Numera

15 KUA vagahau mai foki a Iehova kia Mose, kua pehe mai,

2 Kia vagahau atu a koe ke he fanau a Isaraela, ti pehe atu a koe kia lautolu, Ka hohoko atu a mutolu ke he motu ke nonofo ai a mutolu kua foaki atu e au kia mutolu.

3 Ka eke e mutolu e poa kua eke ke he afi kia Iehova, ko e poa huhunu, po ke poa ke fakamoli aki e mena kua omonuo ai, po ke poa kua makai ki ai e loto ke eke, po ke poa ke he ha mutolu a tau galue, ke eke mo mena manogi mitaki kia Iehova, mai he fuifui povi, po ke fuifui mamoe;

4 Ti ta mai ai e ia kua eke hana poa kia Iehova ko e poa mena kai ko e omera taha he falaoa mitaki kua laku mo e veveheaga ne fa aki he hinu he puke lolo.

5 Ko e veveheaga foki ne fa aki he hinu he uaina ke eke mo poa inu, to eke ia fakalataha mo e poa huhunu po ke taha poa ke lata ai mo e taha punua mamoe.

6 Ka ko e poa mena kai mo e mamoe tane, to eke ia ke he ua e omera he falaoa mitaki kua laku mo e veveheaga ne tolu aki he hinu he puke lolo.

7 Ko e uaina foki ke eke mo poa inu, ko e veveheaga ne tolu aki he hinu ke ta mai ai, ke eke mo mena manogi mitaki kia Iehova.

8 Kaeke ko e povi tane ke eke mo poa huhunu, po ke poa ke fakamoli aki e mena ne omonuo ai, po ke poa fakaaue kia Iehova,

9 Ti ta mai ai e ia fakalataha mo e povi tane ko e poa mena kai, tolu e omera he falaoa mitaki kua laku mo e maga ne veveheua aki he hinu he puke lolo.

10 Ti ta mai ai e koe e maga ne veveheua aki he hinu uaina ke eke mo poa inu; ko e poa haia kua eke ke he afi, ko e mena manogi mitaki kia Iehova,

11 Kia eke pihia ke he povi taha, po ke mamoe tane taha, po ke punua mamoe taha, po ke punua koti taha.

12 Fakalata ke he tau poa kua eke po ke fiha ka totou, ti eke pihia kia lautolu oti takitaha ke lata mo e tau poa ka totou.

13 To eke pihia e tau mena ia he tau tagata oti ne fanau ke he motu, ka ta mai ai e lautolu e poa kua eke ke he afi, ko e mena manogi mitaki kia Iehova.

14 Kaeke foki ke nofo ia mutolu ha tagata kehe, po ke taha ha ha ia mutolu ke he ha mutolu a tau hau, ti fia eke ai e ia e poa kua eke ke he afi, ko e mena manogi mitaki kia Iehova; tuga ne eke e mutolu, to eke pihia ni e ia.

15 Ko e taha ni e fakatufono kia mutolu he fakapotopotoaga katoa mo e tagata kehe kua nofo ai mutolu, ko e fakatufono tukulagi ke he tau hau ha mutolu a mui kia eke pihia e mutolu ke he tagata kehe ki mua a Iehova.

16 Ko e taha ni e fakatufono, ti taha ni e poaki kia mutolu katoa mo e tagata kehe kua nofo ia mutolu.

17 Kua vagahau mai foki a Iehova kia Mose, kua pehe mai,

18 Kia vagahau atu a koe ke he fanau a Isaraela, ti pehe atu a koe kia lautolu. Ka hohoko atu a mutolu ke he motu ke fakahoko atu e au a mutolu ki ai.

19 Ka kai e mutolu e tau mena kai he motu ti ta mai ai e mutolu e poa nikiti kia Iehova.

20 Kia ta mai e mutolu taha falaoa pukupuku he lakuaga falaoa fakamua ha mutolu ke eke mo poa nikiti, tuga ne poa nikiti he holiaga saito, kia eke ai pihia e mutolu.

21 Kia to mai ai e mutolu e poa nikiti kia Iehova he lakuaga falaoa fakamua ha mutolu ke he tau hau ha mutolu a mui.

22 Kaeke foki ke hehe a mutolu, mo e nakai eke e tau poaki oti nai ne vagahau mai ai e Iehova kia Mose,

23 Ko e tau mena oti kua poaki mai ai e Iehova kia mutolu ia Mose, ke kamata mai he aho ne poaki mai ai e Iehova ke hoko atu ni ke he tau hau ha mutolu a mui.

24 Kaeke foki kua eke ai e mena mo e hehe mo e nakai kitia he fakapotopotoaga, ti taute ai he fakapotopotoaga katoa taha punua povi tane ke eke mo poa huhunu, ko e mena manogi mitaki kia Iehova, katoa mo e hana poa mena kai mo e hana poa inu ke lata mo e poakiaga, ti taha foki e koti tane ke eke mo poa ha ko e hala.

25 Ti eke ai he ekepoa e lukutoto ha ko e fakapotopotoaga oti ni he fanau a Isaraela ti fakamagalo ia kia lautolu; ha ko e hehe ia ti ta mai ai foki e lautolu ha lautolu a poa, ko e poa kua eke ke he afi kia Iehova, ko e ha lautolu a poa foki ha ko e hala ki mua a Iehova ha ko e ha lautolu a hehe.

26 Ti fakamagalo ai ke he fakapotopotoaga oti he fanau a Isaraela, katoa mo e tagata kehe kua nofo ia mutolu; ha ko e mena hehe he motu oti ni.

27 Kaeke foki ke hala he tagata tokotaha ha ko e hehe, ti ta mai ai e ia e koti fifine tau taha, ke eke mo poa ha ko e hala.

28 Ti eke ai he ekepoa e lukutoto ha ko e tagata ne hehe ke he hala, ka kua hehe a ia ki mua a Iehova ka eke ai e lukutoto ha ko ia, ti fakamagalo ai a ia.

29 Ko e taha ni e fakatufono kia mutolu ha ko e hehe, ko e tagata he fanau a Isaraela kua fanau ke he motu katoa foki mo e tagata kehe kua nonofo ia mutolu.

30 Ka ko e tagata kua eke ha mena mo e fakatokoluga, po ke tagata ne fanau ai ke he motu a ia po ke tagata kehe, kua eke fakakelea ai e ia kia Iehova, to vevehe kehe ni e tagata ia mo e hana motu.

31 Ha kua vihiatia e ia e kupu a Iehova, kua holi foki e hana poaki; ti vevehe kehe ni e tagata ia, ti ha ia ia ni hana hala.

32 Ha ha he tutakale e fanau a Isaraela ti moua e lautolu ha tagata ne fai gaafi ke he aho sapati.

33 Ko lautolu foki ne moua a ia ne fai gaafi ne uta e lautolu a ia kia Mose, mo Arona, mo e fakapotopotoaga oti ni.

34 Ti tuku ai e lautolu a ia ke he fale puipui ha kua nakai la fakakite ai e mena ke eke kia ia.

35 Ti pehe mai ai a Iehova kia Mose, to kelipopo ni e tagata, kia pinimaka he fakapotopotoaga oti a ia ke he tau maka ki tua he heagaapi.

36 Ti takitaki he fakapotopotoaga oti a ia ki tua he heaga api, mo e pinimaka e lautolu a ia ke he tau maka ti mate ai a ia tuga ne poaki mai ai e Iehova kia Mose.

37 Kua talahau mai foki e Iehova kia Mose, kua pehe mai,

38 Kia vagahau atu a koe ke he fanau a Isaraela, ti pehe atu a koe kia lautolu kia eke e lautolu ma lautolu e tau mena fakahafehafe ke he tau matapotu he ha lautolu a tau tapulu ke he ha lautolu a tau hau a mui ti tuku foki e lautolu e afo uli ki luga he tau mena fakahafehafe ke he kala tapulu.

39 Ti eke ia mo mena fakahafehafe kia mutolu, kia kitekite a mutolu ki ai, mo e manamanatu ai a mutolu ke he tau poaki oti a Iehova mo e eke ai ni e mutolu; ti aua neke omaoma a mutolu ke he ha mutolu a tau loto mo e ha mutolu a tau mata ha ko e tau mena ia kua fa feuaki ai a mutolu.

40 Ko e mena ia kia manamanatu a mutolu, mo e eke ai e mutolu haku a tau poaki oti ni, kia tapu foki a mutolu ma e ha mutolu Atua.

41 Ko au ni ko Iehova ko e ha mutolu a Atua, ne ta mai e au a mutolu he motu ko Aikupito, ke eke au mo Atua ha mutolu; ko au ni ko Iehova ko e ha mutolu a Atua.