1 Tau Patuiki

15 Ko e tau hogofulu ma valu he patuiki a Ierepoamo ko e tama a Nepata, ne eke ai a Aviama mo patuiki a Iuta.

2 Ko e tolu e tau ne eke ai a ia mo patuiki i Ierusalema. Ko e higoa he hana matua fifine ko Maaka ko e tama fifine a Apisaloma.

3 Ne eke e ia e tau hala oti he hana matua ne eke fakamua ai e ia; kua nakai katoatoa ai hana loto kia Iehova hana Atua, ke tuga e loto he hana matua ko Tavita.

4 Ka kua foaki mai e Iehova hana Atua kia ia e lamepa i Ierusalema ha ko Tavita hana matua, ke fakatu ai hana tama tane ka mole atu a ia, mo e fakatumau ai a Ierusalema.

5 Ha ko e mena eke e Tavita e tau mena tonu ki mua a Iehova, ti nakai fano kehe a ia ke he mena taha he tau mena oti ne poaki mai ai kia ia, ke he tau aho oti he hana moui, ka ko e mena hokoia ne eke e ia kia Uria ko e tagata Heti.

6 Ne tau ai a Rehopoamo mo Ierepoamo ke he tau aho oti he hana moui.

7 Ko e tau mena ne toe ne eke e Aviama, mo e tau mena oti ne eke e ia, nakai kia tohi ai ke he tohi he tau tala ke he nofoaga he tau patuiki a Iuta? Ne tau foki a Aviama mo Ierepoamo.

8 Kua takoto a Aviama fakalataha mo e hana tau matua ti tanu e lautolu a ia ke he maga a Tavita; ti eke ai e tama hana ko Asa mo patuiki ke hukuiaki a ia.

9 Ko e tau uafulu he patuiki ai a Ierepoamo i Isaraela; ne eke ai a Asa mo patuiki a Iuta.

10 Ko e fagofulu ma taha e tau ne patuiki ai a ia i Ierusalema. Ko e higoa foki he hana matua fifine ko Maaka ko e tama fifine a Apisaloma.

11 Kua tututonu foki a Asa ki mua a Iehova, tuga a Tavita hana matua.

12 Ti uta kehe ai e ia e tau tagata mahani Sotoma he motu, mo e tuku kehe e ia e tau tupua oti ne eke he tau matua hana.

13 Ko Maaka foki hana matua fifine ne uta kehe e ia a ia ke nakai eke a ia mo patuiki fifine, he eke e ia e tupua Asaira; ne hio ki lalo e Asa hana tupua, mo e huhunu ai ke he vailele ko Ketarona.

14 Ka e nakai uta kehe ai e tau mena tokoluga; ka ko Asa kua fakalataha a ia mo Iehova mo e loto katoa ke he tau aho oti hana.

15 Kua ta mai foki e ia ke he fale a Iehova e tau mena ne fakatapu he matua hana katoa mo e tau mena ne fakatapu e ia, ko e tau ario, mo e tau auro, mo e tau kapiniu.

16 Ne tau a Asa mo Paasa ko e patuiki a Isaraela ke he tau aho oti ha laua.

17 Ti hake ai a Paasa ko e patuiki a Isaraela ke tau ki Iuta, ti ati ai e ia a Rama, ke nakai maeke kia taha ke hau ia Asa po ke fina atu kia ia.

18 Ti uta e Asa e tau ario mo e tau auro oti ne toe ke he tau koloa he fale a Iehova, mo e tau koloa he fale he patuiki, ti ta age ai e ia ke he tau lima he hana tau fekafekau; ti fakafano age ai he patuiki ko Asa kia Penihata ko e tama a Taperimoni, ko e tama a Hesiona, ko e patuiki a Suria kua nofo i Tamaseko, kua pehe age,

19 Kua fai maveheaga a taua mo koe, ko e hau a matua foki mo e haku a matua; kitiala, kua ta atu e au e mena fakaalofa kia koe, ko e tau ario mo e tau auro; kia haele mai a, mo e fakahui e maveheaga ha mua mo Paasa ko e patuiki a Isaraela, ke fano kehe ai a ia ia au.

20 Ti fanogonogo ai a Penihata ke he patuiki ko Asa, ti fakafano atu ai e ia e tau takitaki kau ha ha ia ia ke he tau maga a Isaraela, ti keli e lautolu a Iono, mo Tano, mo Apelapetemaaka, mo Kinereta oti, katoa mo e motu oti a Nafatali.

21 Kua logona ai e Paasa, ti toka ai e ia a Rama nakai ati; ti nofo ai a ia i Tiresa.

22 Ti fakamatala atu ai he patuiki ko Asa kia Iuta oti, nakai ni tokanoa ha tagata tokotaha; ti uta kehe ai e lautolu e tau maka a Rama mo e hana tau akau ne ta fale ai e Paasa; ti eke ai he patuiki ko Asa a Kipea i Peniamina, mo Mitepa.

23 Ko e tau mena oti ne toe ne eke e Asa, mo e hana malolo oti mo e tau mena oti ne eke e ia, mo e tau maga ne ati ai e ia, nakai kia tohi ia ke he tohi ne tohi ai e tau tala ke he nofoaga he tau patuiki? Ka kua hoko ke he vaha ne motua ai a ia, ti gagao a ia ke he hana tau hui.

24 Kua takoto a Asa fakalataha mo e hana tau matua, ti tanu ai a ia fakalataha mo e hana tau matua ke he maga a Tavita hana matua; ti eke hana tama ko Iehosafata mo patuiki ke hukuiaki a ia.

25 Ko e tau ua ne patuiki ai a Asa i Iuta, ne eke a Natapu ko e tama a Ierepoamo mo patuiki i Isaraela, ti ua e tau ne eke ai a ia mo patuiki i Isaraela.

26 Kua mahani kelea foki a ia ki mua a Iehova, kua fano foki a ia ke he puhala he hana matua mo e hana hala ne eke e ia ti hala ai a Isaraela.

27 Ti fakafualoto kia ia a Paasa ko e tama a Akia ko e tagata he magafaoa a Isakara; ti keli e Paasa a ia i Kipetonu ko e maga he tau tagata Filisitia; ha kua pa takai ai e Natapu mo Isaraela oti a Kipetonu.

28 Ne tamate e Paasa a ia ke he tau tolu he patuiki ai a Asa i Iuta; ti eke a ia mo patuiki ke hukui aki a ia.

29 Kua eke a ia mo patuiki ti kelipopo ai e ia e magafaoa oti a Ierepoamo; nakai toka e ia taha tagata moui kia Ierepoamo, ka e fakaotioti ai ni, ke lata mo e finagalo a Iehova ne vagahau mai ai e ia ke he hana fekafekau ko Akia ko e tagata Sailo,

30 Ha ko e tau hala a Ierepoamo ne hala ai a ia, mo e tau hala foki a Isaraela ne fakatupu ai e ia ke he hana fakahogohogomanava ne fakahogohogo atu ai e ia kia Iehova ko e Atua a Isaraela.

31 Ko e tau mena ne toe ne eke e Natapu, mo e tau mena oti ne eke e ia, nakai kia tohi ia ke he tohi ne tohi ai e tau tala ke he nofoaga he tau patuiki a Isaraela.

32 Ne tau a Asa mo Paasa ko e patuiki a Isaraela ke he tau aho oti ha laua.

33 Ko e tau tolu he patuiki ai a Asa i Iuta, ne eke ai a Paasa ko e tama a Akia mo patuiki a Isaraela oti i Tiresa; ti uafulu ma fa e tau ne patuiki ai a ia.

34 Ne mahani kelea a ia ki mua a Iehova, ne fano foki a ia ke he puhala a Ierepoamo, mo e hana hala ne fakatupu ai e ia e hala kia Isaraela.