Tau Salamo

102 IEHOVA na e, fanogonogo mai a koe ke he haku a liogi, kia hoko atu foki haku a tagi kia koe.

2 Aua neke haga heke hāu a fofoga ia au ke he aho ka matematekelea ai au; kia haga mai hāu a na fofoga kia au; kia fanogonogo vave kia au ke he aho ka ui atu ai au kia koe.

3 Ha kua mole atu haku tau aho tuga ne ahua, kua vela foki haku tau huimotua tuga ne malala.

4 Kua hala mo e fifigo haku loto tuga ne vao ikiiki; ha kua nimo ia au ke kai haku tau mena kai.

5 Ha ko e haku a tau oi kua piki ai haku a tau huimotua ke he kakano haku.

6 Kua tuga ne kai he vao au; kua eke au ke tuga e kusa ha he tau mena kua moumou.

7 Kua nakai mohe au, kua eke foki au ke tuga ne manu lele tote kua nofo tokotaha ke he tua fale.

8 Ko e aho katoa kua ekefakakelea mai ai kia au e lautolu kua fai fi kia au; ko lautolu foki kua vale lahi kia au kua omonuo e lautolu ke kelea ai au.

9 Ha kua kai e au e tau efuefu afi tuga ne mena kai; kua fiofio foki e au haku a mena ke inu mo e tagi,

10 Ha ko e hāu a ita, mo e hāu a vale; ha kua nikiti e koe au ki luga, ti liti hifo foki e koe au ki lalo.

11 Ko e haku a tau aho tuga ne ata loa; ko au nei foki tuga ne tau vao ikiiki ka mateafu.

12 Ka ko koe, Iehova na e, to tumau tukulagi a koe, ko e fakamanatuaga foki kia koe to hoko ia ke he taha hau mo e taha hau.

13 To tu mai a koe, ti hofihofi hāu a fakaalofa ki Siona; ha kua hoko tuai ke he vaha ke ofania ai a ia, kua hoko ni ke he vaha ne kotofa ai.

14 Ha kua fiafia hāu a tau fekafekau ke he hana tau maka, kua fakaalofa foki ke he hana efuefu.

15 To matakutaku foki e tau motu kehe ke he higoa a Iehova, ti matakutaku foki e tau patuiki oti he lalolagi ke he hāu a lilifu.

16 Ha kua ati hake e Iehova a Siona, ti kitia ai a ia ke he hana lilifu.

17 Kua hagao mai a ia ke he liogi he tagata nofogati, kua nakai vihiatia foki e ia ha lautolu a liogi.

18 To tohi e mena nai mo e hau a mui; ko e motu nakala eke, to fakaheke ia kia Ioha.

19 Ha kua kitekite mai a ia mai luga ko e hana haeleaga tapu; kua kitekite a Iehova mai he lagi ke he lalolagi;

20 Ke fanogonogo a ia ke he tau oi he tagata kua lili, ke vevete e ia a lautolu kua ikakupega;

21 Kia tokutoku atu ai e higoa a Iehova i Siona, mo e hana fakahekeaga i Ierusalema;

22 Ka kua fakapotopoto fakalataha ai e tau motu, mo e tau kautu ni ke fekafekau kia Iehova.

23 Ne fakalolelole e ia haku a malolo ke he puhala, ne fakagahoa foki e ia haku a tau aho.

24 Ne pehe atu au, Haku Atua na e, aua neke uta kehe e koe au ke he lotoga he haku a tau aho, ko e tau hau oti e tau tau hāu.

25 Ko e vaha i tuai ne fakave ai e koe e lalolagi; ko e lagi foki ko e gahua ia he hāu a tau lima.

26 To fakaoti e tau mena ia, ka ko koe to tumau ni a koe; to popo e tau mena oti ia tuga ne tapulu lahi; to hukui e koe a lautolu tuga ne tapulu, ti hukui ai ni;

27 Ka ko koe, toka taha ni a koe; ti nakai fakahiku hāu a tau tau.

28 To nonofo e fanau he hāu a tau fekafekau, ko e ha lautolu a fanau foki to fakatumau ia ki mua hāu.