2 Nofoaga he Tau Patuiki

19 NE liu atu e patuiki a Iuta ko Iehosafata mo e monuina ke he hana fale i Ierusalema.

2 Ti hau ai e tagata kitekite ko Iehu ko e tama a Hanani ke feleveia mo ia, kua pehe mai foki a ia ke he patuiki ko Iehosafata, Kua lata kia ke lagomatai a koe kia lautolu ne mahani kelea, mo e fakaalofa atu a koe kia lautolu ne fakavihia a Iehova? Ko e mena ia kua hoko ai ki luga hau e ita mai ia Iehova.

3 Ka e pete ia kua moua e tau mena mitaki kia koe, he uta kehe e koe e tau tupua Asaira he motu, mo e taute e koe hau a loto ke fekafekau ke he Atua.

4 Ne nofo a Iehosafata i Ierusalema; ti liu atu a ia ke he motu ke kamata mai i Peresepa ke hoko atu ke he mouga ko Efaraimo, mo e liu aki mai e ia a lautolu kia Iehova ko e Atua he tau matua ha lautolu.

5 Ne kotofa foki e ia e tau fakafili ke he motu ke he tau maga nonofo taue oti a Iuta, ko e taha maga mo e taha maga.

6 Ne pehe atu foki a ia ke he tau fakafili, a mutolu ke he tau mena kua eke e mutolu; ha ko e mena nakai fakafili a mutolu mo e tau tagata ka ko Iehova, kua fakalataha a ia mo mutolu ke he tau mena kua fakafili ai.

7 Hanai, kia ha ha ia mutolu e matakutaku kia Iehova; kia fakaeneene ā mutolu mo e eke ai e mutolu; ha ko e mena nakai fai mahani hepehepe a Atua, ti nakai fakamailoga tagata a ia, po ke talia e ia e tau mena fakaalofa.

8 Ne kotofa foki e Iehosafata i Ierusalema falu he tau tagata Levi, mo e tau ekepoa, mo e tau tui ne mua a Isaraela ma e fakafiliaga a Iehova ma e tau mena foki ke taufetoko ai. Ti liliu atu a lautolu ki Ierusalema.

9 Ne poaki atu e ia kia lautolu, kua pehe atu, Kia eke pehe a mutolu mo e matakutaku kia Iehova, mo e fakamoli, mo e loto katoa.

10 Ko e tau mena oti ne taufetoko ai, kua ta mai kia mutolu mai he tau matakainaga ha mutolu, kua nonofo ke he tau maga ha lautolu, ke he toto mo e toto, ko e fakatufono mo e poakiaga, ko e kotofaaga mo e fakafiliaga, ti fakamafana e mutolu a lautolu, ke aua neke hala a lautolu kia Iehova, mo e hoko mai e ita kia mutolu mo e tau matakainaga ha mutolu; kia eke pihia e mutolu ti nakai hala ai a mutolu.

11 Kitiala, ko Amaria ko e ekepoa ne mua kua pule a ia kia mutolu ke he tau mena oti a Iehova; mo Sepetaio ko e tama a Isamaeli, kua pule a ia ke he magafaoa a Iuta, ke he tau mena oti he patuiki; ko e tau tagata Levi foki to eke a lautolu mo tau pule ki mua ha mutolu. Kia fakamalolo a mo e eke; to fakalataha foki a Iehova mo ia ne mahani mitaki.