Tau Salamo

47 KIA patipati ha mutolu a tau lima, ko mutolu ko e tau motu oti kana, kia kalaga atu ke he Atua mo e leo fiafia.

2 Ha kua matakutakuina a Iehova ko e Mua ue atu, ko e Patuiki to atu ke he lalolagi oti kana,

3 To fakatokolalo e ia e tau motu kia tautolu, mo e tau motu kehe ki lalo he tau hui ha tautolu.

4 To fifili e ia e fonua ma tautolu, ko e mena ne fiafia ki ai a Iakopo, kua ofania e ia. Sila.

5 Kua haele hake a Iehova mo e kalaga fiafia, kua haele hake a Iehova mo e leo he pu.

6 Kia lologo atu a ke he Atua, ati lologo atu a; kia lologo atu a ke he Patuiki ha tautolu, ati lologo atu a.

7 Ha ko e Atua, ko e Patuiki a ia he lalolagi oti kana; kia lologo atu a mo e pulotu.

8 Ko e patuiki e Atua he tau motu kehe; kua haele e Atua ke he hana nofoaiki tapu.

9 Kua fakapotopoto e tau iki he tau motu ke he motu he Atua a Aperahamo; ha ko e mena ha he Atua e tau akau punuti he lalolagi; kua tokoluga mua ue atu a ia.