1 Nofoaga he Tau Patuiki
22 TI pehe atu a Tavita, Ko e fale hanai a Iehova, ko e fatapoa nai foki ke eke ai e tau poa huhunu ma Isaraela.
2 Ne pehe atu foki a Tavita ke fakapotopoto ai e tau tagata kehe kua nonofo ke he motu a Isaraela; mo e kotofa ai e ia e tau tagata talai maka ke talai e tau maka tātā ke ati aki e fale he Atua.
3 Ne taute foki e Tavita e tau lapatoa loga ke eke aki e tau fao ma e tau puipui he tau gutuhala, mo e tau mena ke tutaki aki; mo e tau apakula loga nakai fafati;
4 Mo e tau akau ko e tau arasi nakai totou; he ta mai he tau tagata Saitonu, mo e tau tagata Turo, e tau akau ko e tau arasi loga kia Tavita.
5 Ne pehe atu a Tavita, Ko e tama haku ko Solomona ko e tama tote a ia mo e lolelole a ia; ko e fale foki ke ta ma Iehova kua lahi, to tokoluga to talahaua mo e fulufuluola ke he tau motu oti; ko e mena ia kua taute mena ai e au. Ti taute ai e Tavita e tau mena loga ka e nakaila mate a ia.
6 Ti ui atu a ia kia Solomona hana tama, mo e pehe atu a ia kia ia ke ati e fale ma Iehova ko e Atua a Isaraela.
7 Ne pehe atu foki a Tavita kia Solomona, hana tama Ko au nai, ha ha he loto haku ke ta e fale ma e higoa a Iehova haku Atua;
8 Ka e hoko mai kia au e kupu a Iehova kua pehe mai, Kua fakamaligi toto fakalahi a koe, mo e tau ai a koe ke he tau tau lalahi; nakai ta e koe e fale ma e higoa haku, he lahi e toto kua fakamaligi e koe ke he kelekele ki mua haku.
9 Kitiala, to fanau ai e tama tane māu, to eke a ia mo tagata nofo fakatekiteki; to eke e au ke okioki a ia ia lautolu oti kua fai fi kia ia kua agaagai mai kia ia; ha ko e mena to ui hana higoa ko Solomona, to foaki atu foki e au kia Isaraela ke nonofo mo e mafola, mo e okioki ai ke he vaha ke patuiki ai a ia.
10 Ko ia ke ta ai e fale ma e haku higoa, to eke a ia mo tama haku, to eke foki au mo matua hana; to fakamau tukulagi foki e au e nofoaiki he hana kautu kia Isaraela.
11 Hanai, haku tama na e, kia ha ha ia koe a Iehova, kia monuina a koe, mo e ta ai e koe e fale ma Iehova hau a Atua, ke lata mo e hana kupu kia koe,
12 Ka ko e mena nai hokoia kia foaki atu e Iehova kia koe e pulotu mo e loto manamanatu, mo e poaki atu e ia kia koe kia Isaraela, kia omaoma a koe ke he fakatufono a Iehova hau a Atua.
13 Ti monuina a koe, kaeke ke omaoma a koe ke eke ai e tau fakatufono mo e tau fakafiliaga ne poaki mai ai e Iehova ia Mose kia Isaraela; kia fakamalolo a a koe mo e fakamanavalahi a; aua neke matakutaku a koe ti aua neke fakaatukehe.
14 Ti, kitiala, kua taute e au mo e haku a matematekelea, ma e fale a Iehova taha e teau afe taleni auro, mo e taha e afe afe taleni ario, mo e apakula mo e lapatoa nakai fafati he lahi ni; kua taute foki e au e tau akau mo e tau maka; ti lafilafi foki e koe ki ai.
15 Ha ha ia koe foki e tau tagata tokologa ke eke e gahua, ko e tau tagata talai mena, ko e tau tufuga ati maka, mo e tau tufuga eke akau, ko e tau tagata iloilo oti ke lata mo e tau gahua kehekehe oti ni.
16 Ko e auro, mo e ario, mo e apakula, mo e lapatoa, nakai totou. Kia matike a, mo e eke, kia ha ha ia koe foki a Iehova.
17 Ne poaki foki a Tavita ke he tau iki Isaraela oti ke lagomatai ke he tama hana ko Solomona, ne pehe atu,
18 Nakai kia ha ha ia mutolu a Iehova ha mutolu a Atua, kua fakatupu ai e ia e mafola ma mutolu ke he tau faahi oti? Ha kua tuku mai e ia e tau tagata he motu ke he lima haku; kua mahala foki e motu ki mua a Iehova, ki mua foki he motu hana.
19 Hanai, kia fakahagao atu e mutolu e tau loto ha mutolu, mo e tau agaga ha mutolu ke kumi kia Iehova ha mutolu a Atua; kia mamatike a, mo e ta e mutolu e faituga a Iehova ko e Atua, ke uta ki ai e puha he maveheaga a Iehova, mo e tau mena tapu he Atua, ke he fale ke ta ai ke he higoa a Iehova.