Iopu

18 TI tali age ai a Pilitati ko e tagata Suaa, kia Iopu, kua pehe age,

2 To tuku e mutolu e tau hele ke tauhele aki e tau kupu ato a fe? kia manamanatu a a mutolu, ka mole atu foki ia to vagahau atu a mautolu.

3 Ko e heigoa kia e mena kua totou ai a mautolu mo e tau manu huifa, mo e nakai mea a mautolu ke he manatu ha mautolu?

4 Ko koe na ne hēhē e koe a koe ke he hau a ita; to tiaki kia e lalolagi ha ko koe? po ke lagaaki kia e maka tumau mai he mena ha ha i ai a ia?

5 To tamate ni e maama he tau tagata mahani kelea; to nakai kikila foki e puho he hana afi.

6 To eke e maama mo pouli ke he hana fale ie; to tamate foki hana lamepa ha ha i luga hana;

7 To lavelave ai e tau lakaaga malolo hana, to liti hifo foki a ia he hana ni a pule.

8 Ha ko e hana tau hui ni ne fakahoko ai a ia ke he kupega, kua fano foki a ia ki luga he matahele.

9 To mau ai hana mui hui ke he hele, to moua foki he matahele a ia.

10 Ne fufu ai ke he kelekele e hele māna, mo e matahele māna ke he puhala.

11 To fakamatakutaku ai a ia ke he tau faahi oti he tau mena ke matakutaku ai, to tutuli fakalahi ai foki a ia.

12 To fakalolelole hana malolo he fia kai to taute ai foki e malaia ke he hana tapa.

13 To kai ai hana tau faahi tino; to kai ni he tama uluaki he mate hana tau fahi tino.

14 To taaki a ia mai he fale ie hana ne tua a ia ki ai, ti uta foki a ia ke he patuiki he tau mena ke matakutaku ai.

15 To nofo ai a ia ke he hana fale ie, he nakai tuai eke e ia māna; to tolo e taio ki luga he mena kua nofo ai a ia.

16 To magomago hana tau vaka i lalo, to hahala foki hana tau la i luga.

17 To fakaoti hana fakamanatuaga mai he lalolagi, to nakai ui foki hana higoa ke he mate.

18 To vega a ia he maama ke he pouli, to tutuli kehe foki a ia he lalolagi.

19 To nakai fai tama tane a ia, to nakai fai tama tane foki a ia he hana tau tama tane ke he hana motu, to nakai toe ai foki taha ke he mena ne nofo ai a ia.

20 To ofomate a lautolu ne mumui atu kia ia ke he hana aho; tuga ne moua he matakutaku a lautolu ne mumua atu kia ia.

21 Ko e moli kua pehenā e tau fale he tau tagata mahani hepehepe; kua pihia foki e mena ne nofo ai a ia kua nakai iloa e Atua.