Tau Fakafili

5 TI lologo ai a Tapora mo Parako ko e tama a Apinoamo ke he aho ia, kua pehe atu.

2 Ha kua takitaki ai he tau takitaki kau a Isaraela mo e makai ki ai e motu, kia fakamonu atu a mutolu kia Iehova.

3 Kia fanogonogo mai a mutolu ko e tau patuiki na e; ko e tau tui na e, kia fakateliga mai a mutolu; ko au, to lologo ni au kia Iehova, to uhu e au e lologo kia Iehova ko e Atua a Isaraela.

4 Iehova na e, ne haele atu a koe i Seira, ne haele atu ai he kelekele ko Etoma, ti vivivivi ai e lalolagi, ne hihina hifo foki e lagi, ti hihina hifo foki e vai he tau aolagi.

5 Ne tafe hifo ai e tau mouga ki mua a Iehova, ko Sinai ni ki mua a Iehova ko e Atua a Isaraela.

6 Ko e vaha ia Samekara ko e tama a Anato; ko e vaha ia Iaeli ne toka e tau puhala tu, ka e o ai e tau fenoga he tau hala loto.

7 Kua nakai fai takitaki a Isaraela; nakai fakai ni; ato tu atu au ko Taporā; ato tu atu ai au; ko e matua fifine ke he motu a Isaraela.

8 Ne fifili e lautolu e tau atua fou; ti hoko ai e tau ke he tau gutuhala; ti kitia kia e akau punuti po ke tao ke he tau tagata fagofulu e afe ke he motu a Isaraela?

9 Kua hagao atu haku loto ke he tau patu ne pule kia Isaraela, ne tuku atu e lautolu a lautolu mo e fakamakai ke he motu; kia fakamonu atu a mutolu kia Iehova.

10 Ko mutolu kua heke e tau asini hina ko mutolu ne nonofo i luga he tau tegitegi mitaki, ko mutolu foki ne o ke he puhala; kia vagahau ai a mutolu.

11 Ha ko e leo ha lautolu kua tufatufa ai e mena ne fofo he tau ke he mena ne utu ai e vai, to talahau ai e lautolu ke he mena ia e tututonu a Iehova; ko e tututonu he hana takitaki kia Isaraela; ti o hifo ai e motu a Iehova ke he tau gutuhala.

12 Kia ala ā koe, ala a ma Taporā na e; kia ala a, kia ala a; kia lologo fakaheke a. Kia tu mai a, Parako na e, ko e tama a Apinoamo, kia takitaki e koe e tau tagata ne fofo ke he fakapaeaaga.

13 Ti o hifo a lautolu ne toe ke he tau iki he motu; Iehova na e, kia haele hifo a koe mo au ke tau ke he tau toa.

14 Mai Efaraimo a lautolu ne tupu ai ke he mena ne nofo tuai ai a Amaleka; ti mumui atu kia koe a Peniamina fakalataha mo e hau a motu; ne o hifo ai i Makiro e tau patu kua pule; mai Sepulona foki a lautolu ne toto e tokotoko he takitaki kau.

15 Ne fakalataha e tau iki i Isakara mo Taporā; ko Isakara ni katoa mo Parako, ne fakafano atu a lautolu ke he pahua ke mumui atu kia ia; ha i ai ke he tau kauvai he tau vailele a Reupena e tau fifiliaga lalahi he tau loto.

16 Ko e ha ne nofo ai a koe ke he tau lotopa mamoe ke fanogonogo ai ke he leo he tau kofe he tau leveki mamoe? ha i ai ke he tau kauvai he tau vailele a Reupena e tau fifiliaga lalahi he tau loto.

17 Ti nofo a Kiliata ke he fahi atu a Ioritana. Ko e ha foki ne nofo ai a Tano ke he tau foulua? ka e nofo a Asera ke he mataafaga, kua nofo ni a ia ke he hana tau ava.

18 Ko Sepulona ko e motu haia ne tuku lele atu hana moui ke he mate; ti pihia foki a Nafatali ke he tau mena tokoluga he motu.

19 Ne o mai e tau patuiki, ti tau a lautolu; ti tau ai e tau patuiki a Kanana ke he tau a Tanaka, ne tata age ke he vai i Mekito; nakai ni moua e lautolu ha koloa ario.

20 Ne tau mai he lagi a lautolu; ne tau ai mo Sisera e tau fetu ke he tau puhala ha lautolu.

21 Ne tafea ai a lautolu ke he vailele ko Kisona; ko e vailele tuai haia, ko e vailele ko Kisona. Haku agaga na e, kua taholi e koe a ia ne malolo.

22 Ti malipilipi ai e tau mahina hui he tau solofanua, ha ko e tafepoi, ko e tafepoi ni he hana kau malolo.

23 Kua pehe mai e Agelu a Iehova, Kia kaialu a mutolu kia Merosa, kia kaialu fakalahi a mutolu kia lautolu kua nonofo ai; he nakai o mai a lautolu ke lagomatai kia Iehova; ke lagomatai kia Iehova, ke tau kia lautolu ne malolo.

24 Kia mua e monuina a Iaeli ko e hoana a Kaveru ko e tagata Keni he tau fifine oti; kia mua e monuina hana he tau fifine oti ha ha he fale ie.

25 Ne ole e ia e maga vai, ti age ai e ia e puke huhu; ne ta age e ia kia ia e puke huhu tuli ke he kapiniu uho.

26 Ne toto atu e ia hana lima ke he fao, mo e hana lima matau ke he hamala he tufuga; ti ta ai e ia a Sisera, ti hio ai e ia hana ulu, ka kua pao ai e ia e fao ke he hana ofoofo ti ati ai.

27 Ne tukutuku hifo a ia, ti veli a ia, ti takoto ai a ia ke he hana tau hui; ne tukutukuhifo a ia, ti veli ai a ia ke he hana tau hui; ko e mena ne tukutukuhifo ai a ia, ne veli ai ti mate ai a ia.

28 Ne kitekite atu ke he fakamaama e matua fifine a Sisera, ti ui atu ai a ia he tau mena fakapupu he fakamaama, Ko e ha ne mule mai ai hana kariota? Ko e ha ne fakatuai ai hana kariota nakai hoko mai?

29 Ti tali mai ai kia ia e tau iki fifine pulotu ha ha ia ia, ko ia foki ni kua pehe mai a ia kia ia.

30 Nakai kia moua e lautolu? nakai kia tufatufa ai e lautolu e tau mena kua fofo he tau? ke takitokotaha mo e tamafine ke taki taha po ke takiua; ko e tau mena ne fofo he tau ko e tau tapulu kula kehekehe ma Sisera, ko e tau mena ne fofo he tau ne kula kehekehe kua taute fakafulufuluola; ko e tau tapulu kula kehekehe kua taute fakafulufuluola fakafahiua,kua lata mo e tau ua ha lautolu ha ha i ai e tau mena ne fofo he tau.

31 Iehova na e, kia mahaikava ai pihia a lautolu oti kua fai fi kia koe; ka ko lautolu kua fakaalofa atu kia ia, kia tuga ne la a lautolu ka fina atu a ia mo e malolo. Ti okioki ai e motu ke he tau tau ne fagofulu.