Esekielu

13 KUA hoko mai e kupu a Iehova kia au, kua pehe mai,

2 Ko e tama he tagata na e, kia perofeta age e koe ke he tau perofeta a Isaraela kua perofeta ai, mo e pehe age a koe kia lautolu kua perofeta mai he tau loto ha lautolu, Kia fanogonogo mai ā a mutolu ke he kupu a Iehova;

3 Kua vagahau mai pehe e Iki ko Iehova, Oi te fakaalofa ke he tau perofeta goagoa ne omaoma ke he tau loto ha lautolu, ti nakai kitia e lautolu ha mena.

4 Isaraela na e, ko e tau perofeta hau, kua tuga ne tau alope ha ha he tau mena kua moumou.

5 Nakai o hake a mutolu ke he tau mena ne malŏlŏ, ti nakai ati e mutolu e pa ma e magafaoa a Isaraela, ke tutu ai a lautolu ke tau ke he aho a Iehova.

6 Kua kitia e lautolu e tau mena nakai aoga mo e eke e tau lagatau pikopiko he tau taulaatua, kua pehe, Kua pehe mai a Iehova; ka e nakai fakafano atu e Iehova a lautolu; kua fakatupu foki e lautolu e amaamanaki ke fakamoli ai e kupu.

7 Nakai kia kitia e mutolu e fakakiteaga nakai aoga, mo e vagahau ai e mutolu e tau lagatau pikopiko he tau taulaatua, he pehe age a mutolu, Kua pehe mai a Iehova; ka e nakai vagahau atu ai e au?

8 Ko e mena ia kua pehe mai e vagahau he Iki ko Iehova, Kua vagahau e mutolu ke he tau mena nakai aoga mo e kitia e mutolu e tau mena pikopiko; ko e mena ia, kitiala, to eke au a mutolu mo fi haku, kua pihia mai e Iki ko Iehova.

9 To hoko foki haku a lima ke he tau perofeta kua kitia e tau mena nakai aoga, mo e eke e tau lagatau pikopiko he tau taulaatua; to nakai ha i ai a lautolu ke he tau pulega he haku motu, to nakai tohi foki a lautolu ke he tohi he magafaoa a Isaraela, to nakai hoko foki a lautolu ke he kelekele a Isaraela; ke iloa ai e mutolu ko au ko e Iki ko Iehova.

10 Kua fakahehe e lautolu haku motu kua pehe age, Kua monuina; ka e nakai fai monuina; kua ati hake e taha e pa, kitiala, kua vali ai he falu ke he puga; ko e mena ia, ko e mena ia ni,

11 Kia pehe a kia lautolu ne vali ai ke he puga, to malŏlŏ ia, to to lahi ai e uha; ko koe foki ko e uha tuli lahi to to hifo a koe; to malipilipi ai foki e pa ke he afā.

12 Kitiala, nakai kia pehe atu kia mutolu, he malŏlŏ e kaupa, Ko fe kia e puga ne vali aki e mutolu.

13 Ko e mena ia kua pehe mai e vagahau he Iki ko Iehova, To lipilipi ai e au ke he afā ke he haku a ita lahi, to lahi ai e uha ke he haku a ita, mo e uha tuli lahi ke he haku a ita lahi ke fakaoti aki.

14 To ulu ki lalo e au e kaupa ne vali ai e mutolu ke he puga, to fakatatai ai e au mo e kelekele, ti toka noa ai hana tau fakaveaga; to malŏlŏ ni, to fakaoti ai foki a mutolu i loto; ti iloa ai e mutolu ko au ni ko Iehova.

15 To fakaoti atu ai e au haku a ita lahi ke he kaupa, katoa mo lautolu ne vali ai ke he puga to pehe atu foki au kia mutolu, Kua nakai fai kaupa, ti nakai ha i ai foki a lautolu ne vali.

16 Ko e tau perofeta Isaraela haia ne perofeta atu ki Ierusalema, mo e kitia e tau fakakiteaga ke monuina ai a ia, ka e nakai fai monuina, kua pihia mai e Iki ko Iehova.

17 Ko koe foki ko e tama he tagata, kia hagao atu a koe ke he tau fifine he hau a motu, kua perofeta mai he tau loto ha lautolu; ti perofeta atu a koe kia lautolu,

18 Mo e pehe atu a koe, Kua pehe mai e vagahau he Iki ko Iehova, Oi te fakaalofa ke he tau fifine ne tuitui ai e tau uluga ma e tau tulilima oti, mo e taute e tau potiki ma e tau ulu he tau tagata he tau atu hau oti ke takahao ki ai e tau tagata! To tauhele ai kia e mutolu e tau tagata he haku a motu, mo e fakamoui ai kia e tau tagata ma mutolu?

19 Kua fakakelea ai foki e mutolu au ke he haku motu ha ko e tau puke aloalolima he tau fua karite, mo e tau maga areto, kia tamate e mutolu e tau tagata kua nakai lata ke mamate mo e fakamomoui ai e mutolu e tau tagata kua nakai lata ke momoui, ke he tau tala pikopiko ha mutolu ke he haku motu kia lautolu kua fanogonogo ke he tau tala pikopiko.

20 Ko e mena ia kua pehe mai e vagahau he Iki ko Iehova, Kitiala, kua vihiatia e au ha mutolu a tau uluga ne takahao ai a mutolu ke he tau agaga kia lele kehe ai a lautolu, to hēhē ai e au mai he tau lima ha mutolu, mo e fakafano atu e au a lautolu ke ō, ko e tau agaga ia ne takahao a mutolu ki ai ke lele kehe ai a lautolu.

21 To hēhē foki e au e tau potiki ha mutolu, mo e laveaki e au haku motu mai he tau lima ha mutolu, ti nakai tuai ha i ai a lautolu ke he tau lima ha mutolu ke takahao ki ai a mutolu; ti iloa ai e mutolu ko au ni ko Iehova.

22 Kua fakamamahi e mutolu e tau loto he tau tagata tututonu ke he tau kupu pikopiko, ko lautolu nakai fakamamahi ai au; mo e fakamalolo ai e mutolu e tagata mahani kelea, kia nakai liu mai a ia he hana mahani kelea ke fakamoui ai a ia.

23 Ko e mena ia nakai tuai kitia e mutolu e tau mena nakai aoga, poke eke foki e tau lagatau he tau taulaatua, ha kua laveaki e au haku motu mai he tau lima ha mutolu; ti iloa ai e mutolu ko au ni ko Iehova.