Esekielu

22 KUA hoko mai foki kia au e kupu a Iehova, kua pehe mai,

2 Ko koe foki, ko e tama he tagata na e, to fakafili kia e koe? to fakafili kia e koe e maga he tau tagata lima toto? kia fakakite atu kia ia hana tau mena vihiatia.

3 Mo e pehe atu a koe, Kua pehe mai e vagahau he Iki ko Iehova, Ko e maga kua fakamaligi e toto ki loto ia ia, kia hoko mai ai hana vaha, mo e eke foki e tau tupua māna ke kelea ai a ia.

4 Kua nofo mo e hala a koe ha ko e toto ne fakamaligi e koe, ti kelea ai a koe ha ko e tau tupua ne eke e koe; kua fakatata mai e koe hau a tau aho, kua hoko a koe ke he tau tau hau; ko e mena ia kua tuku atu e au a koe ke eke mo mena ke eke fakakelea ki ai ke he tau motu kehe, mo mena foki ke va ki ai ke he tau motu oti.

5 Ko lautolu ne tata mai kia koe, katoa mo lautolu ne mamao to va a lautolu kia koe kua talahaua kelea, mo e lahi hau a fakaatukehe.

6 Kitiala, ko e tau iki a Isaraela ha ha ia koe ne takitaha a lautolu mo e fakamalolo ke fakamaligi e toto.

7 Ha ha ia koe a lautolu kua nakai fakalilifu ke he matua tane mo e matua fifine; ha ha ia koe a lautolu ne favale atu ke he tagata kehe; ti ha ha ia koe a lautolu ne ekefakakelea ke he tau fifine takape, mo e tau tama ne mamate ha lautolu a tau matua.

8 Kua fakavihia e koe haku a tau mena tapu, mo e holi e koe haku a tau sapati.

9 Ne ha ha ia koe e tau tagata feutaaki tala ke fakamaligi ai e toto; ne ha ia koe foki a lautolu ne kai i luga he tau mouga; ti ha ia koe a lautolu ne eke e tau mena kelea.

10 Ne ha ha ia koe foki a lautolu ne fakanofonoa ha lautolu a tau matua tane; ha ha ia koe a lautolu ne fakakelea e tau fifine kua nonofo kehe ha ko e ha lautolu a kelea.

11 Ne eke ai foki he taha e tau mena vihiatia mo e hoana he taha tagata; mo e fakakelea he taha ke he mahani matahavala mo e hana figona fifine; ne ha ia koe foki taha ne fakakelea hana mahakitaga ko e tama fifine he hana matua tane.

12 Ne ha ha i ai kia koe a lautolu ne talia e tau mena fakaalofa ke fakamaligi e toto; ne talia foki e koe e taui fakaloga mai he tau tupe ne age, mo e tau mena ne fakalahi aki; ne moua ai foki e koe he favale e tau mena he taha tagata, ka e nimo ia koe au, kua pihia mai e Iki ko Iehova.

13 Kitiala, kua ta e au ke he haku a lima e tau mena ne moua ai e koe ke he mahani hepehepe, katoa mo e toto ha i loto ia koe.

14 To fatia kia e loto hau? to malolo kia hau a lima ke he aho ke fakahala ai e au a koe? Ko au ko Iehova kua vagahau atu e au, to eke ai ni e au.

15 To fakamavehevehe e au a koe ke he tau motu kehe, mo e fakapaea atu e au a koe ke he tau motu kehekehe, mo e fakaoti ai e au hau a kelea mai loto ia koe.

16 To fakakelea ai e koe a koe ki mua he tau motu kehe, ti iloa ai e koe ko au ni ko Iehova.

17 Ne hoko mai foki kia au e kupu a Iehova kua pehe mai,

18 Ko e tama he tagata na e, kua eke tuai e magafaoa a Isaraela mo otaota he tau lapatoa kia au; ko e tau apa kula a lautolu oti, mo e tau apa hina, mo e tau lapatoa, mo e tau pili ki loto he gutuumu; ko e otaota he tau ario ni a lautolu.

19 Ko e mena ia kua pehe mai e vagahau he Iki ko Iehova, kua eke a mutolu oti mo otaota he tau lapatoa, ko e mena ia, kitiala, to fakapotopoto e au a mutolu ki loto a Ierusalema.

20 Tuga he fakapotopoto ai e lautolu e tau ario, mo e tau apa kula, mo e tau lapatoa, mo e tau pili, mo e tau apa hina ki loto he gutuumu, ke uulo ai e afi kia liliu ai mo pukevai; to fakapotopoto pihia e au a mutolu ke he haku a ita mo e haku a ita lahi, mo e tuku ai e au a mutolu ke liliu ai a mutolu mo pukevai.

21 To fakapotopoto ai e au a mutolu, mo e uulo ai e au e afi he haku a ita kia mutolu, ti liliu mo pukevai a mutolu ki loto ia ia.

22 Tuga he faliu mo pukevai e ario ki loto he gutuumu, to liu mo puke vai pihia a mutolu foki i loto ia ia; ti iloa ai e mutolu ko au ko Iehova kua liligi atu e au haku a ita lahi ki loto ia mutolu.

23 Ne hoko mai foki kia au e kupu a Iehova, kua pehe mai,

24 Ko e tama he tagata na e, kia pehe age a koe kia ia, Ko koe na ko e kelekele nakai fakamea ai, mo e nakai to ki ai ha uha ke he aho he ita a Iehova.

25 Ha ha i ai i loto ia ia e fakafualoto he hana tau perofeta; tuga e leona tagi he hēhē mena ai e ia; kua fakaoti ai e lautolu e tau tagata; kua uta e lautolu e tau koloa mo e tau mena uho; kua fakatokologa ai e lautolu hana tau takape i loto ia ia.

26 Kua holi he tau ekepoa hana haku a fakatufono, kua fakakelea foki e lautolu haku a tau mena tapu, nakai mailoga ai e lautolu e tau mena tapu mo e tau mena nakai tapu, ti nakai fakailoa ai e lautolu kua kehe e tau mena mea, ti kehe e tau mena nakai mea, kua hahaga kehe a lautolu mo e haku a tau sapati, mo e eke fakakelea ai au ia lautolu.

27 Ko e hana tau iki i loto ia ia, kua tuga ne tau luko hēhē manu a lautolu; kua fakamaligi toto a lautolu mo e fakaoti tagata ke moua ai e tau mena ke fofo.

28 Kua vali foki he tau perofeta hana ma lautolu ke he puga, kua kitekite a lautolu ke he tau mena nakai aoga, mo e perofeta fakavai ai e tau pikopiko kia lautolu, kua pehe age, Kua pehe mai e kupu he Iki ko Iehova, ka e nakai ni vagahau mai ai e Iehova.

29 Kua favale ni e tau tagata he motu, mo e fofo mena a lautolu; kua ekefakakelea e lautolu ke he tau tagata matematekelea mo lautolu ne nonofogati; kua favale foki a lautolu ke he tau tagata kehe ka e nakai fakafili ai.

30 Ti kumi e au ia lautolu e tagata ke ati hake e kaupa, mo e tu ai ki mua haku ke he mena ne malŏlŏ ha ko e motu, neke fakaoti ai e au, ka e nakai ni moua e au.

31 Ko e mena ia kua liligi atu e au haku a ita ki luga ha lautolu, mo e fakaotioti e au a lautolu ke he afi he haku a ita; kua taui atu e au ha lautolu a tau mahani ki luga he tau ulu ha lautolu, kua pihia mai e Iki ko Iehova.