Esera

8 KO e tau tui ne mua hanai mo e tohi he matohiaga ha lautolu ne o hake fakalataha ai a mautolu mo au i Papelonia ke he vaha ne patuiki ai a Aretaseta.

2 Mai he fanau a Fineaso, ko Keresoma; mai he fanau a Itamaro, ko Tanielu; mai he fanau a Tavita, ko Hatusa.

3 Mai he fanau a Sakania, he fanau a Parosi, ko Sakaria; ne totou ai foki mo ia taha e teau ti tokolimagofulu e taane.

4 Mai he fanau e Paka-moapi ko Elioenai ko e tama a Serakia, ne fakalataha foki mo ia ko e ua e teau e taane.

5 Mai he fanau a Sekania; ko e tama Iahasielu, ne fakalataha foki mo ia e tau tane ne tolu e teau.

6 Mai he fanau a Atini, ko Epeta ko e tama a Ionatana, ne fakalataha foki mo ia e tau tane ne tokolimagofulu.

7 Mai he fanau a Elama, ko Isaia ko e tama a Atalia, mo e tau tane ne fakalataha mo ia ko e tokofitugofulu.

8 Mai he fanau a Sefataia ko Sepataia ko e tama a Mekaeli, mo e tau tane ne fakalataha mo ia ko e tokohivagofulu.

9 Mai he fanau a Ioapo, ko Opetaia ko e tama a Ikielu, mo e tau tane ne fakalataha mo ia ko e ua e teau ti hogofulu ma valu e tagata.

10 Mai he fanau a Salomiti, ko e tama tane a Iosefaia, mo e tau tane ne fakalataha mo ia ko e taha e teau ti onogofulu e tagata.

11 Mai he fanau a Pepai, ko Sakaria ko e tama a Pekai, mo e tau tane ne fakalataha mo ia ko e tokouafulu ma valu.

12 Mai he fanau a Atigata, ko Iokana ko e tama a Hakatana, mo e tau tane ne fakalataha mo ia ko e taha e teau ti uafulu e tagata.

13 Ko e fanau a Atonikama, ko lautolu ne fakamui, ko e tau higoa foki ha lautolu hanai, ko Elipeleta, ko Ieielu, mo Semaia, mo e tau tane ne fakalataha mo lautolu ko e tokoonogofulu.

14 Ko e fanau a Pikevai; ko Utai mo Saputo: mo e tau tane ne fakalataha mo laua ko e tokofitugofulu.

15 Ne fakapotopoto ai e au a lautolu ke he vailele ne tafe atu ki Ahava; ti po tolu he nonofo ai a mautolu ke he mena ia; ne kumi foki e au ke he motu mo e tau ekepoa, ka e nakai moua ai ke he mena ia ha tagata he fanau a Levi.

16 Ti poaki age e au ke o mai kia au a Elisara, mo Arielu, mo Semaia, mo Elinatano, mo Iaripo, mo Elenatano, mo Natano, mo Sakaria, mo Mesulama, ko e tau iki a lautolu; katoa mo Iaripo, mo Elenatano ko e tau tagata iloilo a laua.

17 Ti fakafano age e au a lautolu kia Ito ko e iki ke he motu ko Kasipeia, ti tala age e au kia lautolu e tau kupu ke vagahau age ai a lautolu kia Ito, mo e hana tau matakainaga ko e tau Netini, ha ha i ai ke he motu ko Kasipeia, kia ta mai ai e lautolu kia mautolu falu ke fekafekau ai ke he fale he Atua ha mautolu.

18 Ti ta mai ai e lautolu kia mautolu, ke lata mo e lima fakaalofa he ha mautolu a Atua ha ha ia mautolu, ko e tagata loto manamanatu hifo mitaki mai he fanau a Mahali ko e tama a Levi, ko e tama ia a Isaraela; mo Serepeia, mo e hana tau tama tane, mo e hana tau matakainaga, ne tokohogofulu ma valu e tagata;

19 Mo Hasapea, ne fakalataha foki mo ia a Isaia mai he fanau a Merari, ko e hana tau matakainaga mo e tau tama tane ha lautolu ko e tokouafulu e tagata.

20 Mo e falu he vahega he tau Netini ne kotofa ai e Tavita mo e hana tau iki ke he gahua he tau tagata Levi, ko e tau Netini ne ua e teau ti uafulu e tagata, ne talahau ai a lautolu oti ke he tau higoa ha lautolu.

21 Ti fakamatala ai e au e fakakanopogi ke eke ai e mautolu ke he mena ia ke he kauvai he vailele ko Ahava, kia fakamamahi ai e mautolu a mautolu ki mua ha mautolu a Atua, ke kumi mai ia ia e puhala hako ma mutolu, mo e ha mautolu a tau tama ikiiki, mo e ha mautolu a tau mena oti.

22 Ha kua ma au ke ole mai he patuiki e kau mo e tau tagata heke solofanua ke lagomatai mai kia mautolu ha ko e tau tagata ke he puhala ke o ai a mautolu kua fai fi mai kia mautolu; ha kua tala age a mautolu ke he patuiki kua pehe age, Ko e lima he Atua ha mautolu kua ha i luga ha lautolu oti kua kumi atu kia ia, ke mitaki ai a lautolu; ka ko e hana mana mo e hana ita kua ha i ai i luga ha lautolu oti kua tiaki a ia.

23 Ti fakakanopogi a mautolu mo e kumi atu a mautolu ke he ha mautolu a Atua ha ko e tau mena ia, ti fanogonogo mai ai a ia kia mautolu.

24 Ti vevehe kehe ai e au tokohogofulu ma ua e iki he tau ekepoa, ko Serepaia, mo Hasapea, mo e tokohogofulu e matakainaga ha laua ne fakalataha ai mo lautolu.

25 Ti fafati ai e au kia lautolu e ario, mo e auro, mo e tau kapiniu, ko e tau poa ke he fale he ha mautolu a Atua ne ta age ai he patuiki, mo e hana tau pule, mo e tau iki ha ha ia ia, mo Isaraela oti ha ha i ai ke he mena ia;

26 Ne fafati atu e au ke he tau lima ha lautolu ono e teau ti limagofulu e taleni ario, mo e tau kapiniu ario ne taha teau e taleni, mo e taha teau e taleni auro;

27 Ko e tau kapiniu auro foki ne uafulu, ko e taha e afe tareki haia; mo e ua e kapiniu apa kula kikila mitaki, ne tatai mo e auro.

28 Ti pehe age au kia lautolu, Kua tapu a mutolu kia Iehova; kua tapu foki e tau kapiniu; ko e ario foki mo e auro ko e poa haia ne makai ki ai e tau loto he tau tagata ke ta atu kia Iehova ko e Atua he tau matua ha mutolu;

29 Kia mataala a a mutolu, mo e leveki ai ato fakafua atu ai e mutolu ki mua he tau iki he tau ekepoa, mo e tau tagata Levi, mo e tau iki ne mua a Isaraela, i Ierusalema, ke he tau poko he fale a Iehova.

30 Ti talia ai he tau ekepoa mo e tau tagata Levi e ario, mo e auro, mo e tau kapiniu, ne fafati, ke uta ai e lautolu ki Ierusalema ke he fale he Atua ha mautolu.

31 Ti o ai a mautolu he vailele ko Ahava ke he aho hogofulu ma ua he mahina fakamua ke o atu ki Ierusalema; ha ha i ai foki e lima he ha mautolu a Atua ki luga ha mautolu, mo e laveaki mai e ia a mautolu he tau lima ha lautolu kua fai fi mai kia mautolu, mo lautolu ne lamalamati mai kia mautolu ke he puhala.

32 Ne hohoko atu foki a mautolu ki Ierusalema, mo e tolu e aho he nonofo ai a mautolu.

33 Ko e aho fa foki ne fafati ai e ario, mo e auro, mo e tau kapiniu ke he fale he Atua ha mautolu ke he lima a Meremota ko e tama a Uria ko e ekepoa, ha ha i ai foki mo ia a Eleasaro ko e tama a Fineaso; ne fakalataha foki mo laua a Iosapata ko e tama a Iesua, mo Noataia ko e tama a Pinui ko e tau tagata Levi a laua.

34 Ne totou ai mo e fafati e tau mena oti ia, mo e tohi ai e fafati he tau mena oti ke he aho ia ni.

35 Ko lautolu ne o mai ai he paeaaga, ko e tau tagata ne fofo he tau ne eke ai e lautolu e tau poa huhunu ke he Atua a Isaraela, ko e tau povi tane ne hogofulu ma ua ha ko Isaraela oti, mo e tau mamoe tane ne hivagofulu ma ono, mo e tau punua mamoe ne fitugofulu ma fitu, mo e tau koti tane ne hogofulu ma ua, ko e poa ha ko e hala; ko e tau mena oti ia ko e poa huhunu haia kia Iehova.

36 Ne ta age foki e lautolu e tau poaki he patuiki ke he tau iki ne mua ne kotofa he patuiki, mo e tau iki ne pule ke he fahi mai nai he vailele, ti lagomatai ai e lautolu ke he motu, mo e fale he Atua.