Tau Salamo

83 KO e Atua na e, aua neke fakamate a koe; aua neke nakai lea a koe ko e Atua na e, aua neke nofo noa a koe.

2 Ha ko e mena, kitiala, kua fegui a lautolu kua fai fi kia koe; kua fakatokoluga tuai a lautolu ne fakavihia a koe.

3 Kua eke lagatau galo e lautolu ke he hāu a tau tagata, mo e pulepulega a lautolu kia lautolu ne fufu e koe.

4 Kua pehe a lautolu, O mai a, kia fakaotioti e tautolu a lautolu kia nakai tuai eke a lautolu mo motu; kia nakai tuai manatu tukulagi e higoa ko Isaraela.

5 Ha kua pulepulega a lautolu mo e loto fakalataha; kua eke maveheaga e lautolu ke totoko atu kia koe;

6 Ko e fale ie a Etoma mo e faoa a Isamaeli; ko Moapi mo e faoa Hakaru;

7 Ko Kavali, mo Amoni, mo Amaleka; ko Filisitia katoa mo lautolu kua nonofo i Turo;

8 Ko Asuria foki kua fakalataha a ia mo lautolu; kua eke foki a lautolu mo tau lagomatai ke he fanau a Lota. Sila.

9 Kia eke e koe kia lautolu tuga ne eke e koe kia Mitiana, mo Sisera, mo Iapino ke he pahua a Kisona.

10 Ne fakaotioti a lautolu i Enetoro; ne uta a lautolu mo otaota ke he kelekele.

11 Kia eke e koe ha lautolu a tau iki tuga na Orepa mo Seepa; kia tuga a Sipa mo Salemuna foki ha lautolu a tau iki oti kana;

12 Ko lautolu ne pehe age, Kia eke ma tautolu e mena kua haele ai e Atua.

13 Haku Atua na e, kia eke e koe a lautolu ke taveliveli, tuga ne otaota he saito ka havilia he matagi.

14 Kia tuga e afi ne huhunu e kavei, kia tuga ne puho he afi ne tugi aki e tau mouga;

15 Kia tutuli pihia e koe a lautolu ke he afā hāu; kia fakahopo e koe ha lautolu a tau ate ke he hāu a hiohio.

16 Kia fakamā e koe a lautolu; kia kumikumi e lautolu ke he hau a higoa, Iehova na e.

17 Kia fakamā a, lautolu mo e hohopo e tau ate ha lautolu tukulagi, tukumuitea; kia mā a lautolu, mo e mahaikava ni;

18 Ti iloa ai e lautolu a koe, ko e hāu a higoa ko IEHOVA, hoko koe ni kua Mua ue atu ke he lalolagi oti.