Teutaronome

19 KA fakaotioti ai e Iehova hau Atua e tau motu, ko e ha lautolu e kelekele kua foaki mai ai e Iehova hau a Atua kia koe, ka kua eke e koe mau, mo e nonofo ai ke he ha lautolu a tau maga mo e ha lautolu a tau fale;

2 Ti vevehe kehe e koe tolu e maga māu, ke he hau a motu kua foaki mai ai e Iehova hau a Atua ke eke māu.

3 Kia taute e koe e puhala māu, mo e vevehe tolu ai e tau fahi he hau a motu, kua foaki mai ai e Iehova hau a Atua mo tufaaga māu, kia fehola ki ai a lautolu oti kua keli tagata.

4 Ko e kupu foki hanai ke he keli tagata, kua hola ki ai, ke moui ai a ia, ko ia ke keli e tagata ne katofia mo ia mo e nakai kitia, ti nakai fai fi tuai kia ia;

5 Ka o a laua mo e tagata ne katofia mo ia ke tu akau ke he kavei, ti ta hifo ai e ia hana lima ke hio aki e akau ke he toki, ti oga atu e toki mai he kakau toki, ti lavea ai e tagata ne katofia mo ia, ti mate a ia; ko ia ni ke hola ke he taha he tau maga ia, ke moui ai;

6 Neke tutuli e ia kua eke ke lukutoto a ia ne keli e tagata, ka kua mamahi hana loto, mo e moua atu a ia, ha kua mamao e hala, ti keli e ia a ia; ka e nakai ni lata ke mate ai a ia, he nakai fai fi tuai a ia kia ia.

7 Ko e mena ia kua poaki atu ai e au kia koe, kua pehe atu, Kia vevehe kehe ai e koe mau tolu e maga.

8 Kaeke foki ke fakalaulahi e Iehova hau a motu, tuga ne omonuo ai a ia ke he hau a tau matua; mo e foaki mai e ia kia ia e kelekele oti ni ne vagahau mai ai e ia ke ta atu ke he hau a tau matua;

9 Kaeke ke taofi e koe ke eke ai e tau poakiaga oti nai kua poaki atu ai e au kia koe ke he aho nai, kia fakaalofa atu a koe kia Iehova hau a Atua, mo e fano ke he hana tau puhala ke he tau aho oti ni; ti lafi atu ai e koe tolu foki e maga, ke he tau maga na ne tolu;

10 Neke fakamaligi ai e toto he tagata nakai hala ke he hau a motu kua foaki mai ai e Iehova hau a Atua kia koe ke eke mo tufaaga māu, neke ha ia koe e hala ha ko e toto.

11 Ka ko e mena ka fai fi he tagata kia ia ne katofia mo ia, mo e takahao kia ia, ti tu atu a ia, mo e keli a ia ke mate, ti hola ai a ia ke he taha he tau maga ia;

12 Ti fakafano atu he tau patu he hana maga falu ke ta mai a ai he mena na, mo e tuku atu a ia ke he pule hana ne eke ke lukutoto, ke mate ai a ia.

13 Aua neke fakaalofa a koe kia ia, ka kia tuku kehe ai e koe e hala he toto he tagata nakai hala i Isaraela, ke mitaki.

14 Aua neke tolo e koe e katofia he tagata ne katofia mo koe, ne eke ai e lautolu ne aho mua mo katofia he hau a fonua kua eke mo tufaaga māu ke he motu kua foaki mai e Iehova hau a Atua kia koe ke eke māu.

15 Aua neke tu atu e tagata tokotaha ke talahau ai e mahani hepehepe he taha tagata, po ke hala, he tau hala oti kua hala ai a ia; ka ko e talahau he tokoua, po ke talahau he tokotolu ke fakamoli ai e mena ia.

16 Kaeke ke tu atu a taha talahau favale ke talahau ai e mahani kelea he taha tagata;

17 Ti tutu ai e na tagata tokoua ia ne ha i ai e taufetoko, ki mua a Iehova ki mua he tau ekepoa mo e tau fakafili, kua ha i ai ke he vaha ia;

18 Ti kumi fakamitaki ai he tau fakafili; kitiala foki, kaeke ko e tagata fatipiko, e tagata ne talahau, kua fatipiko ai a ia ke he hana matakainaga;

19 Ti eke ai e lautolu kia ia, tuga ne manatu a ia ke eke ke he hana matakainaga; ti tuku kehe ai e kelea ia koe.

20 Ti fanogonogo, mo e matakutaku ai a lautolu oti ne toe, ti nakai liu foki eke ai ha mena kelea pihia ke he hau a motu.

21 Aua neke fakaalofa atu a koe kia ia; ka kia totogi aki e moui ke he moui, ko e mata ke he mata, ko e nifo ke he nifo, ko e lima ke he lima, mo e hui ke he hui.