Esekielu

46 KUA pehe mai e vagahau he Iki ko Iehova, ko e gutuhala he pa i loto kua hagao atu ke he fahi uta, to pa ia ke he tau aho ono kua eke gahua ai; ka ko e aho sapati ke toka noa ai a ia, katoa mo e aho ke pula fou ai e mahina ke toka noa ai.

2 To hu mai e iki ke he puhala he fakamaluaga he gutuhala i fafo, mo e tu ai a ia ke he tapa he pou he gutuhala, to taute foki he tau ekepoa hana poa huhunu, mo e hana poa fakaaue, ti hufeilo ai a ia ke he akau fakalava he gutuhala, ti hu atu ai a ia; ka e nakai pa e gutuhala ato hoko ke he afiafi.

3 To hufeilo ai foki e tau tagata he motu ke he gutuhala na ki mua a Iehova ke he tau aho sapati mo e tau aho ne pula fou ai e mahina.

4 Ko e poa huhunu ke ta mai ai he iki kia Iehova ke he aho sapati, ko e ono e punua mamoe kua katoatoa e mitaki, mo e mamoe tane kua katoatoa e mitaki.

5 Ko e poa mena kai, ko e efa ia ke he mamoe tane taha, ko e poa mena kai ma e tau punua mamoe kia fakalata ia ke he tau mena ha ha ia ia, ko e hinu he puke lolo foki ke he efa taha.

6 Ko e aho foki kua pula fou ai e mahina to ta mai ai e punua povi tane kua katoatoa e mitaki, mo e ono e punua mamoe, mo e taha mamoe tane, ko e tau manu kua katoatoa e mitaki.

7 To taute foki e ia e poa mena kai, ko e efa ke he povi tane taha, mo e efa foki ke he mamoe tane taha; ka e ta mai ai e ia ma e tau punua mamoe ke lata mo e mena ke moua ai e ia, ko e hinu puke lolo foki ke he efa.

8 Ka hu mai e iki, to hu mai ai a ia he puhala he fakamaluaga he gutuhala na, to hu atu ai foki a ia he gutuhala ia ni.

9 Ka ko e tau tagata he motu ka o mai a lautolu ki mua a Iehova ke he tau galue ne kotofa, to huhu mai ai a lautolu ke he puhala he gutuhala ke he fahi tokelau ke hufeilo ai, ti huhu atu ki fafo a lautolu he puhala he gutuhala ke he fahi toga; ka hu mai foki taha ke he puhala he gutuhala ke he fahi toga, to hu atu a ia ki fafo he puhala he gutuhala ke he fahi tokelau; nakai hu atu a ia he puhala he gutuhala ne hu mai ai a ia, ka to hu atu ki fafo a ia ke he mena ne fehagai ai.

10 Ka ko e iki ka huhu mai ki fale a lautolu, to hu mai a ia fakalataha mo lautolu; ka huhu atu a lautolu ki fafo, to hu atu foki a ia.

11 Ko e tau galue mo e tau fakapotopotoaga to eke ai e poa mena kai, ko e efa haia ke he povi tane, mo e efa ke he mamoe tane, ka ko e tau punua mamoe to fakalata ia ke he tau mena ha ha ia ia, ko e hinu puke lolo foki ke he efa.

12 Ka taute foki he iki e poa huhunu kua makai ki ai hana loto, po ke poa fakaaue kua makai ki ai hana loto ke eke kia Iehova, to hafagi māna e gutuhala kua hagao atu ke he fahi uta, ti taute ai e ia hana poa huhunu mo e hana poa fakaaue tuga he eke ke he tau aho sapati; ti hu atu a ia ki fafo ti pa ai e gutuhala ka kua hu atu a ia ki fafo.

13 Kia taute foki e koe he tau aho oti e poa huhunu kia Iehova, ko e punua mamoe tau taha kua, katoatoa e mitaki, kia taute ai e koe ke he taha pogipogi mo e taha pogipogi.

14 Kia taute ai foki e koe mo e mena ia e poa mena kai ke he taha pogipogi mo e taha pogipogi, ko e veveheaga ne ono aki he efa, mo e veveheaga ne tolu aki he hinu puke lolo ke laku aki e falaoa mitaki; ko e poa mena kai nakai noa, ko e fakatufono tukulagi a Iehova haia.

15 Kia taute e lautolu e punua mamoe, mo e poa mena kai, mo e puke lolo ke he taha pogipogi mo e taha pogipogi, ko e poa huhunu mau.

16 Kua pehe mai e vagahau he Iki ko Iehova, Ka age he Iki e mena fakaalofa ke he taha he tau tama tane hana to eke ia mo tufaaga he hana tau tama tane; to eke ia ma lautolu he tufaaga.

17 Kaeke ke age e ia e mena fakaalofa mai he tufaaga hana ke he taha he hana tau fekafekau, to eke ia māna ato hoko ke he tau he tokanoaaga, ti liu aki age ke he iki; ka ko e hana tufaaga to eke ia ma e tau tama tane hana, ma lautolu ni.

18 To nakai uta foki he iki ha mena mai he tufaaga he motu, ke vega kehe a lautolu he tufaaga ha lautolu; ka to age e ia e tufaaga ke he hana tau tama tane mai he mena hana kua moua; ke aua neke fakamavehevehe ai haku motu mai he tau tufaaga ha lautolu.

19 Ti uta e ia au ke he puhala ha i ai ke he fahi he gutuhala ke he tau poko tapu he tau ekepoa ne hagao atu ke he fahi tokelau; ti kitiala, ha ha i ai e mena i tua ke he fahi lalo.

20 Ti pehe mai a ia kia au, Ko e mena hanā ke tunu ai he tau ekepoa e poa ha ko e hehē, mo e poa ha ko e hala, ke tao ai foki e lautolu e poa mena kai; ke aua neke uta ai e lautolu ke he lotopa i tua ke fakatapu ai e motu.

21 Ti uta e ia au ke he lotopa i tua, ti takitaki e ia au ke he tau matapotu ne fa he pa; ti kitiala, kua takitaha e matapotu he lotopa mo e pa.

22 Ha ha i ai ke he tau matapotu ne fa he lotopa e tau pa ne puipui, ne fagofulu e kupita hana loa, ti tolugofulu e kupita hana laulahi; ko e taha ni e fafati he tau matapotu ne fa.

23 Ha ha i ai foki e kaupa ne takai aki, ne takai aki ni e tau lotopa ne fa, ne eke foki e tau mena ke tunu ai e tau mena ki lalo hifo he tau kaupa ne takai aki.

24 Ti pehe mai a ia kia au, Ko e tau fale hanā kua tunu ai e lautolu e tau mena, kua tunu ai ke he tau mena ia e lautolu ne fekafekau ke he fale, e tau poa he motu.