Isaia

56 KUA vagahau mai pehe a Iehova, Kia omaoma a mutolu ke he fakafiliaga, mo e eke e mutolu e mahani tututonu; ha kua tata haku a fakamouiaga ke hoko mai, mo e fakakiteaga he haku a tututonu.

2 Uhoaki e tagata ka eke e ia e tau mena nai, mo e tama he tagata ke taofi ia ke mau; ko ia kua omaoma ke he aho sapati neke holi ai e ia, mo e taofi e ia hana lima neke eke ai e ia ha mena kelea.

3 Ti aua neke vagahau mai e tagata kehe kua fakalataha mai kia Iehova, kua pehe mai, Kua toka kehe fakaoti e Iehova au mo e hana motu; aua neke pehe foki e eunuka, Kitiala, ko au ko e akau mago.

4 Ha kua vagahau mai pehe a Iehova ke he tau eunuka kua omaoma ke he haku a tau aho sapati, mo e fifili e lautolu e tau mena kua loto au ki ai, mo e taofi mau e lautolu haku a maveheaga;

5 To ta atu e au kia lautolu e fakamailoga mo e higoa ne mua hana mitaki ke he tau tama tane mo e tau tama fifine; to ta atu e au kia ia e higoa tukulagi to nakai uta kehe ai.

6 Ko e tau tagata kehe foki kua fakalataha mai kia Iehova, ke fekafekau kia ia, mo e fakaalofa ke he higoa a Iehova, ke eke mo tau fekafekau hana, ko lautolu oti kua omaoma ke he aho sapati ka e nakai holi ai e lautolu, mo e taofi mau e lautolu haku a maveheaga.

7 To tamai e au a lautolu ke he haku a mouga tapu, mo e fakafiafia ai e au a lautolu ke he haku a fale liogi; ko e ha lautolu a tau poa huhunu mo e ha lautolu a tau poa to talia ia ki luga haku a fatapoa; ha kua talahaua haku a fale ko e fale liogi ma e tau motu oti.

8 Kua pehe mai e Iki ko Iehova, ko ia kua fakapotopoto ai a lautolu ne vega kehe i Isaraela, To liu fakapotopoto mai e au falu kia ia, ke lafilafi kia lautolu kua oti he fakapotopoto atu kia ia.

9 Ko mutolu ko e tau manu oti he vao na e, kia o mai a, ke kai, ko mutolu ko e tau manu oti he vao motua.

10 Kua matapouli hana tau tagata toko; ko lautolu oti nakai iloa e lautolu ha mena; ko e tau kuli kuhukuhu a lautolu oti, nakai maeke ia lautolu ke ko, kua miti, kua tatakoto, kua fia mohe a lautolu.

11 Ko e tau kuli kai lahi a lautolu, nakai iloa e lautolu e makona; ko e tau leveki mamoe foki nakai iloa e lautolu ke manamanatu, kua hagao a lautolu oti ke he ha lautolu a tau puhala, kua takitaha ni a lautolu mo e hagao ke he hana koloa, nakai ni toe taha.

12 O mai a, to ta mai e au e uaina, to inu a tautolu ke konahia ke he kava; ke tuga ne aho nai foki a pogipogi; ti homo atu hana mitaki.