1 Tau Patuiki

7 KO e hogofulu ma tolu e tau ne ta ai e Solomona hana fale; ti mau hana fale oti he eke e ia.

2 Ha kua ta e ia e fale he vao a Lepanona, ne taha e teau e kupita hana loa, ti limagofulu e kupita hana laulahi, ti tolugofulu e kupita hana tokoluga; ne ta ai e ia ki luga he tau atu pou arasi ne fa, ko e tau akau fakalava foki ko e tau arasi ki luga he tau pou.

3 Kua ato aki foki ke he tau arasi ki luga he tau akau fakalava, ki luga he tau pou ne fagofulu ma lima, ne taki hogofulu ma lima e pou ke he atu pou taha.

4 Ti ha ha i ai e tau akau fakalava ke he tau atu ne tolu, ti fakafehagai e taha fakamaama mo e taha fakamaama ke he tau atu fakamaama ne tolu.

5 Ko e tau gutuhala oti mo e tau pou kua fakafahifā, kua eke ai mo e tau akau fakalava, ti fakafehagai e taha fakamaama mo e taha fakamaama ke he tau atu fakamaama ne tolu.

6 Ti eke ai e ia e fakamaluaga ke he tau pou, ne limagofulu e kupita hana loa, ti tolugofulu e kupita hana laulahi; ha ha i mua ha lautolu e fakamaluaga, ha ha i mua ha lautolu foki e tau pou mo e tau akau fakalava.

7 Ti eke e ia e fakamaluaga ma e nofoaiki, ke fakafili ai e ia, ko e fakamaluaga ke fakafili mena ai haia; ti ufi aki ia ke he tau arasi ke kamata mai he laupapa he fale i lalo, ke hoko hake ke he laupapa i luga.

8 Ko e hana fale foki ke nofo ai a ia ne ha i ai ke he lotopā ki tua he fakamaluaga, kua taute ai pihia foki. Ne eke foki e ia e fale ma e tama fifine a Farao, ne eke ai e Solomona mo hoana hana, ke tuga ne fakamaluaga na.

9 Ko e tau maka uho ne eke aki oti ni, ko e tau maka kua tata, ke lata mo e fafati, kua kili aki ke he tau kili i loto katoa foki mo tua, ke kamata mai he fakaveaga, ati hoko hake ke he tau maka he atu i luga, ti pihia foki i fafo ke hoko ke he lotopa lahi.

10 Kua eke foki e fakaveaga ke he tau maka, uho, ko e tau maka lalahi, ko e tau maka ne takihogofulu e kupita, mo e tau maka ne taki valu e kupita.

11 Ha ha i luga foki e tau maka uho, ko e tau maka kua tata ke lata mo e fafati; ha ha i ai foki e tau arasi.

12 Ha ha i ai foki ke he lotopā lahi ne takai ai, e tau atu maka ne tolu ko e tau maka tātā mo e atu akau fakalava, ko e tau arasi kua tātā, mo e lotopā ki loto tuga ne fale a Iehova, katoa mo e fakamaluaga he fale.

13 Ti fakafano atu he patuiki ko Solomona, mo e ta mai ai e ia a Hairamo i Turo.

14 Ko e tama tane a ia he fifine takape, ko e tagata he magafaoa a Nafatali, ka ko e hana matua tane ko e tagata Turo a ia, ko e tufuga a ia he eke e tau mena apa kula; kua puke a ia ke he iloilo mo e pulotu, ti iloa e ia ke eke e tau gahua oti ke he tau mena apa kula. Ti hau a ia kia Solomona, mo e eke ai e ia hana tau gahua oti.

15 Kua eke e ia e tau pou apa kula ne ua, ne taki hogofulu ma valu e kupita e tokoluga he na pou ia; Ko e fafati ke vakai aki e taha pou mo e taha pou ko e hogofulu ma ua e kupita.

16 Ti eke e ia ke he apa kula kua tunu, ua e kapetala ke tuku ai ke he tau hiku pou; ne lima e kupita e tokoluga he taha kapetala, ti lima e kupita e tokoluga he taha kapetala.

17 Ti eke e ia e tau mena kua taute po ke kupega, mo e tau mena filifili ma e tau kapetala ha ha he tau hiku pou; ko e fitu ma e taha kapetala, ti fitu ma e kapetala ne ua aki.

18 Kua eke e ia e tau pou; ti ha i ai e tau atu rimoni ne ua ke he mena kua taute po ke kupega ke takai ai, ke ufi aki taha kapetala ke he hiku pou; ti eke pihia foki e ia ke he kapetala ne ua aki.

19 Ko e tau kapetala foki he tau hiku pou ke he fakamaluaga, ne eke ai e ia e tau mena tuga ne tau fiti talotalo, ne fa e kupita.

20 Ko e tau kapetala he tau hiku pou ne ua, ne ha i ai e atu rimoni mai luga ni, tata age ke he mena laulahi ke he mena eke po ke kupega; ne takiua e teau rimoni ke he tau atu ke he tau kapetala ne agaagai ai.

21 Ti fakatu ai e ia e tau pou ke he fakamaluaga he faituga; ne fakatu e ia e pou ke he fahi matau mo e ui ai e ia hana higoa ko Iakina; ti fakatu e ia e pou ke he fahi hema mo e ui ai e ia hana higoa ko Poasa.

22 Ti ha ha i luga he tau nifo pou e tau mena tuga ne tau talotalo. Ti mau ai e gahua ke he tau pou.

23 Ti eke e ia e vai apa kula, ne hogofulu e kupita hana fafati ke kamata mai he kala he taha fahi ke hoko atu ke he kala he taha fahi; ko e mena veliveli ni; ne lima e kupita hana tokoluga; ti tolugofulu e kupita e fafati ke takai aki a ia.

24 Ha ha i lalo foki hana kala e tau vine vao ne takai ai, ne taki hogofulu ke he kupita taha kua agaagai ai; kua takai ai e vai; kua eke ke he na atu ua e tau vine vao he eke ai e ia.

25 Ti fakaheke ai ki luga he tau povi ne hokofulu ma ua; kua fakahagao e tau povi ne tolu ke he fahi tokelau, ti fakahagao e tolu ke he fahi lalo, ti fakahagao e tolu ke he fahi toga, ti fakahagao foki e tolu ke he fahi uta; ne ha i luga ia lautolu e vai, ko e tau tua foki ha lautolu oti ha i loto ia.

26 Ko e hana matolu kua tatai ia mo e laulahi he aloalolima; ti eke hana kala tuga ne kala he kapiniu, kua eke ai e tau fiti talotalo; ko e hana liu foki ko e ua e afe paita to puke ai.

27 Ti eke ai e ia e tau fakatuaga kumete apa kula ne hogofulu; ne fa e kupita e loa he taha fakatuaga, ti fa e kupita hana laulahi, ti tolu foki e kupita hana tokoluga.

28 Ne eke pehe e tau fakatuaga kumete, ne ha i ai e tau fahi ke takai aki, ko e tau fahi ne takai aki he tau avaava.

29 Ha i ai foki ke he fahi ne takai aki he tau avaava ha lautolu e tau leona, mo e tau povi, mo e tau kerupi; ha ha i luga foki he tau avaava e tau fakatuaga ki luga; ti ha i lalo he tau leona mo e tau povi ko e tau mena fili ke tautau.

30 Ti takitaha e tuaga mo e tau mena veliveli apakula ke taveliaki ne fa, mo e ha lautolu a tau kalihe veli apa kula; ti ha i ai ke he hana tau hui ne fa e tau lago; ko e tau lago apa kula ki lalo he takeleaga ke he tau fahi kua takitaha mo e hana mena filifili.

31 Ko e hana gutu foki ki loto he kapetala, mo e hana luga foki, ko e kupita haia; ti eke fakaveliveli hana gutu, ne eke tuga ne fakatuaga he takeleaga, ko e kupita mo e hafa kupita; ha ha i ai foki he he hana gutu e tau mena kua ta, ko e ha lautolu a tau fahi ke takai aki kua eke fakafahifā tatai, ka e nakai eke fakaveliveli.

32 Ha ha i lalo foki he fahi ke takai aki e tau veli ne fa; ko e tau kalihe veli foki he tau veli ke he fakatuaga he takeleaga; ko e takitaha e kupita mo e hafa kupita e tokoluga he tau veli.

33 Kua eke e tau veli tuga ne eke ai e tau veli he tau kariota; ko e ha lautolu a tau kalihe veli, mo e ha lautolu a tau mena ne vakai aki, mo e ha lautolu a tau ka veli, mo e ha lautolu a tau fakamauaga he na potu he tau kalihe veli, ko e apa kula oti ia.

34 Ti ha i ai e tau lago ne fa ke he hana tau kaniva ne fa he fakatuaga takeleaga taha; ne tutaki fakalataha e fakatuaga mo e hana tau lago.

35 Ha ha i ai ke he fahi ki luga he fakatuaga takeleaga e mena ke takai aki kua takai ai, ko e hafa kupita hana tokoluga; kua kakano fakalataha foki mo e fakatuaga hana fahi ke takai aki, mo e hana fahi ha ha i ai hana fahi ki luga.

36 Ti ta ai e ia ke he tau lapa he tau fahi ha lautolu, mo e ha lautolu a fahi ke takai aki, e tau kerupi, mo e tau leona, mo e tau pama, kua fakalata ke he tau mena tokanoa ha lautolu takitaha, mo e tau mena filifili kua takai aki.

37 Ne eke pihia e ia e tau fakatuaga takeleaga ne hogofulu; kua fakataufata a lautolu oti he taute mo e fafati ha lautolu, mo e ha lautolu a tino mai.

38 Ti eke e ia e tau kumete apa kula ne hogofulu; ne takifagofulu e paita e tau kumete to puke; ti takifa e kupita e tau kumete; ko e tau tuaga ne hogofulu ti takitaha mo e hana kumete ki luga hana.

39 Ti tuku e ia e tau tuaga kumete ne lima ke he fahi matau he fale, mo e lima ke he fahi hema he fale; kua tuku foki e ia e takeleaga ke he fahi matau he fale ke he fahi uta ne hagao atu ki toga.

40 Kua eke e Hairamo e tau kumete, mo e tau aku, mo e tau kumete ikiiki; ti oti he eke e Hairamo e tau gahua oti ne eke ai e ia ma e patuiki ko Solomona ma e fale a Iehova;

41 Ko e tau pou ua, mo e tau mena veliveli ma e tau kapetala ha ha he tau hiku pou ua; mo e tau mena ne ua ne eke po ke kupega ke ufi aki e tau mena veliveli ke he tau kapetala ha ha he tau hiku pou.

42 Ko e tau rimoni ne fa e teau mo e tau mena ne eke po ke kupega ne ua; ko e tau atu rimoni ne ua ha ha i ai ke he mena ne eke po ke kupega taha ke ufi aki e mena veliveli ha tau kapetala ha ha he tau hiku pou.

43 Ko e tau tuaga kumete ne hogofulu mo e tau kumete ne hogofulu ha ha i luga he tau tuaga.

44 Ko e takeleaga ne taha, mo e tau povi hogofulu ma ua i lalo he takeleaga.

45 Ko e tau ulo, mo e tau aku, mo e tau kapiniu. Ne eke e Hairamo e tau mena oti ia ma e patuiki ko Solomona ma e fale a Iehova, ke he apa kula kua fakakikila.

46 Ne eke ai he patuiki e tau mena oti ia ke he kelekele tatai a Ioritana, ke he vaha a Sukota mo Saretana.

47 Ti toka e Solomona e tau mena oti ia nakai fafati, ha kua loga lahi ni; nakai maeke ke fafati e mamafa he apa kula.

48 Kua eke e Solomona e tau mena oti he fale a Iehova; ko e fatapoa auro; mo e laulau auro ha ha i luga hana e areto kua fakatokatoka i mua;

49 Mo e tau fakatuaga lamepa auro mitaki, ne lima ke he fahi matau ti lima ke he fahi hema, ki mua he mena ke vagahau mai ai; ko e tau fiti foki, mo e tau lamepa, mo e tau apita, ko e auro ia;

50 Ko e tau kapiniu foki, mo e tau helehele vavae, mo e tau kumete, mo e tau lehu, mo e tau kumete ma e tau efuefu afi, ko e auro mitaki ia; ko e auro foki ne eke aki e tau fakamau gutuhala he tau gutuhala he fale i loto ko e mena tapu ue atu haia, katoa mo e tau fakamau gutuhala he tau gutuhala he fale, ko e faituga haia.

51 Ti mau e tau gahua oti ne eke ai he patuiki ko Solomona ke he fale a Iehova. Ti ta mai ai e Solomona e tau mena oti ne fakatapu ai he matua hana ko Tavita; ko e ario, mo e auro, mo e tau kapiniu; ti toka ai e ia fakalataha mo e tau koloa he fale a Iehova.