Esekielu

25 TI hoko mai kia au e kupu a Iehova, kua pehe mai,

2 Ko e tama he tagata na e, kia hagao atu a koe ke he fanau a Amoni mo e perofeta atu a koe kia lautolu;

3 Ti pehe atu a koe ke he fanau a Amoni, Kia fanogonogo mai ā ke he kupu he Iki ko Iehova. Kua pehe mai e vagahau he Iki ko Iehova, He pehe age a koe, Aha! ke he haku a faituga ne fakakelea ai, mo e kelekele a Isaraela he eke mo tau mena kua moumou, mo e magafaoa a Iuta he o a lautolu ke he paeaaga;

4 Ko e mena ia, kitiala, to tuku atu e au a koe ke he tau tagata mai he fahi uta ke eke mo tufaaga ma lautolu, to fakatu ai e lautolu e tau kolo ha lautolu ke he motu hau, mo e eke ai e tau fale ha lautolu ke he hau a motu; to kai ai foki e lautolu hau a tau fua, mo e inu ai e lautolu hau a puke huhu.

5 To tuku age foki e au a Rapa ke eke mo lotopa ma e tau kamela, mo e kelekele he fanau a Amoni ke eke mo mena ke tatakoto ai e tau fuifui mamoe; ti iloa ai e mutolu ko au ko Iehova.

6 Ha kua pehe mai e vagahau he Iki ko Iehova, Ne patipati e koe hau a tau lima, mo e pahu e koe hau a tau hui, mo e fiafia a koe, mo e vihiatia lahi ke he hau a loto ke he kelekele a Isaraela;

7 Ko e mena ia, kitiala, kua fakaolo atu e au haku lima ki luga hāu, to tuku age foki e au a koe ke eke mo mena ne moua he tau ke he tau motu kehe, to vevehe kehe e au a koe he tau motu, to fakamalaia foki e au a koe mai he atu motu; to fakaoti e au a koe; ti iloa ai e koe ko au ni ko Iehova.

8 Kua pehe mai e vagahau he Iki ko Iehova, Kua pehe mai a Moapi mo Seira, Kitiala, kua tatai e magafaoa a Iuta mo e tau motu oti.

9 Ko e mena ia, kitiala, to hafagi ai e au e fahi a Moapi ke he tau maga, ko e hana tau maga ke he hana tau katofia, ko e fulufuluola foki he motu ko Petesemota, ko Paalameona, mo Kiriataima;

10 To hafagi ai e au ke he tau tagata mai he fahi uta, mo e tuku atu e au fakalataha mo e fanau a Amoni ke eke mo tufaaga ha lautolu, kia nakai tuai manatu ai a Amoni ke he tau motu.

11 To fakahala foki e au a Moapi; ti iloa ai e lautolu ko au ni ko Iehova.

12 Kua pehe mai e vagahau he Iki ko Iehova, Ne lalago atu a Etoma ke he magafaoa a Iuta, mo e nofo a ia mo e hala, mo e taui atu e ia kia lautolu;

13 Ko e mena ia kua pehe mai e vagahau he Iki ko Iehova, To fakaolo atu e au haku lima ki luga a Etoma, mo e fakaotioti ai e au e tau tagata katoa mo e tau manu ha ha i ai; ti eke ai e au mo tau mena kua moumou, ke kamata mai i Timanu ke hoko atu ki Titana to mamate a lautolu ke he pelu.

14 To fakahoko foki e au e tau ki Etoma ke he tau lima he haku a motu ko Isaraela; to eke e lautolu ki Etoma ke lata mo e haku a ita, ke lata foki mo e haku a ita lahi; ti iloa ai e lautolu haku a lalago atu, kua pihia mai e Iki ko Iehova.

15 Kua pehe mai e vagahau he Iki ko Iehova, Ne taui atu he tau tagata Filisitia, ne lalago atu a lautolu mo e fakavihia he tau loto ke fakaoti ai he fai fi mau;

16 Ko e mena ia kua pehe mai e vagahau he Iki ko Iehova, Kitiala, to fakaolo atu e au haku a lima ki luga he tau tagata Filisitia, mo e fakaoti ai e au e tau tagata Kereti, mo e fakamahakava e au a lautolu ne toe ke he hala kau tahi.

17 To fakahoko atu e au kia lautolu e taui lahi mo e tau akonakiaga mo e ita, ti iloa ai e lautolu ko au ni ko Iehova, ka fakahoko atu e au kia lautolu haku a lalago atu.