1 Timoteo

5 AUA neke akonaki atu ke he patu, ka kia ole atu ki ai, tuga ne matua a ia; ko e tau fuata foki, tuga ne tau matakainaga a lautolu;

2 Ko e patu fifine, tuga ne matua fifine a ia; ko e tamāfine foki, tuga ne mahakitaga a ia, mo e loto mea ni.

3 Kia fakalilifu e tau fifine takape, ko lautolu kua takape moli.

4 Kaeke foki ha ha he taha fifine takape e tau tama hana po ke fanau he tama hana, kia ako e lautolu ke fakamua e mahani mitaki ke he tau faoa ha lautolu, mo e taui atu ke he tau matua ha lautolu; ha ko e mena mitaki ia mo e fakafiafia ke he Atua.

5 Ka ko e fifine kua takape moli, mo e toe tokotaha, kua amaamanaki tuai a ia ke he Atua, to tumau ke he tau ole mo e tau liogi ke he po katoa mo e aho.

6 Ha ko ia kua hula ke he tau mena he tino, pete ni he moui, ka kua mate a ia.

7 Kia tala atu e koe e tau mena ia, neke talahaua kelea a lautolu.

8 Kaeke kua nakai leveki e taha hana faoa, ti au atu kia lautolu kua nonofo mo ia, kua fakatikai e ia e tua, kua mua foki hana kelea kia ia kua faliuliu.

9 Ua tohi ha fifine takape kua nakai la onogofulu hana tau tau, ne tane foki ke he tane tokotaha;

10 Kua talahaua mitaki ha ko e tau gahua mitaki hana, kaeke kua leveki e ia e tau fanau, kaeke kua fakaalofa a ia ke he tau tagata kehe, kaeke kua holoholo e ia e tau hui he tau tagata tapu, kaeke kua fakaalofa a ia ke he tau tagata matematekelea, kaeke kua feiga mau ke he tau gahua mitaki oti.

11 Ka ko e tau tamāfine kua takape, aua neke talia a lautolu; ha ko e mena ka fia toka noa a lautolu mai ia Keriso, ti fia fai tane ai a lautolu;

12 Ha ia lautolu e fakahala, ha kua tiaki e lautolu ha lautolu a talahau tonu fakamua.

13 Ti nakai kuenaia, ka e mahani foki a lautolu ke he teva, kua neva fano ke he taha fale mo e taha fale; ti nakai kuenaia foki he teva a lautolu, ka e fa fakatutala a lautolu, to hanihani, to vagavagahau ke he tau mena nakai lata.

14 Hanai, kua loto au ke fai tane e tau tamafine, kia fanau tama, kia eke mo patu fifine he kaina, neke tuku atu kia ia kua totoko mai ha mena taha ke talahaua kelea ai a lautolu.

15 Ha kua mafoki kehe tuai ainei e falu ke mumui atu kia Satani.

16 Kaeke ko e taha tane kua tua, po ke fifine kua tua, kua nofo i ai e tau fifine takape, kia leveki e lautolu a lautolu, aua neke fakamamafa ke he ekalesia; kia leveki ne ia e tau fifine kua takape moli.

17 Ko e tau patu kua pule fakamitaki, kia talahaua a lautolu kua lata mo e lilifu kua lafi ua, ka e au atu kia lautolu kua gahua ke he kupu katoa mo e fakaako atu.

18 Nukua pehe mai e Tohi, Ua lili e koe e gutu he povi ka kua taholi e ia e tau saito; mo e pehe foki, Kua lata e ekegahua mo e hana taui.

19 Aua neke talia e hokotaki ke he patu, aua e tokoua po ke tokotolu e tagata ke fakamoli ai.

20 Ka ko lautolu kua hala, kia akonaki ki ai ki mua he tau tagata oti kana, kia matakutaku ai a lautolu kua toe.

21 Kua tala atu fakalahi au kia koe ki mua he Atua, ko e Iki ko Iesu Keriso, mo e tau agelu ne fifili, kia taofi e koe ke he tau mena ia, mo e nakai fakahala fakamua, aua foki neke eke ha mena mo e fakamailoga tagata.

22 Aua neke alumaki ke fakalago atu e tau lima ke he taha; ti ua kau fakalataha mo e tau hala he falu a tagata. Kia leveki e koe a koe ni kia hako ai hau a mahani.

23 Aua neke inu foki e koe e vai noa, ka e inu fakatote ke he uaina ha ko e manava hau, mo e hau a tau gagao kua tupu mau.

24 Kua iloa maliali e tau hala he fala tagata, kua mumua atu ke he fakafiliaga, ka ko e tau hala he falu kua mumui atu.

25 Kua pihia foki e tau gahua mitaki he falu, kua iloa maliali ni; ko e tau mena foki nakai pihia, kua nakai maeke ke fakagalo ni.