ioane hana matakainaga, kua ta hake e ia a lautolu hoko lautolu ke he mouga tokoluga.

2 Ati faliu ai a ia ki mua ha lautolu, kua kikila mai hana fofoga tuga ne la, kua hinavake mai foki hana tau tapulu tuga ne maama.

3 Kitiala, kua fakakite mai a Mose mo Elia kia lautolu, kua fevagahauaki a lautolu mo ia.

4 Ati tala age ai a Peteru, kua pehe age kia Iesu, Ko e Iki na e, mitaki he nonofo a tautolu i hinai; ka loto a koe ki ai, ti ta e mautolu i hinai tolu e fale api; māu taha, ma Mose foki taha, ma Elia foki taha.

5 Ha ne vagahau a ia, kitiala, ko e aolagi kikila kua ufi hifo a lautolu; kitiala, ko e leo mai he aolagi, kua pehe mai, Ko e haku a Tama fakahele hanā, kua fiafia au kia ia; kia fanogonogo a mutolu kia ia.

6 Kua fanogonogo ai e tau tutaki, ati veveli fakafohifo ai a lautolu, kua matakutaku lahi ai ni.

7 Ati haele age ai a Iesu, kua piki age kia lautolu, kua pehe age, Kia mamatike a a mutolu, ua matakutaku foki a mutolu.

8 Ati hahaga hake ai ha lautolu a tau mata, kua nakai kitia e lautolu taha, ko Iesu hokoia ni.

9 Ha ha ne o hifo a lautolu he mouga, ati hataki ai a Iesu kia lautolu, kua pehe age, Aua neke tala age e mutolu kia taha e mena ne kitia, ato tu mai e Tama he tagata ia lautolu kua mamate.

10 Ati hūhu age ai hana tau tutaki kia ia, kua pehe age, Ko e heigoa e mena ne talahau mai ai e tau tohikupu to hau fakamua mai a Elia ke lata ai?

11 Ati tala age ai a Iesu, kua pehe age kia lautolu, To hau fakamua moli a Elia, mo e liu fakafou ai e tau mena oti.

12 Ka e tala atu e au kia mutolu, kua hau tigahau a Elia, ka e nakai iloa e lautolu a ia, ka kua eke e lautolu kia ia e tau mena ne loto a lautolu ki ai; to pihia foki he fakamamahi e lautolu e Tama he tagata.

13 Ati iloa ai he tau tutaki, ko Ioane ko e papatiso ne tala atu ai a ia kia lautolu.

14 Kua hohoko atu a lautolu ke he lanu tagata, ati hau ai e taha tagata kua fakatokotui kia ia, kua pehe mai,

15 Ko e Iki na e, kia fakaalofa mai a koe ke he haku a tama tane, kua vikoia, kua mamahi lahi ni; ko e mena fa to a ia ke he afi, ti pihia mau foki ke he vai.

16 Ne ta mai e au a ia ke he hau a tau tutaki, ka e nakai maeke kia lautolu ke fakamalolo a ia.

17 Ati tala age ai a Iesu, kua pehe age, Ko e hau nakai tua mo e faliuliu, to fakalataha a tautolu mo mutolu ato a fe? to fakauka au kia mutolu ato a fe? ta mai a a ia ki hinai kia au.

18 Kua hataki atu a Iesu kia ia, ti fano ai ki fafo ia ia e temoni; ati malolo ai e tama ke he magaho ia ni.

19 Ti o mai ai e tau tutaki kia Iesu hoko lautolu, kua pehe age, Ko e heigoa e mena nakai maeke ai kia mautolu ke vega a ia ki fafo?

20 Ati tala age ai a Iesu kia lautolu, Ha ko e ha mutolu a nakai tua; ha ko e moli, ke tala atu e au kia mutolu, kaeke ke lata ha mutolu a tua mo e fua sinapi, ka tala age a mutolu ke he mouga nai, Fano a a koe ke he mena ko; ti fano ai; nakai fai mena foki ke nakai maeke ia mutolu.

21 Ha ko e liogi hokoia mo e fakakanopogi ke o kehe ai e tau mena pehena.

22 Ha i ai a lautolu i Kalilaia, ati tala age ai a Iesu kia lautolu, Ko e tuku atu ne fai e Tama he tagata ke he tau lima he tau tagata;

23 To kelipopo e lautolu a ia, ka e matike mai a ia ke he aho tolu. Ati momoko lahi ai ha lautolu a tau loto.

24 Kua hoko atu a lautolu ki Kapanaumi, ati o mai ai kia Peteru a lautolu ne talia e poa, kua pehe mai, Nakai kia age he akoako ha mutolu e poa titarama?

25 Kua tala age a ia, Mena age. Kua hu atu a ia ke he fale, ati vagahau fakamua atu ai a Iesu kia ia kua pehe atu, Simona na e, kua manatu a koe ke ha? kua talia telu mo e poa mai ia hai kia he tau patuiki he lalolagi? ko e fanau ha lautolu kia, po ke tau tagata kehe?

26 Ati tala age ai a Peteru kia ia, Ko e tau tagata kehe. Ati tala age ai a Iesu kia ia, Ko e mena ia ni kua tokanoa ai e fanau.

27 Neke tupetupe foki a lautolu kia tautolu, kia fano a a koe ke he vai, ti liti ai taha matau; ko e ika fakamua ke moua e koe, kia toto a, mo e lei e koe hana gutu; ati moua ai e koe e satatara; kia uta e koe e mena ia mo e age kia lautolu ma taua.