1 Samuela

6 TI ha i ai e puha a Iehova ke he motu he tau tagata Filisitia ke he tau mahina ne fitu.

2 Ti ui age he tau tagata Filisitia ke he tau ekepoa mo e tau taulaatua, kua pehe age, Ko e heigoa kia e mena ke eke e mautolu ke he puha a Iehova? Kia tala mai ā e mutolu po ke fakafano atu fefe e mautolu a ia ke he hana motu?

3 Ti pehe age a lautolu, Kaeke ke fakafano atu e mutolu e puha he Atua a Isaraela, aua neke fakafano noa atu a ia, ka e uta ni e mutolu kia ia e poa ha ko e hehe; ti fakamalolo ai a mutolu, ti iloa ai e mutolu ko e ha nakai uta kehe ai hana a lima ia mutolu.

4 Ti pehe age a lautolu ko e heigoa kia e poa ha ko e hehe ke uta aki e mautolu a ia? Ti pehe age ai a lautolu, Ko e tau fua auro ne lima, mo e tau kuma auro ne lima ke tatai mo e tau iki Filisitia tokolima; ha ko e malaia taha ni kia mutolu oti, mo e tau iki ha mutolu.

5 Kia eke e mutolu e tau fakatai ke he tau fua ha mutolu, mo e tau fakatai ke he tau kuma ne moumou ai ha mutolu a kelekele ti tuku atu ai e mutolu e fakahekeaga ke he Atua a Isaraela; ti ligaliga fakamāmā ai e ia hana lima ki luga ia mutolu, ki luga foki ha mutolu a tau atua, ki luga foki ha mutolu a kelekele.

6 Ti fakamao he ha e mutolu ha mutolu a tau loto, tuga na Aikupito mo Farao ne fakamao ai e lautolu ha lautolu a tau loto? Nakai kia toka atu e ia a lautolu ke o ha kua oti hana tau mana he eke kia lautolu, ti o ai ni a lautolu?

7 Hanai kia taute ā e mutolu e nofoa fakataveli fou, ti uta e mutolu ki ai ua e povi fifine kua fai punua, kua nakaila fakaheke ai e lakau hahamo; ti fakave ai e mutolu e tau povi ke he nofoa fakataveli, mo e ta mai e mutolu ha laua a na punua ke he fale mai ia laua;

8 Ti uta e mutolu e puha a Iehova mo e tuku ai ke he nofoa fakataveli, mo e tau mena kua eke ke he auro, ke ta atu e mutolu ke eke mo poa ha ko e hehe, kia fafao e mutolu ia ke he puha ke he hana fahi, ti fakafano atu e mutolu a ia ke fano.

9 Ka e kitekite a mutolu, kaeke ke hake ai a ia ke he hala he hana motu ko Petesemesa, ko ia ni kua fakahoko mai e malaia lahi nai kia tautolu; kaeke ke nakai, ti iloa ai e tautolu nakai ko e lima hana ne ta ai a tautolu; ko e mena tupu noa mai kia tautolu ia.

10 Ti eke pihia he tau tagata, ne uta e lautolu ua e povi fifine fai punua ti fakave ai e lautolu a laua ke he nofoa fakataveli, ka e puipui ai ke he fale ha laua a tau punua.

11 Ti tuku ai e lautolu e puha a Iehova ke he nofoa fakataveli, katoa foki mo e puha, mo e tau kuma auro, mo e tau fakatai ke he tau fakafoha ha lautolu.

12 Ti o hake e tau povi ke he puhala ke fina age ai ki Petesemesa, ne o leva a laua ke he puhala tu, ne o ni mo e tagi, ti nakai afe a laua ke he fahi matau po ke fahi hema; ti mumui atu kia laua e tau iki Filisitia, kua hoko ke he tau katofia a Petesemesa.

13 Kua helehele saito he tau tagata Petesemesa ke he pahua; kua hahaga hake a lautolu, ti kitia ai e lautolu e puha, ti fiafia a lautolu he kitia.

14 Ne hoko e nofoa fakataveli ke he fonua a Iosua ko e tagata Petesemesa, ti tu ai. Ha ha i ai e maka lahi; ti tipitipi e lautolu e tau akau he nofoa fakataveli, mo e eke ai e lautolu e tau povi mo poa huhunu kia Iehova.

15 Ti ta hifo ai he tau tagata he magafaoa a Levi e puha a Iehova mo e puha ha i ai, ne toka ai e tau mena ne eke ke he auro, ti tuku ai e lautolu ki luga he maka lahi. Ti eke ai he tau tagata Petesemesa ke he aho ia e tau poa huhunu, mo e eke ai e lautolu e tau poa tamate kia Iehova.

16 Ne kitia he tau iki Filisitia, ne tokolima ti liliu atu ai a lautolu ki Ekerona ke he aho ia.

17 Ko e tau fakatai ke he tau fakafoha ne eke aki he auro, ne ta age ai he tau tagata Filisitia ke eke mo poa ha ko e hehe kia Iehova hanai; ma Asetota taha, ma Kasa taha, ma Asekelona taha, ma Kata taha, ma Ekerona foki taha;

18 Ko e tau kuma auro foki ke lata mo e tau maga oti ka totou he tau tagata Filisitia, ko e tau maga he tau iki ne tokolima, ko e tau maga nonofo taue, katoa mo e tau maga ikiiki ni, ke hoko ke he maka lahi, ne fakatoka ai e lautolu e puha a Iehova; kua toka gaia e maka ia ke he fonua a Iosua ko e tagata Petesemesa ke hoko mai ke he aho nai.

19 Ne keli ai e tau tagata Petesemesa, he kitekite a lautolu ki loto he puha a Iehova; ne keli ai e ia tokofitugofulu e tagata he motu, ko e tau tagata ne limagofulu e afe. Ti tagi ai e motu he kua keli e Iehova e tau tagata ke he keliaga lahi.

20 Ti pehe age e tau tagata Petesemesa, Ko hai kia kua maeke ke tu ki mua he Atua tapu nai, ko Iehova? To hake a ia kia hai mai ia tautolu?

21 Ti fakafano atu e lautolu e tau fekau kia lautolu ne nonofo i Kiriata-iarima, kua pehe atu, Kua liuaki mai he tau tagata Filisitia e puha a Iehova, kia o mai a mutolu mo e ta hake ai kia mutolu.