2 Nofoaga he Tau Patuiki

30 TI fakafano atu e Hesekia kia Isaraela oti katoa mo Iuta, mo e tohi atu e ia e tau tohi kia Efaraimo mo Manase, kia o mai a lautolu ke he fale a Iehova i Ierusalema, ke eke ai a paseka kia Iehova ko e Atua a Isaraela.

2 Ha kua pulega e patuiki mo e hana tau iki, mo e fakapotopotoaga oti i Ierusalema, ke eke ai e paseka ke he ua mahina.

3 Ha ko e mena nakai maeke he eke he vaha ia, he nakaila oti he fakatapu he tau ekepoa a lautolu ke lata ai; kua nakaila fakapotopoto ai foki e motu i Ierusalema.

4 Kua tonu e mena na ke he manatu he patuiki katoa mo e manatu he fakapotopotoaga oti.

5 Ne fakamau e lautolu e pulega ke fakafano atu e ogo kia Isaraela oti ke kamata i Peresepa ke hoko atu ki Tano, kia o mai a lautolu ke eke e paseka kia Iehova ko e Atua a Isaraela i Ierusalema; ha kua leva he nakai eke e lautolu ke lata mo e mena kua tohi.

6 Ne o atu e tau fekau mo e tau tohi he patuiki mo e hana tau iki kia Isaraela oti katoa mo Iuta, ke lata foki mo e poaki he patuiki, ne pehe atu, Ko e fanau a Isaraela na e, kia liliu mai a a mutolu kia Iehova ko e Atua a Aperahamo, mo Isaako, mo Isaraela, ti liu atu a ia kia mutolu ne toe, ne hao mai he tau lima he tau patuiki a Asuria.

7 Aua neke eke a mutolu ke tuga ne tau matua ha mutolu, ke tuga foki e tau matakainaga ha mutolu, ne hala a lautolu kia Iehova ko e Atua he tau matua ha lautolu, ti tuku atu e ia a lautolu ke eke mo tau tagata ke ofo ki ai, tuga he kitia e mutolu.

8 Hanai, aua neke fakamao e mutolu e tau ua ha mutolu tuga ne tau matua ha mutolu; kia tuku atu e mutolu a mutolu kia Iehova, mo e o mai a a mutolu ke he hana faituga kua fakatapu tukulagi e ia; mo e fekafekau a mutolu ke he Atua ha mutolu, kia liu kehe ia mutolu hana ita lahi.

9 Kaeke foki ke liliu mai a mutolu kia Iehova to ofania ha mutolu a tau matakainaga, mo e fanau ha mutolu ki mua ha lautolu kua eke a mutolu mo tau tagata ne fofo he tau, mo e liliu mai ai a mutolu ke he motu nai; ha ko Iehova ko e Atua fakaalofa noa a ia mo e Atua fakaalofa hofihofi noa, nakai haga kehe foki e ia hana fofoga ia mutolu, kaeke ke liliu mai a mutolu kia ia.

10 Ti o age ai e tau fekau ke he taha maga mo e taha maga he motu a Efaraimo mo Manase, ke hoko atu ni ki Sepulona; ka e feki a lautolu kia lautolu, mo e va kia lautolu.

11 Ka e pete ia ko e falu a tagata Asera, mo Manase, mo Sepulona, ne fakatokolalo a lautolu, mo e o age a lautolu ki Ierusalema.

12 Ha ha i ai foki ia Iuta e lima he Atua ke foaki atu kia lautolu e loto fakalataha ke eke e lautolu e poaki he patuiki mo e tau iki ke lata mo e kupu a Iehova.

13 Ti fakapotopoto ai e tau tagata tokologa i Ierusalema ke eke ai e galue he tau areto nakai fakaea ke he ua mahina, ko e fakapotopotoaga lahi mahaki ni.

14 Ti mamatike a lautolu mo e uta kehe ai e tau fatapoa oti ne toka ai i Ierusalema, mo e tau fatapoa oti ke huhunu ai e tau mena manogi ne uta kehe e lautolu, mo e liti ai e lautolu ke he vailele ko Ketarono.

15 Ne keli foki e lautolu e paseka ke he aho hogofulu ma fa he ua mahina; ne ma foki e tau ekepoa mo e tau tagata Levi, ti fakatapu e lautolu a lautolu, mo e ta mai ai e lautolu e tau poa huhunu ke he fale a Iehova.

16 Ne tutu a lautolu ke he mena ha lautolu ke tutu ai tuga e mahani ha lautolu, ke lata mo e fakatufono a Mose ko e tagata he Atua; ne pipi aki foki he tau ekepoa e toto ne moua e lautolu mai he tau lima he tau tagata Levi.

17 Ha ko e mena tokologa e tagata ke he fakapotopotoaga kua nakaila fakatapu a lautolu; ti keli he tau tagata Levi e paseka ma lautolu oti kua nakai mea, kia fakatapu ai a lautolu kia Iehova.

18 Ha ko e tokologa he motu, ko e tokologa e tagata ma Efaraimo, mo Manase, mo Isakara, mo Sepulona, kua nakai fakamea e lautolu a lautolu, ka e kai e lautolu e paseka nakai lata ia mo e mena kua tohi. Ka e liogi e Hesekia ha ko lautolu, kua pehe atu, Iehova na e, ko e Atua totonu kia fakamagalo mai,

19 Kia lautolu oti takitaha kua taute e tau loto ha lautolu ke kumi ke he Atua, ko Iehova ko e Atua he tau matua ha lautolu, pete he nakai fakamea a lautolu ke lata mo e fakameaaga he faituga.

20 Ti fanogonogo mai a Iehova kia Hesekia, mo e fakamalolo ai e ia e motu.

21 Ko e fanau a Isaraela ha ha i Ierusalema ne eke ai e lautolu e galue he tau areto nakai fakaea mo e fiafia lahi ni ke he tau aho ne fitu; ne fakaheke atu foki he tau tagata Levi mo e tau ekepoa kia Iehova ke he taha aho mo e taha aho ke he tau akau fakatagi ke fakaheke atu ai kia Iehova.

22 Ne fakamafana atu e Hesekia e tau tagata Levi oti ne fakaako ke puloto mitaki ke he gahua a Iehova; ne kai foki e lautolu e galue ke he tau aho ne fitu, ne eke ai e lautolu e tau poa fakaaue, mo e fakaaue atu a lautolu kia Iehova ko e Atua he tau matua ha lautolu.

23 Ti pulega e fakapotopotoaga oti ke eke ai e galue ke he falu a aho foki ne fitu; ti eke ai e lautolu ke he falu a aho ne fitu mo e fiafia.

24 Ko e mena ta age he patuiki a Iuta ko Hesekia ke he fakapotopotoaga e tau povi tane ne taha e afe ke eke mo tau poa, mo e tau mamoe ne hogofulu e afe; ne ta age foki he tau iki he fakapotopotoaga taha e afe povi tane, mo e hogofulu e afe mamoe; ne tokologa foki e tau ekepoa ne fakatapu ai e lautolu a lautolu.

25 Na fiafia e fakapotopotoaga oti a Iuta, katoa mo e tau ekepoa mo e tau tagata Levi, mo e fakapotopotoaga oti ne o mai i Isaraela, mo e tau tagata kehe ne o mai he motu ko Isaraela, mo e nonofo a lautolu i Iuta.

26 Ha ha i ai foki e fiafia lahi i Ierusalema; he nakaila fai mena pihia i Ierusalema tali mai he vaha ia Solomona ko e tama a Tavita ko e patuiki a Isaraela.

27 Ti tutu e tau ekepoa, ko e tau tagata Levi, mo e fakamonuina atu e lautolu e motu; ne fanogonogo mai foki a Iehova ke he leo ha lautolu, ti hoko atu foki e liogi ha lautolu ke he hana haeleaga tapu, ko e lagi.