Esekielu

39 KO koe foki ko e tama he tagata, kia perofeta age a kia Koku, mo e pehe age, Kua pehe mai a vagahau he Iki ko Iehova, Kitiala, to eke e au a koe mo fi haku ma Koku na e, ko e iki a Rosi, mo Meseko, mo Tupalu;

2 To fakaliu e au a koe mo e takitaki e au a koe, mo e ta hake e au a koe mai he fahi tokelau, mo e ta mai e au a koe mai he tau mouga a Isaraela;

3 To ta foki e au hāu a kaufana kia to kehe ai he hau a lima hema, mo e fakato kehe ai e au hāu a tau fana he hāu a lima matau.

4 To veli ai a koe ke he tau mouga a Isaraela, ko koe, mo e hāu a tau kau oti, mo e tau motu ha ha ia koe; to tuku atu e au a koe ke he tau manu lele favale kua tapakau kehekehe, mo e tau manu he vao, kia kai ai ni a koe.

5 To veli ni a koe ke he fuga kelekele; ha ko au ni kua vagahau atu e au, kua pihia mai e Iki ko Iehova.

6 To liti atu foki e au e afi kia Makoku, katoa foki mo lautolu kua nonofo fakahanoa ke he tau motu ne takai he tahi; ti iloa ai e lautolu ko au ni ko Iehova.

7 To fakailoa atu foki e au haku a higoa tapu ki loto he motu haku ko Isaraela; to nakai mafai foki au ke holitu ai haku a higoa tapu; to iloa foki he tau motu kehe ko au ni ko Iehova, ko ia ne Tapu a Isaraela.

8 Kitiala, kua hoko mai, kua oti he eke, kua pihia mai e Iki ko Iehova; ko e aho ni haia ne vagahau atu ai e au.

9 To o atu foki a lautolu kua nonofo ke he tau maga a Isaraela, mo e tafu e tau afi mo e huhunu ai e tau kanavaakau, ko e tau akau punuti, mo e tau akau pāpā, ko e tau kaufana foki, mo e tau fana, ko e tau tao foki, mo e tau tao ke velo, to tafu afi ai e lautolu ke hoko ke he tau fitu.

10 To nakai uta foki e lautolu e tau akau mai he vao, to nakai hio foki e lautolu e tau akau he vao motua; ha ko e mena to tafu afi ai e lautolu ke he tau kanavaakau; to fofo foki e lautolu e tau mena ha lautolu, to eke foki e lautolu mo tau mena ne moua he tau e tau mena ha lautolu ne eke mo tau mena ne moua he tau ha lautolu a tau mena, kua pihia mai e Iki ko Iehova.

11 Ko e aho ia to foaki age e au ke he mena ia e mena ke eke mo tukuaga ke he motu a Isaraela, ko e pahua ne o age ai e tau tagata ke he fahi uta he tahi, ti ponotia e puhala ke nakai maeke e tau tagata ke o age ai; to tanu foki e lautolu ke he mena ia a Koku mo e hana motu o tagata oti; to fakahigoa foki e lautolu e mena ia, Ko e pahua a Hamona Koku.

12 Ko e fitu e mahina to oti he tanu ai he magafaoa a Isaraela a lautolu, kia fakameā ai e kelekele.

13 To tanu ni he tau tagata oti he motu a lautolu; to eke foki ia mo mena ke talahaua ai a lautolu, ko e aho foki ke fakaheke ai he tau tagata kia au, kua pihia mai e Iki ko Iehova.

14 To kotofa foki e lautolu falu a tagata ke eke mo feua ha lautolu ke o fano mau ke he motu, ke fakalataha a lautolu mo lautolu ne o age ke tanu a lautolu ne toe ke he fuga kelekele, ke fakameā ai; ka mole atu e tau mahina fitu to kumikumi ai e lautolu.

15 Ka o age foki a lautolu kua o age ke he motu, ka kitia he taha e hui tagata, ti fakatu ai e ia e fakamailoga ke he mena ia, ato tanu ai e lautolu ne tanu tagata ke he pahua a Hamona-Koku.

16 To ui foki e higoa he maga ko Hamona. To fakameā pihia e lautolu e motu.

17 Ne pehe mai foki e vagahau he Iki ko Iehova, Ko koe, ko e tama he tagata na e, kia pehe age a koe ke he tau manulele kua tapakau kehekehe, mo e tau manu oti he vao, Kia fakapotopoto ai a mutolu, ti o mai ā, kia tolo mai ā a mutolu he tau fahi oti, ke he haku a keliaga kua eke e au ma mutolu, ko e keliaga lahi ke he tau mouga a Isaraela, kia kai ai a mutolu e tau tino mo e inu ai e toto.

18 To kai e mutolu e tau tino ha lautolu ne malolo, mo e inu e toto he tau iki he lalolagi, ko e tau mamoe tane, mo e tau punua mamoe, mo e tau koti tane, mo e tau povi tane, ko e tau manu gako i Vasana a lautolu oti.

19 To kai e mutolu e gako ato mamakona ai a mutolu, mo e inu e mutolu e toto ato konahia ai a mutolu, he keliaga kua keli ai e au a mutolu.

20 To mamakona ai a mutolu ke he laulau haku ke he tau solofanua, mo e tau kariota, mo e tau tagata malolo, katoa foki mo e tau tagata tau oti, kua pihia mai e Iki ko Iehova.

21 To fakakite atu foki e au haku a lilifu ki mua he tau motu kehe; to kitia foki he tau motu oti haku a fakafiliaga kua eke e au, mo e haku lima kua fakahoko atu e au kia lautolu.

22 To iloa ai foki he magafaoa a Isaraela, ko au ko Iehova ko e Atua ha lautolu, ke kamata mai he aho ia ti pihia ke he tau aho i mua.

23 To iloa foki he tau motu kehe, ne fakapaea atu e au e magafaoa a Isaraela ha ko e ha lautolu a tau mahani kelea, he hala a lautolu kia au, ko e mena ia ne ufiufi ai e au haku mata ia lautolu, mo e tuku atu a lautolu ke he tau lima ha lautolu ne fai fi kia lautolu; ti mamate ai a lautolu oti ke he pelu.

24 Ne eke e au kia lautolu ke lata mo e ha lautolu a kelea, mo ha lautolu a tau holifono, ti ufiufi foki e au haku a mata ia lautolu.

25 Ko e mena ia kua pehe mai e vagahau he Iki ko Iehova, To liuaki e au ainei e paeaaga a Iakopo, to fakaalofa foki au ke he magafaoa oti a Isaraela, to ita tafua foki au ha ko e haku a higoa tapu;

26 To uta fano ai foki e lautolu ha lautolu a mā, mo e tau holifono oti ha lautolu ne hala ai a lautolu kia au, ka nonofo fakatekiteki a lautolu ke he motu ha lautolu, to nakai ha i ai taha foki ke fakamatakutaku kia lautolu;

27 Ka liuaki mai e au a lautolu he tau motu kehe, mo e fakapotopoto mai ai e au a lautolu he tau motu ha lautolu ne fai fi kia lautolu, ka fakatapu ai foki au ia lautolu ki mua he tau motu kehe loga.

28 Ti iloa ai e lautolu ko au ko Iehova, ko e Atua ha lautolu, he fakapaea atu e au a lautolu ke he tau motu kehe, mo e fakapotopoto mai ai e au a lautolu ke he kelekele ni ha lautolu, mo e nakai toka foki e au taha ia lautolu ke he tau mena ia.

29 Ti nakai ufiufi foki e au haku a mata ia lautolu; ha kua liligi hifo e au haku Agaga ki luga he magafaoa a Isaraela, kua pihia mai e Iki ko Iehova.