Ioane

11 KUA gagao e taha tagata, ko Lasalo, i Petania, ko e maga ia a Maria mo e hana matakainaga ko Mareta.

2 Ko Maria foki haia ne fakatakai e ia e Iki ke he magalolo manogi, mo e holoholo hana tau ve ke he lauulu hana, kua gagao hana tugane ko Lasalo.

3 Ti kua ahi atu a ia he hana tau mahakitaga, kua pehe age, Ko e Iki na e, kitiala, kua gagao, tuai a ia ne ofania e koe.

4 Kua fanogonogo ai a Iesu, ti pehe ai a ia, Ko e gagao nai nakai fakahiku ke he mate, ka ko e fakahekeaga he Atua, kia fakaheke ai ke he Tama he Atua.

5 Ne fakaalofa ni a Iesu, kia Mareta, mo e hana matakainaga, katoa mo Lasalo.

6 Kua fanogonogo a ia kua gagao a ia, ati nofo mau ai a ia ke he ua e aho ke he mena ne nofo ai.

7 Kua mole atu e mena ia, ati pehe age ai a ia ke he tau tutaki, Kia liliu a a tautolu ki Iutaia.

8 Kua pehe age e tau tutaki kia ia, Rapai na e, ko e aho tuai nai ne kolo e tau tagata Iutaia ke tauliti a koe, to liu haele atu kia a koe ki ai?

9 Ti tala age ai a Iesu, Nakai kia ko e mena hogofulu ma ua e magaaho ke he aho taha. Kaeke ke fano taha ke he aho, ti nakai tupetupe a ia, ha kua kitia e ia e maama he lalolagi nai.

10 Kaeke ke fano taha ke he po, ti tupetupe ai a ia, ha kua nakai fai maama ia ia.

11 Kua mole atu e tau kupu ia, ati pehe age ai a ia kia lautolu, Kua mohe tuai ha tautolu a kapitiga ko Lasalo; ka e fano au ke fafagu a ia.

12 Ti pehe age ai hana tau tutaki, Ko e Iki na e, kaeke kua mohe a ia, to moui ni.

13 Ne vagahau a Iesu ke he mate hana, ka e piko na lautolu ko e mena vagahau a ia ke he takoto mo e mohe.

14 Ati talahau fakatonu atu ai e Iesu kia lautolu, Kua mate tuai a Lasalo.

15 Kua fiafia foki au ha ko mutolu, he nakai ha i ai au, kia talia e mutolu; ka e o a a tautolu kia ia.

16 Ti tala age ai a Toma, (ko ia ne higoa ko Titumo), ke he hana tau matakainaga tutaki, Ati o foki a a tautolu, kia mamate ai a tautolu fakalataha mo ia.

17 Kua hoko atu a Iesu, ati fioia ai e ia kua aho fa he tuku ai a ia ke he tukuaga.

18 Kua fetataaki a Petania mo Ierusalema, tokai ko e hogofulu ma lima e tau satatio he vaha loto.

19 Ne tokologa foki e tau tagata Iutaia ne o atu kia Mareta mo Maria, kia fakamafana kia laua ha ko e ha laua a tugane.

20 Ne fanogonogo a Mareta kua hoko mai a Iesu, ti fano ai a ia ke fonofono a ia; ka kua nofo a Maria ke he fale.

21 Ati pehe age ai a Mareta kia Iesu, Ko e Iki na e, ane nofo a koe i hinai, po kua nakai mate haku tugane.

22 Ka e pete ni e mena ia, kua iloa e au ko e tau mena oti ke ole e koe ke he Atua to foaki mai he Atua kia koe.

23 Kua tala age a Iesu kia ia, To tu mai ni hau a tugane.

24 Kua pehe age a Mareta kia ia, Kua iloa e au, to tu mai ni a ia ke he tutuaga he aho fakamuiaki.

25 Kua tala age a Iesu kia ia, Ko au nai ko e liu tu mai, mo e moui; ko ia ke tua mai kia au, pete ni he mate a ia, ka to moui ni a ia.

26 Ko e tau tagata momoui oti, ke tua mai kia au, nakai mamate tukulagi ni; kua talia nakai e koe e mena ia?

27 Kua pehe mai a ia kia ia, E, ko e Iki na e, kua talia ni e au, ko koe ko e Keriso ko e Tama he Atua ke haele mai ke he lalolagi.

28 Kua mole atu e tau kupu ia, ati fina age ai a ia, kua ui fakatekiteki ke he hana matakainaga, ko Maria, kua pehe age, Kua hau tuai e akoako, kua ui mai kia koe.

29 Kua logona e ia, ti matike fakaave a ia, mo e fano kia ia.

30 Kua nakala fina age a Iesu ke he maga, ka e nofo agaia ni ke he mena ne fonofono ai e Mareta a ia.

31 Ko e tau tagata Iutaia foki ha he fale mo ia, ne fakamafana kia ia, kua kitia e lautolu a Maria kua matike fakaave mo e fano ki fafo, ti mumui atu ai a lautolu kia ia, kua pehe age, Ko e fano ne fai a ia ke he tukuaga, ke tagi ai.

32 Kua hoko foki a Maria ke he mena kua nofo ai a Iesu; kua kikite atu kia ia, ti fakaveli ai ke he hana tau ve, kua pehe age kia ia, Ko e Iki na e, ane nofo a koe i hinai, po kua nakai mate haku tugane.

33 Ti kua fioia e Iesu a ia ha ne tagi, mo e tau tagata Iutaia, ne o mai mo ia, ha ne tagi hake, ati mamahi ai hana finagalo, mo e fakaatukehe.

34 Ati pehe age ai, Ko e fe ne tuku ai e mutolu a ia? Kua pehe age a lautolu kia ia, Ko e Iki na e, haele mai a koe ke kitia.

35 Kua tagi a Iesu.

36 Ati pehe age ai e tau tagata Iutaia, Kitiala, e lahi he hana fakaalofa kia ia!

37 Ka ko falu ia lautolu, kua pehe age, Nakai kia maeke ke he tagata na ne fakaala e tau mata hana ne matapouli, ke fekau atu foki ke ua mate e tagata nai?

38 Ti kua liu foki mamahi e finagalo a Iesu, kua hoko a ia ke he tukuaga. Ko e ana haia, kua toka foki e maka ke he gutu ana.

39 Kua tala age a Iesu, Uta kehe atu ā e maka. Ti pehe age a Mareta e mahakitaga he tagata ne mate, Ko e Iki na e, kua elo tuai a ia, nukua po fa tuai a ia.

40 Kua tala age a Iesu kia ia, Ka e nakai kia ko e mena tala atu e au kia koe, Kaeke ke tua a koe, ti kitia ai e koe e lilifu he Atua?

41 Ati uta kehe ai e lautolu e maka he mena ne tuku ai e tagata mate. Ati haga hake ai e tau fofoga a Iesu, kua pehe a ia, Ma Matua na e, kua fakaaue atu au kia koe, he fanogonogo mai a koe kia au.

42 Kua iloa foki e au, kua fanogonogo mai a koe kia au nakai noa; ka ko e moto tagata ha ne agaagai mai kua tala atu ai e au, kia talia ai e lautolu ne fakafano mai e koe au.

43 Kua vagahau atu e tau kupu ia, ati ui ai a ia mo e leo lahi, Lasalo na e, ati hau a ki fafo.

44 Ti fano ai ki fafo a ia ne mate, kua lili gaia e tau hui mo e tau lima ke he tau ie ne tanu aki, kua pipi foki hana tau mata ke he holoholo. Ati tala age ai a Iesu kia lautolu, Vevete e mutolu a ia, ti tuku atu a ia ke fano.

45 Ti kua tokologa e tau tagata Iutaia, ko lautolu ne o atu kia Maria, kua kitia e lautolu e tau mena ne eke e Iesu, ati tua ai a lautolu kia ia.

46 Ka ko falu ia lautolu kua o age ke he tau farasaio, mo e talahau atu kia lautolu e tau mena ne eke e Iesu.

47 Ati fakapotopoto ai e tau ekepoa ne mua, mo e tau farasaio ke he fakapotopotoaga, kua pehe age a lautolu, Ko heigoa e mena ke eke e tautolu? Ha ko e tagata na, kua eke e tau fakamailoga loga.

48 Kaeke ke tokai pihia e tautolu, a ia, ti talia a ia he tau tagata oti kana; ti o mai e tau tagata Roma, ti fakaoti ai ha tautolu a tau mena, katoa mo e ha tautolu a motu.

49 Ka ko e taha ia lautolu, ko Kaiafa, ko e ekepoa ne mua a ia ke he tau ia, kua tala age a ia kia lautolu, Nakai iloa ni e mutolu ha mena;

50 Nakai manamanatu foki a mutolu, ko e mena aoga ia tautolu ke mate taha tagata ke hukui aki e motu, kia nakai mahakava ai e motu oti kana.

51 Nakai talahau noa e ia e mena ia, ka ko e ekepoa ne mua a ia ke he tau ia, ti perofeta mai ai e ia, to mate a Iesu ke hukui aki e motu.

52 Nakai kuenaia foki ke hukui e motu ia, ka kia fakapotopoto ai, kia fakalataha, e fanau he Atua he mavehevehe.

53 Ti kua kamata mai he aho ia ke pulega fakalataha ai a lautolu ke kelipopo a ia.

54 Ko e mena ia, nakai fano fakakite ai a Iesu ki mua he tau Iutaia, ka kua haele kehe a ia he fahi ia kua hoko ke he fahi atu ne tata age ke he tutakale, ke he maga ne ui ko Efaraimo, kua nonofo ai mo e hana tau tutaki.

55 Kua tata mai e paseka he tau Iutaia; ne tokologa mai he tau magamotu kua o hake ki Ierusalema ka e nakala hoko ke he paseka, kia fakameā ai e lautolu a lautolu.

56 Ati kumi ai e lautolu a Iesu kua vagavagahau foki a lautolu ne tutu ke he faituga, Kua manatu a mutolu ke ha? Nakai kia hau a ia ke he galue?

57 Kua poaki atu foki e tau ekepoa ne mua, mo e tau farasaio, Kaeke kua iloa e taha e mena ha i ai a ia, kia fakailoa mai kia tapaki ai e lautolu a ia.