Tau Salamo

52 KO koe na ko e toa, ko e ha kia ne fiafia ai a koe ke he kelea? kua mahani mitaki e Atua ke he tau aho oti kana.

2 Kua manamanatu hāu a alelo ke he tau mena kelea; kua eke e koe e pikopiko tuga ne tafi matila.

3 Kua loto lahi a koe ke he kelea, ka e tote ni ke he mitaki. Kua loto lahi a koe ke he vagahau pikopiko, ka e tote ke he tau kupu tonu. Sila.

4 Ko e alelo fakavai na e, kua manako a koe ke he tau kupu ke moumou aki.

5 Ko e mena ia ke moumou tukulagi ai he Atua a koe; to uta kehe a koe, ti āki a koe mai he fale ie; ti huo foki a koe mai he motu he tau tagata momoui. Sila.

6 To kitia ai he tau tagata tututonu, mo e matakutaku ai, to feki a lautolu kia ia;

7 Kua pehe atu, Kitiala, ko e tagata ia kua nakai eke e Atua mo taue hana, ka kua tua a ia ke he lahi he hana koloa; ne fakamalolo a ia ke he hana kelea.

8 Ka ko au, tuga ne olive tupuolamoui au ke he fale he Atua; kua tua au ke he fakaalofa he Atua tukulagi tukumuitea.

9 To fakaheke atu au kia koe tukulagi ni, ha ko koe ni ne eke e mena ia; to talifaki au ke he hāu a higoa, ha kua mitaki ia ki mua he hāu a tau tagata tapu.