Esekielu

30 NE hoko mai foki kia au e kupu a Iehova, kua pehe mai,

2 Ko e tama he tagata na e, kia perofeta age a, mo e pehe age a koe, Kua pehe mai e vagahau he Iki ko Iehova, Kia tagi fekapai ā a mutolu, Oi te fakaalofa ke he aho!

3 Ha kua tata mai e aho; kua tata mai e aho a Iehova, ko e aho ke fakamalumalu hifo e lagi; to eke ia mo vaha he tau motu kehe.

4 To hoko foki e pelu ki Aikupito; to ha i ai foki e matakutaku lahi i Aitiope ka veveli ai a lautolu kua keli Aikupito; to uta foki e lautolu e motu o tagata hana; to ulu foki hana tau fakaveaga.

5 Ko Aitiope, mo Futu mo Luti, katoa mo e tau tagata kehe oti, mo Kupu, mo e tau tagata he motu he maveheaga, to mamate a lautolu ke he pelu fakalataha mo lautolu.

6 Kua pehe mai e vagahau he Iki ko Iehova, Ko lautolu kua lagomatai ki Aikupito to veveli a lautolu; to mole foki hana malolo ne fakatokoluga ai a ia; ke kamata i Mikatolo ke hoko atu ki Sivena, to mamate ai a lautolu ke he pelu, kua pihia mai e Iki ko Iehova.

7 To eke foki a lautolu mo tau mena kua moumou fakalataha mo e tau motu kua eke mo tau mena kua moumou, to fakalataha foki hana tau māga mo e tau māga kua eke mo vao.

8 Ti iloa ai e lautolu ko au ni ko Iehova ka tuku atu e au e afi ki Aikupito, ti kalamutia ai foki a lautolu oti ne lagomatai kia ia.

9 Ko e aho ia to o atu ai e tau fekau haku ke he tau vaka, ke fakamatakutaku ai e tau tagata Aitiope kua nonofo fakahanoa ti hoko ai e matakutaku lahi kia lautolu, tuga he aho a Aikupito; ha ko e mena kitiala, kua hau a ia.

10 Kua pehe mai e vagahau he Iki ko Iehova, To fakaoti e au e motu o tagata a Aikupito ke he lima he patuiki a Papelonia ko Nepukanesa.

11 To takitaki a ia mo e hana tau tagata fakalataha mo ia, ko lautolu he tau motu ne matakutaku ki ai e tau tagata, ke fakaoti ai e motu; to aki e lautolu ha lautolu a tau pelu ki Aikupito mo e fakapuke ai e motu ke he tau tagata kua keli.

12 To fakapakupaku e au e tau vailele mo e fakafua atu e au e motu ke he tau lima he tau tagata mahani kelea; to eke foki e au e motu mo tau mena kua moumou ke he tau lima he tau tagata kehe, ko e motu mo e tau mena ne puke ai; ko au ko Iehova kua vagahau atu.

13 Kua pehe mai e vagahau he Iki ko Iehova, To fakaotioti e au e tau tupua, to eke e au ke fakahiku ai e tau tupua i Nofi; to nakai tuai ha i ai foki ha iki ke he motu ko Aikupito; to fakatupu ai foki e au e matakutaku ke he motu ko Aikupito.

14 To eke foki e au a Patarosi mo tau mena kua moumou, mo e tuku atu e au e afi ki Soana, mo e fakahoko atu e fakahala ki No.

15 To liligi atu foki e au haku e ita lahi ki luga a Sina, ko e malolo a Aikupito; mo e fakaotioti ai e au e motu o tagata i No.

16 To tuku atu foki e au e afi ki Aikupito; to mamahi lahi ai a Sina; to malipilipi a No; to ha i ai foki a lautolu kua fai fi mau ki Nofi ke he aho oti.

17 Ko e tau fuata foki a Avena, mo Pipeseta to mamate a lautolu ke he pelu; to o foki e tau maga ia ke he paeaaga.

18 To fakapouligia foki e aho i Tapenesa, ka papaki e au e lakau hahamo a Aikupito ke he mena ia to fakahiku ai foki e fakatoluga he hana malolo; to ufiufi foki a ia he aolagi, to o foki hana tau tamafine ke he paeaaga.

19 To fakahoko atu e au e fakahala ki Aikupito, ti iloa ai e lautolu ko au ni ko Iehova.

20 Ko e tau hogofulu ma taha, ko e mahina fakamua he tau, ko e aho fitu he mahina, ne hoko mai ai e kupu a Iehova kia au, kua pehe mai.

21 Ko e tama he tagata na e, kua papaki e au e lima a Farao ko e patuiki a Aikupito; ti kitiala, kua nakai pipi ke maulu ai; ti nakai age ki ai ha pipi ke pipi aki ke malolo ai ke toto aki e pelu.

22 Ko e mena ia kua pehe mai e vagahau he Iki ko Iehova, Kitiala, kua fai fi au ke he patuiki a Aikupito ko Farao, to pakipaki e au hana tau lima, ko e lima ne malolo, katoa mo ia ne mapaki; to fakato hifo foki e au e pelu mai he tau lima hana.

23 To fakamavehevehe e au a Aikupito ke he tau motu kehe, to fakapaea atu foki e au a lautolu ke he tau motu kehekehe.

24 Ka to fakamalolo e au e tau lima he patuiki a Papelonia, mo e ta age e au e pelu hāu ke he hana lima; ka to pakipaki e au e tau lima a Farao, ti oi ai a ia ki mua hana, tuga he oi he tagata kua kafokia ke mate.

25 To fakamalolo e au e tau lima he patuiki a Papelonia, ka ko e tau lima he patuiki a Aikupito ko Farao to tagatagato ia; ti iloa e lautolu ko au ni ko Iehova ka ta age e au e pelu haku ke he lima he patuiki a Papelonia, ti fakaolo atu ai e ia ke he motu ko Aikupito.

26 To fakamavehevehe atu e au a Aikupito ke he tau motu, mo e fakapaea atu e au a lautolu ke he tau motu kehekehe; ti iloa ai e lautolu ko au ni ko Iehova.