Esekielu

47 TI liu aki mai e ia au ke he gutuhala he fale; ti kitiala, ne tafe atu e vai mai lalo he akau fakalava he gutuhala he fale ke he fahi uta, ha kua hagao atu e mua fale ke he fahi uta, ne hifo ai foki e vai i lalo, mai he fahi matau he fale ke he fahi toga he fatapoa.

2 Ti uta e ia au ki fafo he puhala he gutuhala ke he fahi tokelau, ne takitaki takai e ia au he puhala i tua ke he gutuhala i fafo ke he puhala ne hagao atu ke he fahi uta; ti kitiala, kua lele atu ai e vai ke he fahi matau.

3 Kua fina age e tagata ke he fahi uta ha he lima hana e afo ke fafati aki, ti fafati ai e ia taha e afe kupita, ti takitaki e ia au ke he taha fahi he vai; kua ga he tau tepuhui e vai.

4 Ne fafati foki e ia ko e afe kupita, ti takitaki e ia au ke he taha fahi he vai; kua ga he tau matatuli e vai. Ne fafati foki e ia e afe kupita, ti takitaki foki e ia au ke he taha fahi; kua ga he tokupu e vai;

5 Ne fafati foki e ia e afe kupita; kua eke tuai mo vailele nakai maeke ia au ke fano koki ai; ha kua hokulo e vai, ko e vai ke kakau ai, ko e vailele nakai maeke ke fano ai.

6 Ne pehe mai foki a ia kia au, Ko e tama he tagata na e kua kitia nakai e koe e tau mena na? Ti takitaki e ia au mo e liuaki atu e ia au ke he kauvai he vailele.

7 Kua liu atu au, kitiala, ko e tau akau loga ni ke he tau kauvai he vailele he ha i ai ke he taha fahi, mo e taha fahi.

8 Ti pehe mai a ia kia au, Kua tafe atu e tau vai ia ke he fahi uta, mo e tafe hifo ke he kelekele tatai, mo e hoko atu ke he tahi; ka hoko atu ki tahi, ti magalo ai e puke vai he tahi.

9 Ko e tau mena momoui oti foki, kua totolo ke he tau mena oti ke hoko ki ai e vailele, to momoui ia; to loga lahi foki e tau ika; ha kua hoko ki ai e vai ia mo e fakamagalo ai; to momoui ai foki e tau mena oti kua hoko atu ki ai e vailele.

10 To tutu ai foki e tau tagata takafaga, ke kamata mai i Enekati ke hoko atu ki Enekelima; to eke mo mena ke fofola ai e tau kupega; ko e hana tau ika foki kua kakano kehekehe, tuga ne tau ika he tahi lahi, kua loga mahaki ni.

11 Ka ko e hana tau mena pelapela mo e hana tau fonua ne lofia he tahi nakai fakamagalo ia; ka e tuku atu ke he masima.

12 Ko e tau kauvai he vailele ke he taha fahi mo e taha fahi, to tutupu ai e tau akau oti ke kai, nakai fifigo ha lautolu a tau lau to nakai oti ha lautolu a tau fua; takitaha e mahina mo e hana fuaga, ha kua tafe atu ha lautolu a tau vai mai he faituga; to eke foki e tau fua ha lautolu mo tau mena kai, mo e ha lautolu a tau lau to eke ia mo vailakau.

13 Kua pehe mai e vagahau he Iki ko Iehova, Ko e tau katofia hanai ke tufatufa ai e mutolu e kelekele ma mutolu, fakalata ke he tau magafaoa hogofulu ma ua a Isaraela; ke ua e tufaaga ma Iosefa.

14 Kia eke ai e mutolu e motu ke tatai e tufaaga he taha mo e taha, ko e mena ne nikiti ai au haku a lima ke foaki atu ai ke he tau matua ha mutolu, to moua foki e mutolu e kelekele nai ke eke mo tufaaga ha mutolu.

15 Ko e katofia foki he kelekele nai ke he fahi tokelau, ke kamata mai he tahi lahi ke he puhala a Hetilona, ke he mena ne fina atu ai ki Setata;

16 Ko Hamato, ko Perota, ko Siperima, ha ha i ai ke he vaha he katofia a Tamaseko, mo e katofia a Hamato ko Hasaratikona, ha ha i ai ke he katofia a Haurana.

17 Ko e hana tau katofia ke kamata mai he tahi ko Hasarenana ke he katofia a Tamaseko, mai he fahi tokelau ne hagao atu ke he fahi tokelau, mo e katofia a Hamato ko e fahi tokelau haia.

18 Ko e fahi uta foki kia fafati e mutolu, ke kamata mai Haurana, mo Tamaseko, mo Kiliata, mo e kelekele a Isaraela ki Ioritana, ke hoko atu ke he katofia he tahi ke he fahi uta. Ko e fahi uta haia.

19 Ko e fahi toga kua hagao atu ke he fahi toga; ke kamata mai Tamara, ke hoko atu ke he vai ko Meripa i Katesa ke he vailele a Aikupito ke hoko atu ke he tahi lahi. Ko e fahi toga ia kua hagao atu ki toga.

20 Ko e fahi lalo ko e tahi lahi haia, ke kamata mai he katofia ke hoko ke he mena ne fehagai mo e puhala ke fina atu ai ki Hamato. Ko e fahi lalo haia.

21 To vevehe e mutolu e kelekele na kia mutolu, fakalata ke he tau magafaoa a Isaraela.

22 To vevehe ai e mutolu ke he vili ke eke mo tufaaga ma mutolu, katoa mo e tau tagata kehe kua nonofo ia mutolu, kua fanau ai e tau tama ke he motu ha mutolu; to eke foki a lautolu kia mutolu ke tatai mo e tau tama ne fanau ai ke he motu ke he fanau a Isaraela, to fai tufaaga a lautolu mo mutolu fakalataha mo e tau magafaoa a Isaraela.

23 Ko e magafaoa kua nofo ai e tagata kehe, ko e mena ia ni ke ta age ai e mutolu kia ia hana tufaaga, kua pihia mai e Iki ko Iehova.