Tau Fakatai
10 KO e tama tane iloilo kua fakafiafia e ia hana matua tane; ka ko e tama tane goagoa kua fakamamahi ai e ia e loto he hana matua fifine.
2 Nakai aoga e tanakiaga koloa he mahani kelea; ka ko e mahani tututonu kua laveaki e ia mai he mate.
3 Nakai toka e Iehova e tagata tututonu ke hoge; ka ko e manako he tau tagata mahani kelea kua tiaki ai e ia.
4 Kua nofogati a ia kua eke gahua mo e lima lolelole; ka to maukoloa ai a lautolu ne lima malolo.
5 Ko ia kua tanaki mena ke he tau mafana ko e tama tane iloilo a ia; ka ko ia kua mohepopo ke he tau ke helehele ai e tau saito, ko e tama ke fakatupu ai e mā a ia.
6 Ko e fakamonuina ha ha i luga he ulu he tagata tututonu; ka kua ufiufi ai ke he favale e tau gutu he tau tagata mahani kelea.
7 Kua fakaheke ai ke he fakamanatuaga he tagata tututonu; ka to popo ni e tau higoa he tau tagata mahanai kelea.
8 Ko ia kua loto iloilo kua talia e ia e tau poaki; ka ko ia ne laugutu goagoa, to veli ni a ia.
9 Ko ia kua fano mo e mahani hakohako, kua fano a ia mo e nakai fai mena ke haofia ai; ka ko ia kua fakakeukeu hana tau puhala, to fakakite ai a ia.
10 Ko ia kua kemo hana mata, kua fakatupu mamahi e ia; ko ia foki ne laugutu goagoa to veli ni a ia.
11 Ko e gutu he tagata tututonu ko e puna he moui haia; ka ko e gutu he tagata mahani kelea kua ufiufi ia ke he favale.
12 Ko e fakavihia kua fakatupu ai e taufetoko; ka ko e fakaalofa kua ufiufi ai e tau holifono oti kana.
13 Kua kitia e iloilo ke he tau laugutu he tagata lotomatala; ka ko e fahi kua lata mo e tua hana kua nakai fai manamanatu.
14 Ko e tau tagata iloilo kua tatanaki ai e lautolu e iloilo; ka kua tata e malaia ke he gutu he tagata goagoa.
15 Ko e koloa he tagata maukoloa ko e hana taue uka haia; ka ko e nofogati he tau tagata nonofogati ko e ha lautolu a malaia haia.
16 Ko e gahua he tagata tututonu to hiku ia ke he moui; ka ko e tau mena kua moua he tagata mahani kelea kua hiku ia ke he hala.
17 Ha ha he puhala he moui e tagata kua omaoma ke he tau mena kua fakaako ai; ka ko ia kua tiaki e akonaki, kua hehe a ia.
18 Ko ia kua ufiufi e fakavihia, ha ha ia ia e tau laugutu pikopiko; mo ia kua eke e tala kelea, ko e tagata goagoa ni a ia.
19 Ko e loga e kupu ti nakai noa ai mo e holifono; ka ko ia kua taofi hana tau laugutu ko e tagata iloilo a ia.
20 Ko e alelo he tagata tututonu, ko e ario mitaki ue atu haia; ko e loto he tagata mahani kelea, kua lata ia mo e mena fakateaga.
21 Ko e tau laugutu he tagata tututonu kua fagai aki e tau tagata tokologa; ka ko e tau tagata goagoa, kua mamate a lautolu he nakai fai manamanatu.
22 Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.
23 Kua eke mena kelea he tagata goagoa, tuga he eke mo mena ke kata ki ai; kua pihia foki e iloilo ke he tagata pulotu.
24 Ko e mena kua matakutaku ki ai e tagata mahani kelea, to hoko ia kia ia; ka ko e manako he tagata tututonu to foaki mai ia kia ia.
25 Tuga ne mole atu e hiohio, kua pihia foki e tagata mahani kelea ti nakai ha ha i ai a ia; ka ko e tagata tututonu ha ha i ai a ia ko e fakaveaga tukulagi.
26 Tuga e vineta ke he tau nifo, tuga ne ahua foki ke he tau mata, kua pihia e tagata teva kia lautolu kua fakafano atu a ia.
27 Ko e matakutaku kia Iehova kua fakatuleva ai e tau aho; ka ko e tau tau he tau tagata mahani kelea, to fakakuku ia.
28 Ko e amaamanaki he tagata tututonu ko e mena ke olioli ai haia; ka ko e tatali he tau tagata mahani kelea to noa ni a ia.
29 Ko e puhala a Iehova ko e taue ia kia lautolu kua mahani hakohako; ka ko e malaia ni kia lautolu kua mahani kelea.
30 Ko e tagata tututonu nakai fagahuatia tukulagi ni a ia; ka ko e tau tagata mahani kelea nakai nonofo a lautolu ke he motu.
31 Ko e gutu he tagata tututonu kua fua mai ai e iloilo; ka ko e alelo fakavai to helehele kehe ia.
32 Ko e tau laugutu he tagata mahani tututonu kua iloa e tau mena mitaki; ka ko e tau gutu he tau tagata mahani kelea kua vagahau ke he tau mena fakavai.