1 Tau Patuiki

9 KUA oti he eke e Solomona e fale a Iehova, mo e fale he patuiki, mo e finagalo oti a Solomona ne finagalo ai e ia ke eke;

2 Ti fakakite mai ai a Iehova kia Solomona, ko e lagaua ia, tuga ne fakakite mai a ia kia ia i Kipeona.

3 Kua pehe mai a Iehova kia ia, Kua fanogonogo au ke he hau a liogi mo e hau a ole, ne ole mai ai e koe ki mua haku; kua fakatapu e au e fale nai kua ta e koe ke tuku ai haku higoa tukulagi; to hagao atu ki ai haku tau mata mo e haku loto ke he tau aho oti.

4 Kaeke foki ke faifano a koe ki mua haku, tuga ne faifano ai hau a matua ko Tavita, mo e loto katoa, mo e mahani hakohako, kia eke e koe ke lata mo e tau mena oti ne poaki atu ai e au kia koe, mo e omaoma a koe ke he haku tau fakatufono mo e haku tau fakafiliaga.

5 Ti fakamau e au e nofoaiki he hau a kautu kia Isaraela tukulagi, tuga ne vagahau atu ai e au ke he matua hau ko Tavita, kua pehe atu, Nakai vevehe kehe hau a fanau mo e nofoaiki a Isaraela.

6 Ka ko e mena kaeke ke liliu kehe a mutolu mo e nakai mumui mai kia au, ko mutolu po ke he mutolu a fanau, ti nakai omaoma a mutolu ke he haku a tau poaki mo e haku a tau fakatufono kua tuku atu e au ki mua ha mutolu; ka e o atu a mutolu mo e fekafekau atu ke he tau atua kehe, mo e hufeilo ai kia lautolu;

7 Ti fakaoti e au a Isaraela mai he kelekele kua foaki atu ai e au kia lautolu; ko e fale nai foki kua fakatapu e au ma e haku higoa ti liti atu e au mai mua haku; to eke foki a Isaraela mo kupu fakatai mo e mena ke va ki ai ke he tau motu oti kana he lalolagi.

8 Ko e fale nai foki kua tokoluga, to ofo ki ai a lautolu oti ne o age, mo e fakakatakatakē ai, mo e pehe age, Ko e ha ne eke pihia e Iehova ke he motu nai mo e fale nai?

9 Ti tali age ai a lautolu, Ha kua tiaki e lautolu a Iehova ha lautolu a Atua ne ta mai ai e tau matua ha lautolu he motu ko Aikupito, ka e taofi e lautolu e tau atua kehe, mo e hufeilo a lautolu kia lautolu, mo e fekafekau atu kia lautolu; ko e mena ia kua fakahoko ai e Iehova e malaia oti nai kia lautolu.

10 Kua mole atu e tau tau ne uafulu ne ta ai e Solomona e tau fale ua, ko e fale a Iehova, mo e fale he patuiki,

11 (Ne ta mai ai e Hairamo ko e patuiki a Turo kia Solomona, e tau akau arasi, mo e tau akau perosi, mo e tau auro, ke lata mo e tau mena oti ne loto a ia ki ai, ti ta atu ai he patuiki ko Solomona kia Hairamo e tau maga ne uafulu ke he motu ko Kalilaia.

12 Ti hau ai a Hairamo i Turo ke kitekite ke he tau maga ne ta age a Solomona kia ia; ka e nakai lata e tau maga ia ke he manatu hana.

13 Ti pehe age a ia, Haku a matakainaga na e, ko heigoa kia e tau maga nai kua ta mai e koe kia au? Ti fakahigoa ai e ia ko e motu ko Kapula ke hoko mai ke he vaha nai.

14 Ti fakafano age e Hairamo ke he patuiki taha teau ti uafulu e taleni auro.

15 Ko e mena foki hanai ne kotofa ai he patuiki ko Solomona e tau tagata; ke eke e fale a Iehova, mo e hana fale, mo Milo, mo e kaupa a Ierusalema, mo Hasora, mo Mekito, mo Kesera.

16 Ko e mena hake a Farao ko e patuiki a Aikupito ti fofo e ia a Kesera, mo e huhunu ai e ia ke he afi, mo e fakaotioti ai e ia e tau tagata Kanana ne nonofo ke he maga, ti ta age ai e ia ke eke mo tufaaga ma e tamafifine hana ko e hoana a Solomona.

17 Ti ati ai e Solomona a Kesera, mo Peteorana i lalo,

18 Mo Paalata, mo Tatimora ke he tutakale he motu,

19 Mo e tau maga oti ha ha ia Solomona ke tuku ai e koloa, mo e tau maga mo e tau kariota, mo e tau maga ma e hana tau tagata heke solofanua, mo e tau mena oti ne finagalo ai a Solomona ke eke i Ierusalema, mo Lepanona, mo e motu oti ne pule ai a ia.

20 Ko e tau tagata oti ne toe he tau tagata Amori, mo e tau tagata Heti, mo e tau tagata Perisi, Ko e tau tagata Hivi, mo e tau tagata Iepusi, ko lautolu nakai ko e fanau a Isaraela;

21 Ko e fanau ha lautolu ne toe ke he motu ka kua mole atu a lautolu, ko lautolu kua nakai maeke ke he fanau a Isaraela ke fakaotioti ai, ti eke e Solomona a lautolu mo tau tupa, ke hoko mai ke he aho nai.

22 Ka e nakai eke e Solomona e fanau a Isaraela mo tau tupa; ka ko e tau tagata tau a lautolu, mo e hana tau fekafekau, mo e hana tau iki, mo e hana tau takitaki kau, mo e tau iki ne pule ke he hana tau kariota, mo e hana kau heke solofanua.

23 Ko e tau iki ne kotofa ke pule ke he gahua a Solomona hanai, ne lima e teau mo e toko limagofulu a lautolu ne pule ke he tau tagata ne eke e tau gahua.

24 Ka e hake ai e tamafifine a Farao mai he maga a Tavita ke he hana fale ne ta ai e Solomona mana; ti ati ai e ia a Milo.

25 Ne takilagatolu foki ke he tau tau ne eke ai e Solomona e tau poa huhunu, mo e tau poa fakaaue ki luga he fatapoa ne ati ai e ia ma Iehova; ti huhunu ai e ia e mena manogi ki luga he fatapoa ha ha i mua a Iehova. Ti mau ai e fale he eke e ia.

26 Ti ta ai he patuiki ko Solomona e tau foulua i Esiokape, ne fetataaki mo Elata ke he mataafaga he Tahi Kula ke he motu ko Etoma.

27 Ti fakafano atu e Hairamo hana tau fekafekau ke he tau foulua, ko e tau tagata kauvaka ne mahani mo e tahi, ke fakalataha mo e tau fekafekau a Solomona.

28 Ti o atu a lautolu ki Ofaira, mo e ta mai ai e lautolu e auro ko e fa e teau ti uafulu e taleni auro, ti ta mai ai e lautolu ke he patuiki ko Solomona.