Fakakiteaga

12 KUA kitia foki e fakamailoga lahi ke he lagi ko e fifine kua tapulu ke he la, ha i lalo foki hana tau hui e mahina, ha i luga foki hana ulu e foufou fetu ne hogofulu ma ua;

2 Kua fatu foki a ia; kua mamahi a ia mo e fakatutū he mamahi ke fanau.

3 Kua kitia foki e taha fakamailoga ke he lagi, kitiala, ko e tarako lahi kua kula, ne fitu la hana tau ulu, mo e tau hoe ne hogofulu; ha he tau ulu foki hana e tau foufouiki ne fitu.

4 Kua toho foki he hana hiku e tau fetu ne tolu aki e tau fetu he lagi ti liti hifo e ia a lautolu ke he lalolagi. Kua tu foki e tarako ki mua he fifine ko e fanau ne fai, kia kai ai e ia hana tama ka fanau mai.

5 Kua fanau foki e ia e tama tane, ko ia ke pule ke he tau motu oti ke he tokotoko lapatoa; kua hamu hake foki e tama hana ke he Atua mo e hana nofoaiki.

6 Ti hola ai e fifine ke he tutakale, ha i ai e mena kua taute he Atua ke nofo ai a ia, kia fagai ai e lautolu a ia ke he tau aho ne taha e afe ti ua e teau mo e onogofulu.

7 Kua tau foki a lautolu he lagi; ko Mekaeli mo e hana tau agelu kua tau ke he tarako, ko e tarako foki kua tau a ia mo e hana tau agelu;

8 Ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu.

9 Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.

10 Ne logona foki e au e leo lahi ke he lagi, kua pehe, Kua hoko mai tuai ainei e fakamouiaga, mo e malolo, mo e kautu he Atua ha tautolu, mo e pule he hana Keriso; ha kua liti ki lalo a ia ne hokotaki e tau matakainaga ha tautolu, ko ia ne hokotaki a lautolu ki mua he Atua ha tautolu ke he aho mo e po.

11 Ka e kautu a lautolu kia ia ha ko e toto he Punua mamoe, mo e kupu he tau talahau ha lautolu, kua nakai fakahelehele foki ha lautolu a moui kua hoko ke he mate.

12 Ko e mena ia kia fiafia ai a koe ko e lagi, mo mutolu kua nonofo ai. Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.

13 Kua kitia foki he tarako kua liti hifo a ia ke he lalolagi, ti favale ai a ia ke he fifine ne fanau e tama tane.

14 Kua foaki atu foki ke he fifine e na tapakau he aeto lahi, kia lele ai a ia mai mua he gata ke he tutakale ke he mena ke nofo ai a ia, kia fagai ai a ia ke he tau, mo e tau tau, mo e taha tau kua vevehe ua.

15 Kua fakalua hake foki e gata mai he gutu hana e vai ki tua he fifine tuga ne vailele, kia tafia ai a ia ke he vai.

16 Ti lagomatai ai e fonua ke he fifine, kua fakamaga foki he fonua hana gutu, mo e inu e vailele ne fakalua mai e tarako mai he gutu hana.

17 Ti ita ni e tarako ke he fifine, ti fina atu ai a ia ke tau ke he tau fanau hana kua toe, ko lautolu kua omaoma ke he tau poaki he Atua, mo e taofi e talahauaga kia Iesu Keriso.