Kenese

46 TI fina atu ai a Isaraela mo e hana tau mena oti, kua hohoko atu ki Peresepa; ti eke ai e ia e tau poa ke he Atua a Isaako hana matua tane.

2 Ti vagahau mai e Atua kia Isaraela ke he kitekiteaga ke he po, kua pehe mai, Iakopo, Iakopo na e! ti pehe atu ai a ia, Ko au hanai.

3 Ti pehe mai a ia, Ko au ko e Atua, ko e Atua he hau a matua tane; ua matakutaku a koe ke hifo ki Aikupito, ha ko e mena to eke ai e au a koe mo motu lahi.

4 Ko au nai, to hifo a taua mo koe ki Aikupito, to ta hake ai foki e au a koe; to tuku foki e Iosefa hana lima ki luga he tau mata hau.

5 Ti tu atu ai a Iakopo i Pere-sepa, kua uta foki he fanau a Isaraela ha lautolu a matua tane ko Iakopo, mo e tau tama ikiiki ha lautolu, mo e tau hoana ha lautolu ke he tau fata fakataveli ne fakafano mai e Farao ke uta aki a ia.

6 Ne uta foki e lautolu ha lautolu a tau manu mo e ha lautolu a tau koloa ne moua e lautolu ke he motu ko Kanana, kua hohoko atu a lautolu ki Aikupito, ko Iakopo katoa mo e hana fanau oti fakalataha mo ia;

7 Ko e hana tau tama mo e tau tama he hana tau tama fakalataha mo ia, ko e hana tau tama fifine foki katoa mo e tau tama fifine he hana tau tama tane, mo e hana fanau oti kana, kua o atu a lautolu fakalataha mo ia ki Aikupito.

8 Ko e tau higoa hanai he tau tama tane a Isaraela ne o atu ki Aikupito, ko Iakopo mo e hana tau tama; ko e tama uluaki a Iakopo ko Reupena;

9 Ko e tau tama a Reupena; ko Hanoka, mo Falū, mo Hesarona, katoa mo Karame.

10 Ko e tau tama foki a Simeona; ko Iemuela, mo Iaminu, mo Oata, mo Iakina, mo Soharo, katoa, mo Saulo, ko e tama haia he fifine Kanana.

11 Ko e tau tama foki a Levi; ko Keresona, ko Koato katoa mo Merari.

12 Ko e tau tama foki a Iuta ko Eru, mo Onani, mo Sila, mo Faresa katoa mo Siraha; (ka e mamate a Eru mo Onani ke he motu ko Kanana;) ko e tau tama foki a Faresa, ko Hesarona mo Hamulu haia.

13 Ko e tau tama a Isakara; ko Tulaga, mo Pua, mo Iopu katoa mo Simarona.

14 Ko e tau tama foki a Sepulona; ko Sereta, mo Aluna, katoa mo Ihalelu.

15 Ko e tau tama tane haia a Lea ne fanau e ia kia Iakopo i Patana-rama, katoa mo e tama fifine hana ko Tina; ko e katoatoa he hana tau tama tane mo e hana tau tama fifine ko e tokotolugufulu ma tolu ia.

16 Ko e tau tama foki a Kato; ko Sifiono mo Haki, ko Suni mo Eseponu, ko Eri mo Aroti, katoa mo Areli.

17 Ko e tau tama a Asera; ko Iemina, mo Iesiva, mo Iesivi, katoa mo Peria, ko Sera foki ha lautolu a mahakitaga; ko e tau tama tane foki a Peria, ko Haveru, mo Mekielu.

18 Ko e tau tama haia a Silepa, ko ia ne āge e Lapana ke he tama fifine hana ko Lea, ne fanau e ia a lautolu kia Iakopo, ne tokohogofulu, ti tokoono e tagata.

19 Ko e fanau a Rahela ko e hoana a Iakopo, ko Iosefa mo Peniamina.

20 Ne fanau foki kia Iosefa ke he motu ko Aikupito, ne fanau mai e Asenati kia ia, ko e tama fifine ia a Potifele ko e ekepoa i Onu; ko Manase mo Efaraimo.

21 Ko e tau tama foki a Peniamina; ko Pila, mo Pekaru, mo Asepelu, ko Kera mo Naamanu, ko Ahi mo Roso, ko Mepimu mo Hupimo, katoa mo Aratu.

22 Ko e tau tama tane haia a Rahela ne fanau kia Iakopo, ko e katoatoa ha lautolu, tokohogofulu ni ti tokofa e tagata.

23 Ko e tama foki a Tano; ko Husimo.

24 Ko e tau tama foki a Nafatali; ko Ihasielu, mo Guni, mo Iesaru, katoa mo Silemo.

25 Ko e tau tama tane haia a Pila, ko ia ne ā , e Lapana kia Rahela hana tama fifine, ti fanau e ia a lautolu na kia Iakopo, ko e katoatoa he tau tama ne tokofitu ni.

26 Ko e tau tagata oti kana ne o mai mo Iakopo ki Aikupito ne tutupu mai ia ia ni, ka e nakai totou e tau hoana he tau tama tane a Iakopo, ko e katoatoa he tau tagata oti ne tokoonogofulu ia ti tokoono e tagata.

27 Ko e tau tama a Iosefa ne fanau kia ia i Aikupito, ne tokoua ia e tagata; ko e katoatoa he tau tagata oti he magafaoa a Iakopo ne o mai i Aikupito, ne tokofitugofulu a lautolu.

28 Ne fakafano atu e ia a Iuta ke mua kia ia kia Iosefa, kia fakakite e ia kia ia a Kosena; ti hohoko atu ai a lautolu ke he magamotu ko Kosena.

29 Ti taute ai e Iosefa hana nofoa fakataveli, ti hake ni ki Kosena ke feleveia mo e hana matua tane ko Isaraela; kua kitia e ia a ia, ti peka kia ia mo e tagi leva ke he hana ua.

30 Ti pehe atu ai a Isaraela kia Iosefa, Kia mate au ainei, ha kua kitia tuai e au hau a mata, ha kua moui agaia ni a koe.

31 Ti tala atu e Iosefa ke he tau matakainaga hana mo e magafaoa he hana matua tane, To hake au mo e fakakite kia Farao, to tala age au kia ia, Kua o mai tuai kia au haku tau matakainaga mo e magafaoa he haku a matua tane ne nonofo ke he motu ko Kanana:

32 Ko e tau leveki mamoe a lautolu, ha ko e tau tagata fagai manu a lautolu; kua ta mai ni ha lautolu a tau fuifui mamoe, mo e ha lautolu a tau fuifui povi, mo e tau mena oti kana ha ha ia lautolu.

33 Ka ui foki e Farao kia mutolu, mo e pehe mai kia mutolu, Ko e heigoa ha mutolu a feua?

34 Ti tala age ai e mutolu, Ko e tau tagata fagai manu hau a tau fekafekau tali mai he vaha tote ha mautolu kua hoko ni ke he vaha nai, ko mautolu katoa mo e ha mautolu a tau matua, tala age a pihia kia nonofo ai a mutolu ke he magamotu ko Kosena; ha ko e mena fakalialia ke he tau tagata Aikupito e tau leveki mamoe oti kana.