Tau Salamo

30 IEHOVA na e, to fakaheke atu au kia koe; ha kua futi hake e koe au; kua nakai tuku e koe a lautolu ne fai fi kia au ke hula kia au.

2 Iehova na e, ko e haku a Atua, ne kalaga au kia koe, ti fakamalolo mai e koe au.

3 Iehova na e, kua ta hake e koe au mai he tukuaga; kua fakamoui e koe au, neke hifo au ke he luo.

4 Kia lologo atu kia Iehova a mutolu, ko e hana tau tagata tapu, ti fakaheke atu a mutolu ha ko e fakamanatuaga he hana a tapu.

5 Ha ko e hana ita ko e magaaho kiliiku ia; ka ko e hana fakaalofa noa ko e moui ni haia; kua afe age e tagi ke he magaaho afiafi, ka ko e leo fiafia a pogipogi.

6 Ne pehe atu au ke he vaha ne monuina ai au, Nakai tuai fagahuatia au tukulagi.

7 Iehova na e, ko e hāu a fakaalofa noa kua fakatumau ai e malolo ke he haku a mouga; kua ufiufi e koe hāu a fofoga, ti fakaatukehe na au.

8 Iehova na e, kua ui atu au kia koe; kua ole foki au kia Iehova ke fakaalofa mai.

9 To aoga ha ha kia koe haku a toto ka hifo ai au ke he tukuaga? To fakaheke kia e kelekele kia koe? po ke fakailoa atu kia e ia hau a fakamoli?

10 Iehova na e, fanogonogo mai a koe mo e fakaalofa mai kia au; Iehova na e, kia eke a koe mo lagomatai haku.

11 Kua liu e koe haku a tagi tatuki ke he kolikoli: kua vevete e koe haku a ie talatala, ka e pipi e koe au ke he fiafia;

12 Kia lologo atu kia koe a ia ne lilifu, aua foki neke fakamate; Iehova na e haku Atua, to fakaheke atu au kia koe tukulagi ni.