Numera

22 TI o e fanau a Isaraela, mo e he api ai a lautolu ke he kelekele tatai a Moapi, ke he fahi mai nai a Ioritana kua fehagai mo Ieriko.

2 Kua kitia e Palako ko e tama a Siporu e tau mena oti ne eke e Isaraela ke he tau tagata Amori.

3 Ti matakutaku lahi ni a Moapi ha ko e tau tagata, ha ko e mena tokologa a lautolu; kua fakaatukehe foki a Moapi ha ko e fanau a Isaraela.

4 Ti pehe atu a Moapi ke he tau patu Mitiana, To fakaotioti ai a enei he tau tagata na e tau mena oti kua agāgai mai kia tautolu, tuga ne kai ai e povi e tau lau kou mui he fonua. Ko Palako foki ko e tama a Tiporu ko e iki a ia i Moapi ke he vaha ia.

5 Ti fakafano atu e ia e tau fekau kia Palaamo ko e tama a Peoro, i Petoru kua tata age ke he vailele ke he motu he fanau he hana faoa, ke ui kia ia, kua pehe atu, Kitiala, kua o mai e taha motu i Aikupito; kitiala, kua galo ai e fuga kelekele ia lautolu; kua nonofo fakafehagai foki a lautolu mo au.

6 Ko e hanai, kia hau a koe, ke kaialu ai e koe ke he motu na māku, nukua mua ha lautolu a malolo ke he haku; ti ligaliga maeke kia au ke keli a lautolu, mo e vega kehe e au a lautolu he motu; ha ko e mena iloa e au ko ia kua fakamonuina ai e koe kua monuina ni a ia, mo ia kua kaialu ai e koe kua malaia ni a ia.

7 Ti o ai e tau patu Moapi, mo e tau patu Mitiana, ha he tau lima foki ha lautolu e totogi he tau lagatau he taulātua; ti hohoko age a lautolu kia Palaamo, mo e tala age kia ia e tau kupu a Palako.

8 Ti pehe age a ia kia lautolu, Kia momohe a mutolu ki hinei he po nai, to tala atu e au kia mutolu e kupu ke vagahau mai e Iehova kia au; ti nonofo ai e tau iki Moapi mo Palaamo.

9 Ti haele mai ai e Atua kia Palaamo, kua pehe mai, Ko hai e tau tagata na ha ha ia koe?

10 Ti pehe atu a Palaamo ke he Atua, Kua fakafano mai e Palako ko e tama a Tiporu ko e patuiki Moapi kia au, kua pehe mai,

11 Kitiala, kua o mai e taha motu i Aikupito, kua galo ai e fuga kelekele ia lautolu; hanai, kia hau ā koe, ke kaialu kia lautolu māku; po ke maeke nakai au ke tau mo lautolu mo e vega kehe ai a lautolu.

12 Ti pehe mai e Atua kia Palaamo, Aua neke fano a koe mo lautolu; aua foki neke kaialu a koe ke he motu; ha kua monuina ni a lautolu.

13 Ti matike a Palaamo ke he pogipogi, ti pehe age a ia ke he tau iki ne o mai ia Palako, Kia liliu atu a mutolu ke he motu ha mutolu, ha ko e mena nakai mafai a Iehova ke toka au ke o atu mo mutolu.

14 Ti mamatike e tau iki Moapi, mo e liliu age ai a lautolu kia Palako, kua pehe age, Nakai mafai a Palaamo ke o mai mo mautolu.

15 Ti liu foki fakafano age e Palako e tau iki ne mua he tokologa mo e lilifu kia lautolu ne o fakamua

16 Ti o ai a lautolu kia Palaamo mo e pehe age a lautolu kia ia, Kua pehe mai a Palako ko e tama a Siporu, Aua neke lekua ai a koe, ka kia hau a koe kia au.

17 Ko e mena fakalilifu fakalahi atu au kia koe; ko e tau mena oti foki ke tala mai e koe kia au to eke ni e au; hanai, kia hau a koe, kia kaialu e koe ke he tau tagata nai māku.

18 Ti tali age pehe a Palaamo ke he tau fekafekau a Palako, Kaeke ke ta mai e Palako kia au e tau ario mo e tau auro ke puke ai hana fale, nakai maeke kia au ke holi e kupu a Iehova haku a Atua ke eke ai e au ha mena tote, po ke mena lahi.

19 Ko e hanai, kia nonofo a mutolu ki hinei he po nai, ato iloa e au po ke heigoa e mena ke liu vagahau mai ai a Iehova kia au.

20 Ti haele mai ai e Atua kia Palaamo ke he po, kua pehe mai kia ia, Kaeke kua o mai e tau tagata ia ke ui atu kia koe, ti matike ā koe, ti o mo lautolu; ka ko e kupu hokoia ke vagahau atu ai e au kia koe, kia eke ai e koe.

21 Ti matike a Palaamo ke he magaaho pogipogi, mo e fakanofoa hana asini, ti o ai fakalataha mo e tau iki Moapi.

22 Ti tupu ai e ita he Atua he fano a ia; kua tu mai foki e agelu a Iehova ke he puhala ke totoko atu kia ia. Ne heke ai e ia hana asini, ne o foki mo ia hana na fekafekau tokoua.

23 Kua kitia ai he asini e agelu a Iehova ne tu ke he puhala, mo e hana pelu kua aki ke he hana lima ti afe e asini mai he puhala, mo e fano ke he vao; ti ta e Palaamo e asini ke liuaki age a ia ke he puhala.

24 Ka e tu ai e agelu a Iehova ke he puhala apiapi ke he vaha loto he na ulu vine ko e pa maka foki ke he na fahi ua he puhala.

25 Ti kitia he asini e agelu a Iehova ti oho atu a ia ke he kau pa, ti mapita ai foki e hui a Palaamo ke he kaupa; ti liu ta foki e ia a ia.

26 Ti fano ai foki e agelu a Iehova mo e tu mai ke he mena pukilu, nakai ni fai puhala ke afe atu ki ai ke he fahi matau, po ke fahi hema.

27 Kua kitia he asini e agelu a Iehova, ti takoto ai a ia i lalo a Palaamo; ti tupu ai e ita a Palaamo, ti ta foki e ia e asini ke he akau.

28 Ti vevete e Iehova e gutu he asini, ti pehe ai a ia kia Palaamo, Ko e heigoa kia e mena kua eke e au kia koe kua ta lagatolu ai e koe au?

29 Ti pehe atu a Palaamo ke he asini, Ha ko e mena fakahogohogomanava mai a koe kia au; ane fai pelu foki au ke he haku lima po kua tamate e au a koe mogoho nai.

30 Ti pehe mai ai e asini kia Palaamo. Nakai kia ko e asini hau a au nai, kua heke ai e koe tali mai he eke a au māu ke hoko mai ke he aho nai? ko e haku a mahani kia ke eke pihia kia koe? Ti pehe atu a ia, Nakai.

31 Ti fakaala ai e Iehova e tau mata a Palaamo, ti kitia ai e ia e agelu a Iehova kua tu ke he puhala ha he lima hana hana pelu kua aki; ti tukutuku hifo ni a ia mo e fakaveli fakafohifo ai.

32 Ti pehe mai e agelu a Iehova kia ia, Ko e ha ne ta lagatolu ai e koe hau a asini? kitiala, ko au nai kua hau tuai au ke totoko atu kia koe, nukua kelea hau a mahani ki mua haku.

33 Ne kitia foki he asini au, mo e afe kehe ia au lagatolu ia; aua he afe kehe a ia ia au po kua keli tuai e au a koe, ka e fakamoui e au a ia.

34 Ti pehe atu a Palaamo ke he agelu a Iehova, Kua hala tuai au, ha kua nakai iloa e au kua tu mai a koe ke he puhala ke totoko mai kia au; ko e hanai kaeke kua kelea kia koe e mena kua eke e au to liu atu ni au.

35 Ti pehe mai ai e agelu a Iehova kia Palaamo, Kia o a mutolu mo e tau tagata, ka ko e kupu hokoia ke tala atu e au kia koe ke vagahau ai a koe. Ti o ai a Palaamo mo e tau iki a Palako.

36 Kua logona e Palako kua hau a Palaamo, ti fina atu a ia ke fonofono a ia ke he maga a Moapi, ko e fahi motu haia, ha ha he katofia a Aranona.

37 Ti pehe mai ai a Palako kia Palaamo, Nakai kia fakafano atu e au e falu kia koe ke ui atu kia koe? ko e heigoa e mena nakai hau ai a koe kia au? ko e moli kia nakai maeke kia au ke fakalilifu atu kia koe?

38 Ti pehe atu a Palaamo kia Palako, Kitiala, kua hau tuai au kia koe; kua maeke kia ainei ke vagahau atu au ha kupu taha? ko e kupu ni ke tuku mai he Atua ke he haku gutu, ke vagahau atu ai e au.

39 Ti o ai a Palaamo mo Palako ti hohoko atu ai a laua ki Kiriatausota.

40 Kua keli foki e Palako e tau povi mo e tau mamoe, ti fakafano atu ai e ia kia Palaamo mo e tau iki kua fakalataha mo ia.

41 Kua hoko atu ke he magaaho pogipogi, ti uta e Palako a Palaamo ti o hake ai a laua mo ia ke he tau mena tokoluga a Paala kia kitia ai e ia e tau tagata ke hoko atu ke he fahi atu ki tua.