Tau Salamo

34 TO fakaaue au kia Iehova ke he tau aho oti kana; nakai noa e fakaheke he haku gutu kia ia.

2 To fiafia haku agaga kia Iehova; to fanogonogo ki ai a lautolu ne matematekelea, ti fiafia ai a lautolu.

3 Kia nava atu a mutolu kia Iehova fakalataha mo au; kia fakaheke fakalataha a tautolu ke he hana higoa.

4 Ne kumikumi au kia Iehova, ti tali mai ai a ia kia au, mo e laveaki e ia au mai he tau mena oti ne matakutaku ai au.

5 Ne kitekite a lautolu kia ia ti maama ai ha lautolu a tau mata; ti nakai mā foki ha lautolu a tau mata.

6 Ne ui atu e tagata mamahi nai, ti fanogonogo mai ai a Iehova, mo e fakamoui a ia mai he hana tau matematekelea oti kana.

7 Kua fakatu e fale api he agelu a Iehova ke pa takai a lautolu kua matakutaku kia ia, ke laveaki foki e ia a lautolu.

8 Kia kamata e mutolu mo e kitekite, kua mitaki a Iehova; uhoaki e tagata kua tua kia ia.

9 Ko mutolu na, ko e hana tau tagata tapu, kia matakutaku a kia Iehova; ha kua nakai nonofogati ke he taha mena a lautolu kua matakutaku kia ia.

10 Kua hogeia mena e tau punua leona, mo e fia kai; ka e nakai fai mena mitaki ke nonofogati ai a lautolu ne kumi kia Iehova.

11 Ma fanau na e, mo mai ā, kia fanogonogo mai kia au; ti fakaako e au a mutolu ke matakutaku kia Iehova.

12 Ko hai kia e tagata kua manako ke he moui, mo e loto ke loga hana tau aho, kia kitia ai e ia e mena mitaki?

13 Kia leveki hau a alelo neke kelea, mo e hau a tau laugutu foki neke vagahau fakavai.

14 Kia kalo kehe mo e tau mena kelea, ka e eke e tau mena mitaki; kia kumi atu ke he mafola, mo e tutuli ki ai.

15 Ko e tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu.

16 Ka ko e fofoga a Iehova kua hagao ia ke he tau tagata mahani kelea, ke uta kehe ha lautolu a fakamanatuaga mai he lalolagi.

17 Kua kalaga e tau tagata tututonu, ti fanogonogo ai a Iehova; kua laveaki foki e ia a lautolu mai he tau matematekelea oti ha lautolu.

18 Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.

19 Loga e tau mena kelea ke hohoko ke he tagata tututonu; ka e laveaki e Iehova a ia mai he tau mena oti ia.

20 To leoleo e ia hana tau huimotua oti kana, nakai emo ke fati taha.

21 To kelipopo he malaia e tagata mahani kelea; to fakahala foki a lautolu kua fakavihia e tagata tututonu.

22 Kua laveaki e Iehova e tau agaga he hana tau fekafekau; ti nakai fakahala foki taha ia lautolu kua tua kia ia.