Tanielu

6 NE finagalo a Tariu ke kotofa taha e teau ti uafulu e iki ke pule ai ke he kautu, ha ha i ai a lautolu ke he kautu oti ni.

2 Ne kotofa foki e tau iki ne mua ne tokotolu, ko e taha ia lautolu ko Tanielu haia; ne pule a lautolu ke he tau iki, kia uta he tau iki e tau ogo kia lautolu ko e tau iki ne mua, ke aua neke maona e tau mena he patuiki.

3 Ka kua mua a Tanielu na ke he tau iki ne mua mo e tau iki, he pulotu lahi a ia, ne manatu foki e patuiki ke kotofa a ia ke pule ke he kautu oti.

4 Ti kumi he tau iki ne mua mo e tau iki ke moua e lautolu e mena ke he kautu ke hokotaki ai a Tanielu; ka e nakai moua ai e lautolu ha mena ke hokotaki ai a ia, po ke mena ne mahani kelea ai a ia; ha kua fakamoli ai a ia, ti nakai moua foki e lautolu ha mena ne hehe ai, po ke mahani kelea ai a ia.

5 Ti pehe age e tau tagata ia, Nakai moua e tautolu ha mena ke hokotaki ai a Tanielu na, kaeke ke nakai moua ai e tautolu ha mena kia ia ke he fakatufono ha hana Atua.

6 Ti lolofi age e tau iki ne mua mo e tau iki ke he patuiki, kua pehe age a lautolu kia ia, Ko e patuiki na e, ma Tariu, kia moui tukulagi a koe;

7 Kua pulega tuai e tau iki ne mua oti he kautu, ko e tau pule, mo e tau iki oti, ko e tau tui, katoa mo e tau pule he tau fahi motu, kia eke ai e fakatufono he patuiki, mo e fakamau ai e fakatufono hataki, kaeke ke ole e taha ha mena mai he taha atua, po ke taha tagata, ka ko koe hoko koe ke ole mena ki ai, ko e patuiki na e, ke he tau po tolugofulu, to liti ai a ia ke he ana leona.

8 Hanai ko e patuiki na e, kia fakamau e koe e fakatufono hataki, mo e tohi ai ke he tohi ke aua neke fakahui, ke tuga ne tau fakatufono he tau tagata Metai mo e tau tagata Peresia kua nakai fakahui.

9 Ko e mena ia ne tohi ai he patuiki ko Tariu e tohi mo e fakatufono ke hataki ai.

10 Ne iloa e Tanielu kua tohi e tohi, ti fano a ia ke he fale hana, ne toka noa e tau fakamaama he hana poko ne hagao atu ki Ierusalema, ti taki laga tolu he tau aho ne fakatokotui ai a ia ke he hana tau tuli hui, mo e liogi, mo e fakaaue ki mua he Atua hana, tuga he mahani ai a ia.

11 Ti lolofi age e tau tagata ia, ti moua e lautolu a Tanielu ne liogi mo e oleole atu ai ki mua he Atua hana.

12 Ti o age ai a lautolu, kua pehe age a lautolu ke he patuiki ke he fakatufono hataki he patuiki, Nakai kia tohi e koe e fakatufono hataki, kaeke ke olelalo atu e tagata ke he taha atua, po ke taha tagata, ka ko koe hoko koe ke olelalo atu ki ai ko e patuiki na e, ke he tau po tolugofulu, to liti ai a ia ke he ana leona? Ti tali age e patuiki kua pehe age, E, ko e moli e mena ia, tuga ne fakatufono he tau tagata Metai mo e tau tagata Peresia nakai ni fakahui.

13 Ti tali age ai a lautolu ke he patuiki, kua pehe age, Ko Tanielu na, ko e tagata he paeaaga a Iuta, nakai fakalilifu a ia kia koe ko e patuiki na e, mo e fakatufono hataki ne tohi e koe, ka kua liogi a ia taki laga tolu he tau aho.

14 Ne logona he patuiki e tau kupu na, ti mamahi lahi a ia kia ia ni, ti manako lahi a ia ke laveaki a Tanielu; ti eke taha a ia ke laveaki a ia kua hoko ke he magaaho ne to ai e la.

15 Ti lolofi age ai e tau tagata ia ke he patuiki, kua pehe age ke he patuiki, Ko e patuiki na e, kia iloa e koe ko e fakatufono he tau tagata Metai mo e tau tagata Peresia, nakai ni fakahui e fakatufono hataki po ke fakatufono kua fakamau ai he patuiki.

16 Ne tala age e patuiki ti takitaki age e lautolu a Tanielu ti liti e lautolu a ia ke he ana leona. Ne tala age e patuiki kia Tanielu, kua pehe age, Ko e Atua hau kua fekafekau mau a koe ki ai, to laveaki e ia a koe.

17 Ne ta mai foki e lautolu e maka mo e tuku ai e lautolu ke he gutu ana, ti fakamau fakamailoga ai he patuiki ke he mama hana, katoa mo e mama he tau iki ha ha ia ia, ke aua neke hiki e pule kia Tanielu.

18 Ti fano e patuiki ke he hana fale, ti nakai kai ai a ia ha mena he po ia; ti nakai ta age ai e lautolu e tau akau fakatagi ki mua hana, mo e mohealafia ai a ia.

19 Ti uhu matike e patuiki ke he matafatafa ata he aho, mo e alumaki atu a ia ke he ana leona.

20 Ne hoko atu a ia ke he ana, ti ui age a ia mo e leo mamahi kia Tanielu, ne vagahau ai e patuiki kia Tanielu, kua pehe age, Tanielu na e, ko e fekafekau he Atua moui, kua maeke nakai e Atua hau kua fekafekau mau a koe ki ai, ke laveaki a koe mai he tau leona?

21 Ti pehe age a Tanielu ke he patuiki, Ko e patuiki na e, kia moui tukulagi a koe.

22 Ne fakafano mai he Atua haku hana agelu, kua pa ai e tau gutu he tau leona, ti nakai fakamamahi ai e lautolu au, ha kua fioia e ia kua nakai fai mahani kelea au ki mua hana, ti nakai eke foki e au ha mena kelea ki mua hau, ko e patuiki na e.

23 Ti fiafia lahi ai e patuiki ha ko ia, ti pehe age a ia ke ta hake a Tanielu he ana; ti ta hake ai e lautolu a Tanielu he ana, kua nakai ni mamahi ai a ia, he tau a ia ke he hana Atua.

24 Ti poaki age e patuiki, ke takitaki mai e lautolu e tau tagata ia ne hokotaki a Tanielu, ti liti e lautolu a lautolu ke he ana leona, ko lautolu, mo e fanau ha lautolu, mo e tau hoana ha lautolu; ti kautu e tau leona kia lautolu, ne gutiguti e lautolu ha lautolu a tau hui motua oti, ka e nakaila hohoko hifo a lautolu ke he kelekele he ana.

25 Ti tohi age he patuiki ko Tariu ke he tau motu oti, mo e tau kautu, mo e tau tagata vagahau kehekehe kua nonofo ke he lalolagi oti, kua pehe age, Kia tupu lahi ha mutolu a monuina.

26 Kua pule au ke vivivivi mo e matakutaku ai e tau tagata he tau fahi kautu oti he kautu haku, ki mua he Atua a Tanielu; ha ko ia ko e Atua moui, to tumau a ia tukulagi, nakai fakaoti hana kautu mo e hana pule ke hoko ke he fakahikuaga.

27 Kua fakamoui e ia, mo e laveaki, kua eke foki e ia e tau fakamailoga mo e tau mana ke he lagi mo e lalolagi, ko ia ne laveaki a Tanielu mai he tau lima he tau leona.

28 Ti monuina a Tanielu na ke he vaha ne patuiki ai a Tariu, katoa mo e vaha ne patuiki ai a Kuresa ko e tagata Peresia.