1 Samuela

5 NE toto he tau tagata Filisitia e puha he Atua, ti uta ai e lautolu i Epenesa ki Asetota.

2 Ne toto he tau tagata Filisitia e puha he Atua, ti uta ai ke he fale a Takono, ti tuku ai a ia ke he tapa a Takono.

3 Kua uhu matike e tau tagata Asetota ke he aho a pogipogi, kitiala, kua to fakafohifo ai a Takono ke he kelekele ki mua he puha a Iehova; ti toto ai e lautolu a Takono, mo e fakatu e lautolu a ia ke he hana mena ke tu ai.

4 Kua uhu ala foki a lautolu ke he aho a pogipogi, kitiala, kua to fakafohifo foki a Takono ke he kelekele ki mua he puha a Iehova; kua motu kehe tuai e ulu a Takono mo e hana na tauululima ua ke he akau fakalava he gutuhala; ko e patu hokoia a Takono ne toe ia ia;

5 Ko e mena ia nakai taholi ai he tau ekepoa a Takono katoa mo lautolu oti ne huhu atu ke he fale a Takono e akau fakalava he gutuhala a Takono i Asetota ke hoko mai ke he aho nai.

6 Ti mamafa ai e lima a Iehova ke he tau tagata Asetota, ne fakaoti e ia a lautolu, mo e ta e ia a lautolu ke he tau gagao fuafua ko Asetota mo e hana tau fahi oti.

7 Kua kitia he tau tagata Asetota kua eke pihia, ti pehe a lautolu, Nakai tokai ai e puha he Atua a Isaraela kia tautolu; ha kua mamafa hana lima kia tautolu katoa mo Takono ha tautolu a atua.

8 Ti fakafano atu e lautolu mo e fakapotopoto mai ai kia lautolu e tau iki oti he tau tagata Filisitia, ti pehe atu a lautolu, Ko e heigoa kia e mena ke eke ke he puha he Atua a Isaraela? Ti pehe mai a lautolu, Kia uta takai ai e puha he Atua a Isaraela ki Kata. Ti uta takai ai e lautolu e puha he Atua a Isaraela.

9 Kua mole he uta takai ai e puha, ti hoko ai e lima a Iehova ke he maga; ti fakaatukehe lahi ni a lautolu, ti ta ai e ia e tau tagata he maga, ko e tau tama ikiiki katoa mo e tau tagata motua, ti mamahi ai a lautolu ke he gagao fuafua.

10 Ti fakafano atu e lautolu e puha he Atua ki Ekerona, kua hoko e puha he Atua ki Ekerona, ti tagi ai e tau tagata Ekerona, kua pehe age, Kua takai mai ai a lautolu mo e puha he Atua a Isaraela ke kelipopo ai a tautolu katoa mo e maga ha tautolu.

11 Ti fakafano atu e lautolu, mo e fakapotopoto ai e tau iki oti he tau tagata Filisitia, ti pehe age a lautolu, Kia fakafano atu ā e puha he Atua a Isaraela kia liu atu a ia ke he hana motu, neke mamate ai a mautolu katoa mo e ha mautolu a maga; ha kua fakaatukehe ai he mamate e maga oti, he mamafa lahi ai e lima he Atua.

12 Ko e tau tagata nakai mamate, kua ta ai a lautolu ke he gagao fuafua; ti hoko hake ke he lagi e tagi he maga.