Esekielu

32 KO e tau hogofulu ma ua, ko e mahina hogofulu ma ua, ko e aho fakamua he mahina ne hoko mai ai kia au e kupu a Iehova, kua pehe mai,

2 Ko e tama he tagata na e, kia fati e koe e lologo moiofa ha ko e patuiki a Aikupito ko Farao, mo e pehe age a koe kia ia, Ne fakatai a koe ke he punua leona he tau motu, ka e tatai a koe mo e tanimo ke he vai ne oho atu a koe ke he tau vailele hāu, mo e fakakalepu ai e vai ke he tau hui hāu, mo e taholi e koe ha lautolu a tau vailele.

3 Kua pehe mai e vagahau he Iki ko Iehova, Ko e mena ia to fofola ai e au haku a kupega ki luga ia koe, ha ha i ai e fakapotopotoaga he tau motu loga, ti ta hake e lautolu a koe ke he haku a kupega.

4 Ti tiaki e au a koe ke he motu to liti atu e au a koe ke he fugakelekele, to fakanofo ai e au kia koe e tau manu lele oti, ti eke e au ke makona ai kia koe e tau manu he vao he lalolagi oti.

5 To tuku e au e tino hāu ki luga he tau mouga, mo e fakapuke ai e tau pahua ke he hau a tokoluga.

6 To fakamalū ai e au ke he toto hāu e motu ne kakau ai a koe, to hoko ni ke he tau mouga, to puke ai foki e tau vailele ia koe.

7 To ufiufi e au e lagi ka kua tamate ai e au a koe, to fakapouli foki e au hana tau fetu; to uufi e au e la ke he aolagi, nakai huhulu mai foki e mahina.

8 To fakapouli ai e au e tau maama kikila oti he lagi ki luga hāu, to tuku atu foki e au e pouli ke he hau a motu, kua pihia mai e Iki ko Iehova.

9 To fakamamahi ai foki e au e tau loto he tau motu loga, ka fakahoko atu e au hāu a malaia ke he tau motu kehe, ko e tau motu kehe foki nakai iloa e koe.

10 To fakaofo e au e tau motu loga ha ko koe, to matakutaku lahi ni e tau patuiki ha lautolu ha ko koe, ka ta feliuaki e au haku a pelu ki mua ha lautolu; to takitaha a lautolu mo e vivivivi mau ha ko e hana ni a moui ke he aho ka veli ai a koe.

11 Ha kua pehe mai e vagahau he Iki ko Iehova, To hoko atu kia koe e pelu he patuiki a Papelonia.

12 To fakaoti e au e motu o tagata ha ha ia koe ke he tau pelu he tau tagata malolo, ko lautolu he tau motu ne matakutaku ki ai e tau tagata, a lautolu oti; to moumou e lautolu e lilifu a Aikupito; to mahaikava foki e motu o tagata hana.

13 To fakaoti foki e au e tau manu oti hana mai he tau kau vai he tau vai lalahi; nakai kalepu ai foki ke he tau hui he tau tagata, nakai kalepu ai foki he tau mahina hui he tau manu.

14 Ti fakatoka ai e au e tau vai ha lautolu ke tavana, mo e fakatafe e au ha lautolu a tau vailele tuga ne puke lolo, kua pihia mai e Iki ko Iehova.

15 Ka eke e au e motu ko Aikupito mo tau mena kua moumou, mo e motu kua toka noa mo e tau mena ne puke ai, ka fakaoti e au a lautolu oti kua nonofo ai, ti iloa ai e lautolu ko au ni ko Iehova.

16 Ko e lologo moiofa ke lologo ai a lautolu ha ko ia; ko e tau tama fifine he tau motu to lologo moiofa ai a lautolu ha ko ia; to lologo moiofa ai a lautolu ha ko Aikupito, mo e hana motu o tagata oti, kua pihia mai e Iki ko Iehova.

17 Ko e tau hogofulu ma ua, ko e aho hogofulu ma lima he mahina ne hoko mai ai kia au e kupu a Iehova kua pehe mai,

18 Ko e tama he tagata na e, kia tagi aue a koe ha ko e motu o tagata a Aikupito, mo e liti hifo a lautolu ko ia katoa mo e tau tama fifine he tau motu lilifu ke he tau mena tokolalo he lalolagi, fakalataha mo lautolu ne o hifo ke he luo.

19 Kua mua a koe kia hai he fulufuluola? Hifo ā! kia takaveli ai fakalata fakalataha mo lautolu nakai peritome.

20 To veveli a lautolu fakalataha mo lautolu ne kelipopo ai ke he pelu; kua tuku atu a ia ke he pelu; kia toho atu a ia katoa mo e motu o tagata oti hana.

21 Ko lautolu ne mua ha lautolu a malolo ke he tau tagata toa to vagahau a lautolu mai loto i seoli kia ia, katoa mo lautolu ne lagomatai kia ia; kua o hifo a lautolu, kua takaveli ko lautolu ni nakai peritome, kua kelipopo a lautolu ke he pelu.

22 Ha i ai a Asuria mo e hana tau tagata oti; kua agaagai kia ia hana tau tukuaga; kua kelipopo a lautolu oti, kua mamate a lautolu he pelu.

23 Kua eke ai hana tau tukuaga ke he tau fahi he luo, kua agaagai foki hana tukuaga ke he hana tau tagata ne kelipopo a lautolu oti, ne mamate he pelu, ko lautolu ne fakatupu ai e matakutaku ke he motu he tau tagata momoui.

24 Ha i ai a Elama mo e hana motu o tagata oti kua agaagai ke he hana tukuaga, ne kelipopo a lautolu oti, kua mamate a lautolu he pelu, ne o hifo a lautolu mo e nakai peritome ke he tau mena tokolalo he kelekele; ne fakatupu e lautolu e matakutaku kia lautolu ke he motu he tau tagata momoui; ka e ha ha ia lautolu ha lautolu a mā fakalataha mo lautolu ne o hifo ai ke he luo.

25 Ne eke e lautolu hana a moheaga fakalataha mo lautolu ne kelipopo, katoa mo e hana motu o tagata oti; kua agaagai a ia ke he hana tau tukuaga; ko lautolu oti nakai peritome ne kelipopo a lautolu ke he pelu; he ha i ai e matakutaku kia lautolu ke he motu he tau tagata momoui; ne ha i ai foki kia lautolu ha lautolu a ma fakalataha mo lautolu ne o hifo ai ke he luo; ne tuku atu a ia fakalataha mo lautolu ne kelipopo.

26 Ha ha i ai a Meseko, mo Tupalu, mo e hana motu o tagata oti; kua agaagai kia ia ha lautolu a tau tukuaga; ko lautolu oti ko e tau tagata nakai peritome, ne kelipopo a lautolu ke he pelu; he ha i ai e matakutaku kia lautolu ke he motu he tau tagata momoui.

27 Nakai kia tatakoto a lautolu fakalataha mo lautolu ne malolo ne veveli kua nakai peritome a lautolu, ne o hifo a lautolu ki seoli mo e tau kanavaakau ha lautolu? ne tuku e lautolu e tau pelu ha lautolu ke uluga ai a lautolu ti ha i ai ha lautolu a mahani kelea ki luga he tau hui atua ha lautolu; he ha i ai e matakutaku kia lautolu ke he tau tagata malolo he motu he tau tagata momoui.

28 Ka to malipilipi a koe fakalataha mo lautolu kua nakai peritome, ti takoto ai a koe fakalataha mo lautolu ne kelipopo ke he pelu.

29 Ha ha i ai a Etoma, mo e hana tau patuiki, mo e hana tau iki oti kua tuku ai mo e tagata malolo ha lautolu fakalataha mo lautolu ne kelipopo ke he pelu; kua tatakoto a lautolu fakalataha mo lautolu kua nakai peritome, katoa mo lautolu ne o hifo ai ke he luo.

30 Ha ha i ai foki e tau iki he fahi tokelau, ko lautolu oti, katoa mo e tau tagata Saitonu oti, ne o hifo ai a lautolu fakalataha mo lautolu ne kelipopo; ko e matakutaku kia lautolu, ha ko e malolo ha lautolu kua ma ai a lautolu; kua tatakoto a lautolu fakalataha mo lautolu kua nakai peritome, fakalataha mo lautolu ne kelipopo ke he pelu, kua ha i ai foki kia lautolu ha lautolu a ma fakalataha mo lautolu ne o hifo ai ke he luo.

31 To kitia e Farao a lautolu, ti mafanatia ai a ia ha ko e hana motu o tagata oti ne kelipopo ke he pelu, ko Farao mo e hana kau oti, kua pihia mai e Iki ko Iehova.

32 Ha kua fakahoko atu ai e au e matakutaku kia au ke he motu he tau tagata momoui; to takoto ai a ia fakalataha mo lautolu kua nakai peritome, to fakalataha mo lautolu ne kelipopo ke he pelu, ko Farao katoa mo e hana motu o tagata oti, kua pihia mai e Iki ko Iehova.