Esekielu

7 TI hoko mai ai e kupu a Iehova kia au, kua pehe mai,

2 Ko koe na, ko e tama he tagata, kua pehe mai e vagahau he Iki ko Iehova ke he kelekele a Isaraela, Ko e fakahikuaga, kua hoko mai ni e fakahikuaga ke he tau fahi ne fa he motu.

3 Kua hoko ainei e fakahikuaga kia koe, to fakahoko atu foki e au haku a ita kia koe, mo e fakafili e au a koe ke lata mo e tau mahani, hau, to taui atu foki e au kia koe hau a tau mena vihiatia oti.

4 Nakai fakahao e au a koe, ti nakai fakaalofa atu au kia koe; ka to taui atu e au kia koe ha ko e tau mahani hau, mo e hau a tau mena vihiatia ha i loto ia koe; ti iloa ai e mutolu ko au ni ko Iehova.

5 Kua pehe mai e vagahau he Iki ko Iehova, Ko e mena kelea, ko e mena kelea taha, kitiala, kua hoko mai.

6 Ko e fakahikuaga kua hoko mai, kua hoko mai ni e fakahikuaga; kua ala a ia ne mohe, kua hagao atu kia koe; kitiala, kua hoko mai.

7 Kua hoko mai e fakahala kia koe kua nofo ke he motu; kua hoko mai e vaha, kua tata mai e aho ke fakaatukehe ai, ka e nakai ko e aho ke kalaga fiafia mai ai he tau mouga.

8 Hanai, kua tata mai e aho ke liligi ai e au haku a ita lahi ki luga hau, mo e fakaoti atu e au haku a ita kia koe; to fakafili e au a koe ke lata mo e mahani hau, mo e taui atu e au kia koe hāu a tau mena vihiatia oti.

9 Nakai fakahao e au a koe, to nakai fakaalofa atu au; to taui atu e au kia koe ke lata mo e hāu a tau mahani, mo e hau a tau mena vihiatia ha i loto ia koe; ti iloa ai e mutolu ko au ko Iehova kua ta a koe,

10 Kitiala, ke he aho, kitiala, kua hoko mai; kua fina atu e fakahala; kua fiti mai e tokotoko, kua matala ai e tau fiti he mahani fakatokoluga.

11 Kua matike e favale, kua eke ai mo tokotoko he mahani kelea; ti nakai toe taha ia lautolu, po ke taha he motu o tagata ha lautolu, po ke mena he tau mena ha lautolu; ti nakai tagi aue ai foki ha ko lautolu.

12 Kua hoko mai e vaha, kua tata mai ni e aho; aua neke fiafia a ia kua fakafua mai, ti aua neke tagi a ia kua fakafua atu; ha ko e ita ha ha i ai i luga he motu o tagata oti ha lautolu.

13 Ha ko e mena pete he momoui agaia a lautolu, nakai tuai liu a ia ne fakafua atu ke he tau mena ne fakafua atu ai; ha kua hagao e fakakiteaga ke he motu o tagata oti hana, nakai tuai liu mai taha; ti nakai tuai fakamalolo ai taha ke he hana ni a mahani kelea.

14 Kua ulo e pu ti tauteute ai e tau mena oti; ka e nakai fano taha ke he tau; ha kua ha i ai haku a ita i luga he motu o tagata oti ha lautolu.

15 Ha i tua he pa e pelu, ha i loto e tatalu mo e hoge; ko ia ha ha he vao to mate a ia he pelu, ko ia ha ha he maga to fakaoti a ia he hoge mo e tatalu.

16 Ka ko lautolu kua hao, kua hao ni a lautolu, to ha i ai foki a lautolu ke he tau mouga tuga ne tau lupe he tau pahua, to takitaha a lautolu oti mo e mānu ha ko e hana mahani kelea.

17 To lolelole ai e tau lima oti ti liu puke vai ai e tau tulihui oti.

18 To felevehi foki a lautolu ke he ie talatala, to ufiufi a lautolu ke he matakutaku, to ma e tau mata ha lautolu oti, to hifi puga foki e tau ulu ha lautolu oti kana.

19 To liti ki fafo e lautolu ha lautolu a tau ario, mo e tau auro ha lautolu to eke ia mo mena kelea; nakai maeke ke he ario ha lautolu mo e auro ha lautolu ke laveaki a lautolu ke he aho he ita a Iehova; to nakai makona ai a lautolu, to nakai makona ai foki e tau manava ha lautolu; ke eke ia mo mena ne tupetupe ai ti mahani kelea ai a lautolu.

20 Ko e fulufuluola foki he ha lautolu a tauteaga kua eke e lautolu ia mo mena ke fakatokoluga ai; kua eke ai foki e lautolu e tau tupua he tau mena vihiatia ha lautolu, mo e ha lautolu a tau mena fakalialia; ko e mena ia kua eke ai e au e mena ia mo mena kelea kia lautolu.

21 To tuku atu foki e au ke he tau lima he tau tagata kehe ke eke mo mena kua moua he tau, mo e tau tagata mahani kelea he lalolagi ke eke mo mena kua fofo he tau, ti holitu ai foki e lautolu.

22 To haga kehe au ia lautolu; ti holitu ai e lautolu haku a mena galo; ha kua huhu age ki ai e tau tagata favale, mo e holitu ai e lautolu.

23 Kia eke a e tau toua lapatoa; ha kua puke e motu ke he tau mahani kua lata ki ai e mate, kua puke foki e maga ke he favale.

24 Ko e mena ia to ta mai ai e au a lautolu he tau motu kehe ne mua he kelea e mahani ha lautolu, ti eke e lautolu e tau fale ha lautolu ma lautolu; to fakahiku foki e au e fakatokoluga ha lautolu ne malolo; to holitu foki ha lautolu a tau mena tapu.

25 Kua hau e malaia; to kumi e lautolu e mafola, ka e nakai ha i ai.

26 To hoko mai e malaia ki luga he malaia, mo e ogo ke he ogo, ti kumi ai e lautolu ke he perofeta e mena kua fakakite mai; ka e mole atu e fakatufono mai he ekepoa, mo e pule mai he tau patu.

27 To tagi e patuiki, to tapulu ai e tau iki ne mua ke he fakahahaku, ti vivivivi e tau lima he tau tagata he motu; to taui atu e au kia lautolu ke lata mo e ha lautolu a tau mahani, mo e fakafili e au a lautolu ke lata mo e tau mena ne eke e lautolu; ti iloa ai e lautolu ko au ni ko Iehova.