Isaia

29 OI fakaalofa ki Arielu, ko Arielu, ko e maga ne nofo ai a Tavita, Kia lafilafi ai e taha tau mo e taha tau; kia eke mau ai foki e tau galue.

2 Ka to fakamamahi e au a Arielu; to ha ha i ai e momoko mo e mānu; to eke foki ia kia au ke tuga a Arielu.

3 To heapi au ke agaagai kia koe; to eke e au ke pa takai ai a koe he kau; to fakatutu atu foki e au e tau kolo ke tau kia koe.

4 To tuku a koe ki lalo, to vagahau a koe mai he kelekele, to leo tote mai hau a tau kupu mai he efuefu; to hoko mai foki e leo hau mai he kelekele tuga ne leo hana ha ha i ai e agaga talahau tuai; to leo kehe foki mai he efuefu.

5 Ti eke ai e motu o tagata kua fai fi kia koe ke tuga ne efuefu ikiiki; ko e motu o tagata kua matakutakuina foki to eke a lautolu ke tuga ne otaota saito kua havilia; to hoko fakalutukia mai ia ke he magaaho ke kemo ai e mata.

6 To ahi e Iehova Sapaota a koe mo e pakulagi, mo e mafuike, mo e tomumu lahi; ko e hiohio, mo e afa, mo e afi puhopuho ke fakaoti ai.

7 Ti eke ai tuga ne miti, ko e fakakiteaga ke he po, ke tuga foki e motu o tagata mai he tau motu oti kua tau mo Arielu, ko lautolu oti kua tau kia ia mo e hana tau kolo, katoa mo lautolu kua fakamamahi atu kia ia.

8 To eke ke tuga taha kua fia kai kua miti a ia, kitiala kua kai e ia; ti ala a ia, kua hoge ni a ia; tuga foki taha kua fia inu kua miti a ia, kitiala, kua inu e ia, ti ala a ia, kitiala, kua nakai fahia, kua fia inu ni a ia; to pihia ni e motu o tagata mai he tau motu oti kua tau ke he mouga ko Siona.

9 Kia tatali ā mutolu, mo e ofo a mutolu; kia olioli a mutolu, ka e matapouli a mutolu; kua konahia a lautolu, ka e nakai ko e kava.

10 Ha kua liligi atu e Iehova ki luga ha mutolu e agaga ke momohe popo ai a mutolu, kua pipi foki e ia ha mutolu a tau mata; kua ufiufi e ia e tau mata he tau perofeta katoa mo e tau iki ha mutolu, ko e tau tagata kitekite haia.

11 To eke foki e fakakiteaga he tau mena oti ia kia mutolu ke tuga e tau kupu he tohi kua fakamau fakamailoga; kua ta age e lautolu ke he taha kua iloa ke totou, kua pehe age, Totou mai la e koe e tohi nai; ka e pehe mai a ia, Nakai maeke ia au, ha kua fakamau fakamailoga.

12 Ti ta age ai e tohi kia ia kua nakai iloa ke totou, kua pehe age, Totou mai la e koe e tohi nai; ka e pehe mai a ia, Nakai iloa e au ke totou.

13 Ko e mena ia kua pehe mai e Iki, Kua fakatata mai kia au e motu nai ke he tau gutu ha lautolu, mo e fakaheke mai kia au ke he tau laugutu ha lautolu, ka ko e tau loto ha lautolu kua fakamamao a ia ia au, ko e ha lautolu a matakutaku kia au foki kua fakaako ai ke he tau poaki he tau tagata.

14 Ko e mena ia ni, kitiala, ko e eke ne fai e au e tau mana ke he motu nai, ko e tau mana ni, ko e tau mena foki ke ofo ai; to galo ni e iloilo he tau tagata iloilo ha lautolu, to mole atu foki e pulotu he ha lautolu a tau tagata pulotu.

15 Oi fakaalofa kia lautolu kua eke e tau lagatau hokulo ke fufu ia Iehova ha lautolu a tau pulega; kua eke ke he pouli ha lautolu a tau mena mo e pehe age a lautolu, Ko hai kua kitekite mai kia tautolu, kua kitia e hai foki a tautolu?

16 Ko e ha mutolu a liu kehe he tau mena ia. Ko e totou fakalataha kia e kelekele mo e tagata eke kapiniu kelekele? kia pehe e mena kua eke kia ia ne eke ai, Nakai eke ai e ia au, mo e pehe atu e mena kua taute kia ia ne tufugatia a ia, Nakai ni fai pulotu a ia?

17 Nakai kia toe tote kiliiku ti liu ai a Lepanona ke eke mo fonua talumelie, ke talahaua foki e fonua talumelie, ko e vao motua?

18 Ko e aho ia to logona ai e lautolu kua teliga tuli e tau kupu he tohi, to kitekite foki e tau mata ha lautolu ne matapouli, ha kua noa a lautolu mo e pouli mo e pouli kikio.

19 To tupu lahi ai e fiafia kia Iehova kia lautolu ne matematekelea; to olioli foki e tau tagata nonofogati kia ia ne Tapu i Isaraela.

20 Ha kua mole atu a lautolu ne favale, kua fakaoti e tau tagata fa vā, kua kelipopo foki a lautolu oti ne mataala ai ke eke e tau mena kelea.

21 Ko lautolu ne fakahala ai e tagata ha ko e hana kupu, mo lautolu ne tauhele ai e tagata kua taufetoko ke he gutuhala, mo e fakaliu kehe teao a ia ne mahani tututonu.

22 Hanai, kua vagahau mai pehe a Iehova, ko ia ne laveaki mai a Aperahamo, kua pehe mai ke he magafaoa a Iakopo, Nakai tuai fakama ai a Iakopo, to nakai tuai maaki tea foki hana mata.

23 Ha ko e mena ka kitekite atu a ia ke he hana fanau, ko e gahua he haku a tau lima, ki lota ia ia, to fakatapu e lautolu haku a higoa, mo e fakatapu e lautolu a ia ne Tapu ia Iakopo, to matakutaku foki a lautolu ke he Atua a Isaraela.

24 Ko lautolu ne hehe ke he tau loto ha lautolu, to iloa ai e lautolu e pulotu; ko e tau tagata foki ne loma to ako ai e lautolu ke iloilo.