Opetaia

Ko e Tohi a Opetaia

1 KO e fakakiteaga kia Opetaia. Kua pehe mai e vagahau he Iki ko Iehova ki Etoma; Kua logona e tautolu e tala mai ia Iehova, Kia tutu a a mutolu kia tatanaki atu a tautolu ke tau kia ia.

2 Kitiala, kua eke e au a koe mo motu fakateaga ke he tau motu, kua vihiatia lahi ni a koe.

3 Ko e fakatokoluga he hau a loto kua fakahehe ai a koe, ko koe kua nofo ke he tau poko maka he maka tumau; kua tokoluga e mena kua nofo ai a ia; kua pehe a ia ke he hana loto, Ko hai ke liti hifo au ke he kelekele?

4 Pete he hake a koe ki luga po ke aeto, pete foki he tuku e koe e fata hau ke he tau fetu, kua pehe mai a Iehova to liti hifo e au a koe he mena ia.

5 Ane mai kua o atu e tau kaiha kia koe, ane mai kua o atu e tau tagata fofo mena he po, (oi te! kua fakaoti ai a koe,) po kua nakai kia kaiha e lautolu ato lata ai e tau mena ma lautolu? Ane mai kua o atu kia koe e tau tagata faki fuhi vine po kua nakai kia toka e lautolu falu a venevene fuhi vine?

6 Oi te! kua kumi ni e tau mena a Esau! kua kumi hana tau mena uho ne galo.

7 Kua takitaki a koe ke he katofia he tau tagata oti ne eke ai e maveheaga mo mutolu, kua fakavai a koe, mo e kautu kia koe, he tau tagata ne nonofo fakamitaki mo mutolu; ko lautolu ne kai e tau mena kai hau kua tuku e lautolu e hele i lalo ia koe. Kua nakai ha ia ia ha manamanatu.

8 Kua pehe mai a Iehova, To nakai kia fakaoti ai e au ke he aho ia e tau tagata iloilo e Etoma, mo e fakaoti ai e au e loto manamanatu mai he mouga a Esau?

9 Timanu na e, to matakutaku hau a tau tagata toa, kia fakaoti ai hau a tau tagata oti mai he mouga a Esau he keli.

10 To ufiufi ai a koe he ma ha ko e hau a favale ke he matakainaga hau ko Iakopo; to fakahiku tukulagi foki a koe.

11 Ko e aho ne tu ai a koe fakafehagai mo ia, ko e aho ne uta ai he tau tagata kehe hana tau mena mo tau mena ne fofo he tau, ne huhu atu ai foki e tau tagata kehe ke he hana tau gutuhala, mo e eke ai e lautolu e vili ki Ierusalema, ha ha i ai a koe tuga e taha ia lautolu.

12 Ka e aua neke kitekite a koe ke he aho he hāu a matakainaga, ko e aho he hana matematekelea; aua neke fiafia foki a koe ke he fanau a Iuta ke he aho ka malaia ai a lautolu; ti ua vagahau fakahakehake ai a koe ke he aho matematekelea.

13 Aua neke hu atu a koe ke he gutuhala he haku a motu ke he aho kua malaia ai a lautolu; ua kitekite a koe, ko koe ni, ke he mamahi ha lautolu, ke he aho kua malaia ai a lautolu; ua fakaolo atu foki hau a tau lima ke he tau koloa ha lautolu ke he aho kua malaia ai a lautolu.

14 Aua neke tu foki a koe ke he mafegahala ke kelipopo ai hana tau tagata kua hao; ti ua tuku age e koe ke he tau motu kehe hana tau tagata kua toe ke he aho matematekelea.

15 Ha kua tata mai e aho a Iehova ke he tau motu oti; to eke kia koe tuga he eke e koe; to liu aki atu ni ke he ulu hau e tau mena ne eke e koe.

16 Ha ko e mena tuga he inu a mutolu i luga haku a mouga tapu, to inu mau pihia e tau motu oti, to inu lahi ni a lautolu, to eke a lautolu ke tuga he nakai ha i ai a lautolu.

17 Ka to ha i ai ke he mouga ko Siona a lautolu kua hao, to tapu foki ia; ko e magafaoa foki a Iakopo to eke ma lautolu e tau mena ni ha lautolu.

18 To eke foki e magafaoa a Iakopo mo afi, to eke foki e magafaoa a Iosefa mo afi puhopuho, ka to eke e magafaoa a Esau mo tau gutugutu saito; to huhunu foki e lautolu a lautolu, mo e fakaoti ai a lautolu; ti nakai toe ai ha tagata taha ke he magafaoa a Esau; ha kua vagahau mai ai a Iehova.

19 Ko lautolu foki ha ha he fahi toga to eke ma lautolu e mouga a Esau; ko lautolu foki ha ha he kelekele tatai to eke ma lautolu e motu he tau tagata Filisitia; to eke foki ma lautolu e kelekele a Efaraimo, mo e kelekele a Samaria; to eke foki a Kiliata, ma Peniamina.

20 Ko e paeaaga foki he kau nai he fanau a Isaraela ha ha i ai mo e tau tagata Kanana ke hoko atu ki Sarafata; ko e paeaaga foki a Ierusalema, ha ha i Sifarata, to eke ma lautolu e tau maga ke he fahi toga.

21 To o hake foki e tau fakamoui ke he mouga ko Siona, kia fakahala ai e mouga a Esau; to eke foki e kautu ma Iehova.