Tau Salamo

29 KO mutolu ko e fanau he tau toa, kia tuku atu a kia Iehova, kia tuku atu a kia Iehova e fakahekeaga mo e malolo.

2 Kia tuku atu a kia Iehova e fakahekeaga he hana higoa; kia hufeilo kia Iehova mo e tau mena tapu kua fulufuluola.

3 Ha i luga he tau vai e leo a Iehova, kua paku lagi mai e Atua lilifu; ko Iehova, ha i luga he tau vai loga a ia.

4 Kua malolo e leo a Iehova; kua lilifu e leo a Iehova.

5 Kua fatifati e tau arasi he leo a Iehova; kua fatifati e Iehova e tau arasi a Lepanona.

6 Ko ia ne hopohopo ai a lautolu tuga ne punua povi; ko Lepanona mo Suriona kua hopohopo tuga ne punua rema.

7 Ko e leo a Iehova kua vehevehe ai e tau puhopuho he afi.

8 Ko e leo a Iehova kua vivivivi ai e tutakale; ko Iehova kua vivivivi ai e tutakale a Katesa.

9 Ko e leo a Iehova kua fakafanau ai e tau aila; kua mahunu ai foki e loto uhi; ko e tau mena oti foki ha ha he faituga hana kua takitaha mo e talahau hana lilifu.

10 Kua nofo a Iehova ki luga he fakapuke; kua nofo ni a Iehova, ko e Patuiki tukulagi.

11 To foaki mai e Iehova e malolo ke he hana motu; to fakamonuina e Iehova hana motu ke he mafola.