Tanielu

11 KO au foki ne tu atu au ke he tau fakamua a Tariu ko e tagata Metai, ke lagomatai kia ia mo e fakamalolo aki a ia.

2 Hanai foki, to fakakite atu e au kia koe e kupu moli. Kitiala, to tutu mai foki e tau patuiki a Peresia ne tokotolu, ka ko ia ne tokofa aki to mua ue atu he loga hana tau koloa ia lautolu oti; ko e hana malolo foki, he moua ai he hana tau koloa, to fakaohooho ai e ia a lautolu oti ke tau mo e kautu a Iavana.

3 To tu mai foki e patuiki malolo, to pule ni a ia ke he tau kautu loga mo e eke e tau mena ne loto a ia ki ai.

4 Ka kua tu a ia, ti lipilipi ai ni hana kautu, mo e mavehevehe ai ni ke he tau matagi ne fa he lagi, ka e nakai eke ma e fanau hana, nakai lata foki mo e hana pule ne pule ai a ia; ha ko e mena to taaki hana kautu, to eke foki mo e falu, ka e nakai ko lautolu.

5 To malolo foki e patuiki he fahi toga mo e taha iki ha ha ia ia; to mua foki hana malolo ke he hana, to pule foki a ia; ko e pule hana, ko e pule lahi haia.

6 Ka hoko ke he fakahikuaga he tau tau to tutaki fakalataha a laua; ha ko e tama fifine he patuiki he fahi toga to hau a ia ke he patuiki he fahi tokelau ke eke ai e pulega; ka e nakai tumau kia ia e lima malolo, to nakai tumau foki a ia, po ke hana malolo; ka to tuku atu a ia katoa mo lautolu ne ta mai a ia, mo ia ne fanau ai a ia, katoa foki mo ia ne fakamalolo aki a ia ke he tau vaha ia.

7 Ka ko e huli he hana tau vaka to tu mai ai taha ke hukui aki a ia, to fina age foki a ia ke he kau, mo e fina age ai ke he taue he patuiki he fahi tokelau, to eke foki e ia kia lautolu e tau mena ne loto ki ai a ia mo e kautu ai.

8 To uta foki e ia ke he paeaaga ki Aikupito e tau atua ha lautolu, mo e tau iki ha lautolu, katoa mo e tau kapiniu uho ha lautolu ko e ario mo e auro; to toka e ia e patuiki he fahi tokelau nakai tau ki ai ke he falu a tau.

9 Ti fina age foki a ia ke he kautu he patuiki he fahi toga, ti liu age foki a ia ke he hana motu.

10 Ka ko e hana tau tama tane to tau a laua, mo e fakapotopoto ai e laua e motu o tagata ko e tau kau loga, ti o age a lautolu, ti lofia ai e motu ia lautolu, ti o age ai a lautolu; ti liliu age a lautolu mo e tau ke hoko age ke he taue hana.

11 To ita lahi mahaki foki e patuiki he fahi toga, ti fina age a ia ke tau mo ia, ko e patuiki he fahi tokelau; ti ta age e ia e motu o tagata tokologa; ka to tuku age ai e motu o tagata ke he hana lima.

12 Ka to uta kehe e motu o tagata ti fakatokoluga ai hana loto; to liti hifo foki e ia e tau tagata ko e hogofulu e afe mo e hogofulu e afe, ka e nakai kautu a ia.

13 To liu age foki e patuiki he fahi tokelau, ti ta age foki e ia e motu o tagata ne mua e tokologa ke he kau fakamua; ka mole falu a tau to hau ai a ia mo e kau lahi mo e tau koloa loga.

14 Ko e tau vaha ia foki to tutu ai e tau tagata tokologa ke totoko atu ke he patuiki he fahi toga; to fakatokoluga ai e tau tagata favale he hau a motu ke fakahoko ai e lautolu e fakakiteaga, ka to veveli a lautolu.

15 Ti fina age e patuiki he fahi tokelau, ti keli fakatumutumu atu e ia e kelekele, mo e eke e ia māna e maga ne nonofo taue; ko e kau foki he fahi toga, katoa mo e hana tau tagata fifili nakai totoko atu a lautolu, to nakai ni fai malolo a lautolu ke totoko atu ai.

16 Ko ia kua fina age kia ia to eke ai e ia e tau mena kua loto a ia ki ai, to nakai fai tagata foki ke tu ki mua hana; to tu ni a ia ke he motu fulufuluola, to fakaoti ai foki ke he hana tau lima.

17 To hagao atu foki a ia ke fina atu mo e malolo he hana kautu oti, to fakalataha foki mo ia e tau tagata tututonu; to eke foki e ia e tau mena ne loto a ia ki ai; to age foki kia ia e tamāfine ke kelea ai a ia; ka e nakai tumau ai a ia, to nakai kau a ia fakalataha mo ia.

18 Ti hagao atu a ia ke he tau motu ke he hala kau tahi, mo e fofo ai e ia e tau motu loga; ka to fakahiku ai e taha iki e mena ke fakama ai ne eke e ia; to fakaliu atu foki e ia kia ia e mena ne eke e ia ke fakama ai a ia.

19 Ti liu hagao atu a ia ke he tau taue he hana motu; ka to tupetupe a ia mo e veli, ti nakai tuai kitia a ia.

20 Ka to tu mai taha ke hukui aki a ia, ko ia ke fakafano age taha ke fina age ai ke he motu fulufuluola he hana kautu; ka e mole atu falu a aho gahoa to malipilipi ai a ia, ka e nakai malipilipi ai ke he ita po ke tau.

21 Ti tu mai ai ke hukui aki a ia e tagata ne vihiatia, kua nakai age e lautolu kia ia e lilifu he kautu; ka to hau ai a ia ka kua nonofo fakatekiteki e motu, ti moua ai e ia e motu ke he tau kupu fakavai.

22 To feoho mai foki e kau ti lofia ai a lautolu mai mua hana, to fakaoti ai a lautolu, katoa mo e iki he maveheaga.

23 Kua oti he eke e pulega mo ia, to eke ni e ia e tau mena fakavai, ha ko e mena to hake a ia, ti malolo ai a ia mo e motu tote.

24 To fano a ia ka kua nonofo fakatekiteki e motu ke he tau mena ne mua e mitaki he tau fahi kautu; to eke foki e ia e tau mena nakai eke he tau matua hana, po ke tau matua he hana tau matua; to tufatufa e ia kia lautolu e tau mena ne moua he tau, mo e tau mena ne fofo, katoa mo e tau koloa, ti manamanatu ai e ia ke he hana loto ke eke māna e tau taue, ato hoko ke he aho.

25 To fakamalolo atu foki a ia mo e hana loto katoa ke tau mo e patuiki he fahi toga, mo e kau ko e tau tagata tokologa; ko e patuiki foki he fahi toga to tau mai a ia ke he tau, mo e kau lahi mo e malolo lahi ni; ka e nakai tumau a ia ha ko e tau fatuakiloto ha lautolu kia ia.

26 Ko lautolu ne kai hana tau mena taumafa, to tamate e lautolu a ia, to feoho mai foki hana kau; ti kelipopo ai foki e tokologa.

27 Kua loto e tau patuiki tokoua na ke eke e tau mena kelea, kua vagahau pikopiko ai a laua ke he laulau taha; ka e nakai monuina ai; ha ko e mena to hoko ai e fakahikuaga ke he vaha kua kotofa.

28 Ti liu atu a ia ke he hana motu mo e tau koloa loga; to ita foki a ia ke he maveheaga tapu; to eke foki e ia e tau mena ne loto a ia ki ia, ti liu ai a ia ke he hana motu.

29 Ko e vaha ne kotofa ai to liu age a ia mo e fano ke he fahi toga; ka e nakai eke ai ke he vaha fakamui tuga ne vaha fakamua.

30 Ha ko e mena to o atu e tau foulua a Kitimo ke totoko atu kia ia; to mamahi ai hana loto, ti liu mai a ia, to ita foki a ia ke he maveheaga tapu; to eke e ia e tau mena ne loto a ia ki ai; to liu mai a ia mo a hagao atu hana manatu kia lautolu kua tiaki e maveheaga tapu.

31 Ko e tau kau foki to kau a lautolu mo ia, to holitu foki e lautolu e faituga, ko e taue haia, to uta kehe foki e lautolu e poa huhunu mau, mo e tuku ai e lautolu e mena vihiatia ke moumou aki.

32 Ko lautolu ne mahani kelea ke he maveheaga to kelea a lautolu ia ia he hana tau kupu fakavai; ka ko e tau tagata kua iloa ha lautolu a Atua, to malolo a lautolu mo e eke ai e lautolu e tau mena lalahi.

33 Ko lautolu ne iloilo ke he motu to fakaako ai e lautolu e tau tagata tokologa; ka ko e tau aho loga ke veveli ai a lautolu ke he pelu mo e afi, mo e fakapaeaga, mo e tau mena ne fofo he tau.

34 Ka veveli foki a lautolu, to moua e lautolu e lagomatai, ko e lagomatai tote; ka e pipiki atu kia lautolu e tokologa mo e tau kupu fakavai.

35 To veveli foki falu ko lautolu ne iloilo, ke kamatamata ai a lautolu, mo e fakamea ai, mo e fakahina ai a lautolu, ato hoko ke he vaha ke fakahiku ai; ha kua nakaila hoko ke he vaha kua kotofa.

36 To eke foki he patuiki ke lata mo e hana loto, mo e fakatokoluga e ia a ia, mo e eke e ia ke mua a ia ke he tau atua oti; to vagahau fakahakehake foki a ia ke he Atua he tau atua, to monuina foki a ia ato katoatoa ai e ita; ha ko e mena to eke ai e tau mena kua mau ai e pule ke eke.

37 To nakai manatu e ia ke he tau atua he hana tau matua, to nakai manatu e ia ke manako ke he tau fifine, to nakai manatu foki a ia ke he tau atua; ha ko e mena to eke e ia ke mua a ia ke he tau mena oti.

38 Ka to fakalilifu atu e ia ke he atua he tau taue ke he mena kua nofo ai a ia; ko e atua foki nakai iloa e tau matua hana to fakalilifu a ia ki ai, mo e uta ki ai e auro, mo e ario, mo e tau maka uho, mo e tau mena fulufuluola.

39 To eke ai e ia e tau taue ne mua he uka, he fakalataha a ia mo e atua kehe, ne talahau ai e ia mo e fakalahi ai e ia hana lilifu; to tuku atu foki e ia kia lautolu e pule ke he tau tagata tokologa, to tufatufa foki e ia e kelekele ke moua ai e palepale.

40 Ka hoko ke he vaha ke fakahiku ai ti tau ai mo ia e patuiki he fahi toga; ti tuga ne afa he oho atu kia ia e patuiki he fahi tokelau mo e tau kariota, mo e tau tagata heke solofanua, katoa mo e tau foulua loga; to hohoko atu foki a lautolu ke he motu, mo e feoho ki ai, mo e o age ai.

41 To hoko atu foki a ia ke he motu fulufuluola, to fakaoti foki e ia e tau motu loga; ka to hao mai he lima hana e tau motu nai, ko Etoma, mo Moapi, katoa mo lautolu ne mua he fanau a Amoni.

42 To fakaolo atu foki e ia hana lima ke he tau motu, to nakai hao foki e motu ko Aikupito.

43 Ka to pule a ia ke he tau koloa, ko e tau auro, mo e tau ario katoa mo e tau mena fulufuluola oti a Aikupito; to mumui atu foki kia ia e tau tagata Lipua, mo e tau tagata Aitiope.

44 Ka to fakaatukehe ai a ia ha ko e tau ogo mai he fahi uta, mo e fahi tokelau; ti fina age a ia mo e ita lahi kia fakaoti ai e ia mo e kelipopo ai e tau tagata tokologa.

45 To fakatu e ia e tau fale ie he hana fale iki ke he vaha he tahi mo e mouga fulufuluola mo e tapu; ka to hoko atu ke he hana fakahikuaga, to nakai ha i ai taha ke lagomatai kia ia.