Tanielu

Ko e Tohi a Tanielu

1 KO e tau tolu he patuiki ai a Iehoakima ko e patuiki a Iuta ne hau ai e patuiki a Papelonia ko Nepukanesa ki Ierusalema mo e pa takai ai e ia.

2 Ti tuku atu ai he Iki ke he pule hana e patuiki a Iuta ko Iehoakima, fakalataha mo e falu a kapiniu he fale he Atua, ne uta foki e ia e tau mena ia ke he motu ko Sinara ke he fale he hana atua; ti uta ai e ia e tau kapiniu ke he fale koloa he hana atua.

3 Ti pehe age e patuiki kia Asepenasa ko e iki ne pule ke he hana tau eunuka, kia ta mai ai e ia falu he fanau a Isaraela, ko e fanau ni he patuiki katoa foki mo e fanau he tau iki;

4 Ko e tau fuata nakai ha i ai ha kelea, ka e tino mitaki ni; ko e tau tama iloilo ni, kua iloa e tau mena oti, kua pulotu, mo e lata a lautolu ke tutu ke he fale he patuiki, kia fakaako ai foki a lautolu ke he tau tohi mo e vagahau he tau tagata Kaletaia.

5 Ne kotofa foki he patuiki e tau mena kai ma lautolu ke he taha aho mo e taha aho he tau mena ne taumafa ai e patuiki, katoa mo e uaina ne inu ai a ia, tolu e tau ke taute ai a lautolu; ka mole ia ti tutu ai a lautolu ki mua he patuiki.

6 Ha ha i ai ia lautolu mai he fanau a Iuta, ko Tanielu, ko Hanania, ko Mesaelu, mo Asaria.

7 Ne fakahigoa foki he iki ne pule ke he tau eunuka a lautolu, ne ui e ia a Tanielu ko Peletisara, ka ko Hanania ko Sataraka haia, ko Mesaelu ko Mesako haia, ko Asaria foki ko Apetiniko haia.

8 Ka e manatu e Tanielu nakai kelea ai a ia he tau mena taumafa he patuiki, po ke uaina ne inu ai e ia; ti ole atu ai a ia ke he iki ne pule ke he tau eunuka ke aua neke kelea ai a ia he tau mena ia.

9 Ti fakatupu ai he Atua e fakaalofa hofihofi he iki ne pule ke he tau eunuka kia Tanielu.

10 Ti pehe age e iki ne pule ke he tau eunuka kia Tanielu, Kua matakutaku au ke he haku a iki ko e patuiki ne kotofa ai e tau mena kai ha mutolu, mo e tau mena ke inu ai a mutolu, ke kitia he ha e ia e tau mata ha mutolu kua gagati, nakai tuga e tau fuata he atu ha mutolu? ti haofia neke hio kehe he patuiki haku ulu ha ko mutolu.

11 Ti pehe age a Tanielu kia Melesara, ko ia ne kotofa he iki ne pule ke he tau eunuka ke pule kia Tanielu, mo Hanania, mo Mesaelu, mo Asaria;

12 Kia kamatamata la e koe hau a tau fekafekau ke hogofulu e po, kia ta mai e lautolu e tau fua lakau kia mautolu ke kai ai e mautolu, mo e magavai ke inu ai.

13 Ti kitekite a ke he tau mata ha mautolu, mo e tau mata he fanau kua kai e tau mena taumafa he patuiki, ti eke a e koe ke he tau fekafekau hau ke lata mo e hau a kitekiteaga.

14 Ti fanogonogo ai a ia kia lautolu ke he mena na, ti kamatamata ai e ia a lautolu ke he hogofulu a po.

15 Kua mole atu e tau po hogofulu ti kitia ai e ia kua mua he mitaki e tau mata ha lautolu, mo e mua he mitaki e tau tino ha lautolu he tau fuata oti ne kai ai e tau mena taumafa he patuiki.

16 Ti uta kehe ai e Melesara e tau mena kai ha lautolu mai he patuiki, katoa mo e uaina ne age ke inu ai a lautolu, ti age e ia kia lautolu e tau fua lakau.

17 Ka ko e tau fuata toko fa na ne foaki age he Atua kia lautolu e lotomatala mo e pulotu ke he tau tohi oti ni, katoa mo e iloilo; ka ko Tanielu kua iloilo a ia ke he tau fakakiteaga oti mo e tau miti.

18 Kua mole atu foki e tau aho ne pehe ai e patuiki ke ta age ai a lautolu; ti uta ai he iki ne pule ke he tau eunuka a lautolu ki mua a Nepukanesa.

19 Ti vagahau ai e patuiki mo lautolu; ka e nakai moua ai ia lautolu taha ne tatai mo Tanielu, mo Hanania, mo Mesaelu, mo Asaria; ti tutu ai a lautolu ki mua he patuiki.

20 Ko e tau mena oti ne ako ai ke he iloilo mo e pulotu ne huhu atu ai he patuiki kia lautolu, ne kitia ai e ia kua laga hogofulu he mua ha lautolu a iloilo ke he iloilo he tau taulaatua mo e tau tagata mana oti ke he hana kautu oti.

21 Ne ha i ai a Tanielu ke hoko ke he tau fakamua he patuiki ko Kuresa.