Ieremia

3 KUA pehe mai, kaeke ke tiaki he tagata hana hoana, ti fano kehe a ia ia ia, ti eke a ia mo hoana he taha tagata, to liu atu kia a ia kia ia? Nakai kia kelea lahi ai e motu he mena na? Ka ko koe, kua faivao a koe mo e tau tane tokologa, ka kia liu mai a koe kia au, kua pihia mai a Iehova.

2 Kia haga hake a koe hau a tau mata ke he tau mouga nakai tupu ai ha akau, mo e kitekite a, po ko fe kia e mena kua nakai faivao ai a koe? ne takahao a koe ke he tau puhala ma lautolu, tuga ne tagata Arapi ke he tutakale; kua fakakelea e koe e motu ke he hau a tau faivao, mo e hau a mahani kelea.

3 Ko e mena ia ne taofi ai e uha, ti nakai to ai foki e uha fakamui; ka e ha ha ia koe e mua le he fifine faivao nakai mafai ke mā a koe.

4 Nakai kia ui mai a koe kia au ke kamata mai he vaha nai, Haku matua na e, ko koe ni ko e takitaki haku, ka ko e tamāfine au?

5 To taofi tukulagi kia e ia hana a ita? to taofi fakaoti kia e ia? Kitiala, kua vagahau a koe, ti eke e koe e tau mena kelea mo e fakamalolo ki ai.

6 Ne vagahau mai a Iehova kia au ke he vaha he patuiki ko Iosia, Kua kitia nakai e koe e mena ne eke e Isaraela, ko ia ne liu kehe? Kua hake a ia ki luga he tau mouga tokoluga oti mo e fano ki lalo he tau akau lau uhiuhi oti, mo e faivao ai a ia.

7 Ti pehe au ka oti he eke e ia e tau mena oti na ti liu mai a ia kia au; ka e nakai ni liu mai a ia, ne kitia ai foki he matakainaga fakavai hana ko Iuta.

8 Ti kitia e au, pete ni ko e tau mena oti ia ne faivao ai a Isaraela ko ia ne liu kehe, ti tiaki ai e au a ia mo e age e au kia ia e tohi ke tiaki ai, ka e nakai matakutaku ai hana matakainaga fakavai ko Iuta ka e fano a ia kua faivao foki a ia.

9 Ti kelea ai e motu ha ko e kelea he hana faivao, ti faivao a ia mo e tau maka mo e tau akau.

10 Ka e pete ni he tau mena oti ia, nakai liu mai kia au hana matakainaga fakavai ko Iuta mo e hana loto katoa, ka kua pikopiko a ia, kua pihia mai a Iehova.

11 Kua pehe mai a Iehova kia au, Kua mua e mahani tututonu a Isaraela ne liu kehe, kia Iuta ne fakavai.

12 Kia fano ā koe, mo e fakamatala atu e tau kupu oti nai ke he fahi tokelau, kia pehe atu a koe, Kua pehe mai a Iehova. Isaraela na e, ko mutolu ne liliu kehe, kia liliu mai a ti nakai kitekite atu au mo e ita kia mutolu; ha ko au kua fakaalofa ni au kua pihia mai a Iehova, nakai tumau tukulagi haku a ita.

13 Ka kia iloa e koe hau a tau hala ne fakafualoto a koe kia Iehova hau a Atua, ne faifano a koe mo e tau tane kehe ki lalo he tau akau lau uhiuhi oti; ti nakai fanogonogo mai a koe ke he leo haku, kua pihia mai a Iehova.

14 Kua pehe mai a Iehova, Ko e fanau liliu kehe na e, kia liliu mai ā; ha ko au ko e taane ha mutolu, ti uta e au a mutolu, ke takitokotaha he tau maga mo e takitokoua he tau magafaoa, mo e ta mai e au a mutolu ki Siona.

15 To ta atu foki e au kia mutolu e tau leveki mamoe ke lata mo e haku loto, ti fagai aki e lautolu a mutolu ke he iloilo mo e lotomatala.

16 Ka hoko ke he vaha ke fakatokologa a mutolu mo e tolotologa ai ke he motu, ke he vaha ia, kua pehe mai a Iehova, to nakai tuai pehe age a lautolu, Ko e puha he maveheaga a Iehova; ti nakai tuai manatu ki ai; ti nakai tuai talahaua foki; ti nakai tuai ahi a ia; ti nakai liu eke ai a ia.

17 Ko e vaha ia to ui e lautolu a Ierusalema, ko e nofoaiki a Iehova; ti fakapotopoto ai e tau motu kehe oti ke he higoa a Iehova i Ierusalema; ti nakai o foki a lautolu ke lata mo e mao he tau loto kelea ha lautolu.

18 Ko e vaha ia to o fakalataha e magafaoa a Iuta mo e magafaoa a Isaraela, ti o mai fakalataha a lautolu he motu he fahi tokelau, ke he motu ne foaki atu e au ke eke mo tufaaga ma e tau matua ha mutolu.

19 Ka ko au, ne pehe atu au, Ke toka fefe e au a koe fakalataha mo e fanau, mo e ta atu kia koe e motu mitaki, ko e tufaaga ne mua he fulufuluola ke he atu motu? Ti pehe au, To ui mai a koe kia au, Haku matua na e; ti nakai liu kehe foki a koe ia au.

20 Ko e moli, tuga e fifine ne mahani fakavai ke he hana tane, kua mahani fakavai pihia a mutolu kia au, ko e magafaoa a Isaraela na e, kua pihia mai e vagahau a Iehova.

21 Ne logona e leo ki luga he tau mouga nakai tupu ai ha akau, ko e tagi mo e tau ole he fanau a Isaraela; ha kua fakakeukeu e lautolu ha lautolu a puhala, kua nimo ia lautolu a Iehova ha lautolu a Atua.

22 Kia liliu mai a mutolu, ko e fanau na e ne liliu kehe, ti fakamalolo ai e ia au ha mutolu a liliu kehe. Kia kitekite mai ā koe kia mautolu, kua o atu a mautolu kia koe, ha ko e Atua ha mautolu a koe, Iehova na e.

23 Ko e moli nakai aoga he tua ke he tau mouga, mo e miha he motu o tagata ki luga he tau mouga; ko e moli, ha ha ia Iehova ha mautolu a Atua e fakamouiaga a Isaraela.

24 Kua kai he mena ke mā ai e tau mena ne gahua ai ha mautolu a tau matua, tali mai he vaha fuata ha mautolu; ko e ha lautolu a tau fuifui mamoe, mo e ha lautolu a tau fuifui povi, ko e tau tama tane ha lautolu mo e tau tama fifine ha lautolu.

25 Kua tatakoto a mautolu mo e ha mautolu a mā, kua ufiufi ni a mautolu ke he ha mautolu a mā; ha kua hala a mautolu kia Iehova ha mautolu a Atua, ko mautolu katoa mo e ha mautolu a tau matua, tali mai he vaha fuata ha mautolu kua hoko ni ke he aho nai, ti nakai fanogonogo a mautolu ke he leo a Iehova ha mautolu a Atua.