1 Nofoaga he Tau Patuiki
23 KUA motua tuai a Tavita, mo e leva hana moui, ti eke ai e ia hana tama ko Solomona mo patuiki a Isaraela.
2 Kua fakapotopoto ai e ia e tau iki Isaraela oti, katoa mo e tau ekepoa mo e tau tagata Levi.
3 Kua totou e tau tagata Levi ke kamata mai ia lautolu ne tolugofulu e tau tau ha lautolu, mo lautolu ne fakamua atu; ko e katoatoa he tau tagata ne totou, ne tolugofulu ma valu e afe tagata.
4 Ko e uafulu ma fa e afe ia lautolu ne kotofa ke pule ke he gahua he fale a Iehova, mo e ono e afe ke eke mo tau takitaki mo e tau fakafili;
5 Ko e fa e afe tagata ke eke mo tau leoleo gutuhala, mo e fa e afe kua fakaheke atu kia Iehova, ke he tau akau fakatagi ne eke e au ke fakaheke atu ai.
6 Ne vevehe e Tavita a lautolu ke he tau veveheaga he tau tama tane a Levi, ko Keresona, ko Koato, mo Merari.
7 Ko e tau tagata Keresona; ko Latana, mo Semi.
8 Ko e tau tama tane a Latana; ko e tui ne mua ko Ieielu, ko Sitama foki, mo Ioelu, ko e tokotolu ia.
9 Ko e tau tama tane a Semi; ko Silomita, mo Hasielu, mo Harana, ko e tokotolu ia. Ko e tau tui ne mua ia a Latana.
10 Ko e tau tama tane a Semi, ko Iahata, ko Sisa, mo Ieusa, mo Peria. Ko e tau tama tane a Semi, ko e tokofa ia.
11 Ko Iahata ko e tui ne mua a ia, mo Sisa ne tokoua aki a ia; ka ko Ieusa, mo Peria nakai fai fanau tokologa a laua; ko e mena ia ne totou fakalataha a laua mo e magafaoa he matua tane ha laua.
12 Ko e tau tama tane a Koato; ko Amaramo, ko Isara, ko Heperona, mo Usialu, ko e tokofa ia.
13 Ko e tau tama tane a Amaramo; ko Arona, mo Mose; ne vevehe kehe a Arona kia fakatapu ai e ia e tau mena tapu ue atu, ko ia mo e hana tau tama tane tukulagi, ke huhunu ai e tau mena manogi ki mua a Iehova, ke fekafekau kia ia, mo e fakamonuina atu ke he tau tagata ke he hana higoa tukulagi.
14 Ka ko Mose ko e tagata he Atua, ne talahau ai hana tau tama tane ke he magafaoa a Levi.
15 Ko e tau tama tane a Mose; ko Keresoma, mo Eliesera.
16 Ko e tau tama tane a Keresoma; ko Supaelu ko e tui ne mua a ia.
17 Ko e tau tama tane a Eliesera, ko Rehapea ko e tui ne mua a ia. Ti nakai fai tama tane foki a Eliesera; ka e tokologa lahi e tau tama tane a Rehapea.
18 Ko e tau tama tane a Isara; ko Silomita, ko e tui ne mua a ia.
19 Ko e tau tama tane a Heperona; ko Ieria ko e tui ne mua, ko Amaria ne tokouaaki, ko Iahasielu ne tokotolu aki, mo Ikamamo ne tokofa aki.
20 Ko e tau tama tane a Usialu; ko Mika ko e tui ne mua, mo Isea ne tokoua aki a ia.
21 Ko e tau tama tane a Merari; ko Mahali, mo Muse. Ko e tau tama tane a Mahali; ko Eleasaro, mo Kiso.
22 Kua mate a Eleasaro, mo e nakai fai tama tane a ia, ka ko e tau tama fifine ni; ne, faihoana foki kia lautolu e tau tama tane a Kiso, ko e magafaoa ni a lautolu.
23 Ko e tau tama tane a Muse; ko Mahali, mo Eteru, mo Ieremota, ko e tokotolu.
24 Ko e tau tama tane ia a Levi ke he tau magafaoa he tau matua ha lautolu, ko e tau tui ne mua fakalata ke he totouaga ha lautolu, he totou a lautolu ke he tau higoa ha lautolu, ko lautolu ne eke e gahua ne fekafekau ai ke he fale a Iehova, ke kamata mai ia lautolu ne uafulu e tau tau ha lautolu, mo lautolu ne fakamua atu.
25 He pehe atu a Tavita, Ko Iehova ko e Atua a Isaraela, kua foaki mai e ia ke he hana motu ke okioki ai; kua haele tukulagi foki a ia i Ierusalema.
26 Ko e tau tagata Levi foki nakai tuai uta fano e lautolu e faituga, katoa mo e tau mena oti kua eke aki hana fekafekauaga.
27 Ha ko e mena totou e fanau a Levi ke lata mo e tau kupu fakamui a Tavita, ke kamata mai ia lautolu ne uafulu ha lautolu a tau tau, katoa mo lautolu ne fakamua atu;
28 Ha kua kotofa a lautolu ke fekafekau ke he tau tama tane a Arona ke he gahua he fale a Iehova, ke he tau lotopa, mo e tau poko, mo e fakamea ai e lautolu e tau mena tapu oti, ko e gahua ni he fekafekauaga he fale he Atua;
29 Mo e areto kua fakatokatoka ki mua, mo e falaoa mitaki ma e poa mena kai, ke eke aki foki e tau areto aleale nakai fakaea, po ke tau mena kua tunu ke he lapatoa lapalapa, po ke tau mena kua laku mo e puke lolo, katoa mo e tau fua ke fafati aki e tau mena puke oti, mo e tau fua ke fafati aki e tau mena loa;
30 Ke tutu foki he tau pogipogi oti ke fakaaue mo e fakaheke atu kia Iehova, kua pihia foki he tau afiafi;
31 Ke eke foki e tau poa huhunu oti kia Iehova, ke he tau sapati, mo e tau mahina pula fou, mo e tau galue, nakai noa ki mua a Iehova, kua totou ke lata mo e fakatufono kia lautolu;
32 Kia omaoma foki a lautolu ke he fekau he fale uta fano he tutuutaaga, mo e fekau he faituga, mo e fekau he tau tama tane a Arona ko e tau matakainaga ha lautolu, ke he gahua he fale a Iehova.