Tau Salamo

141 IEHOVA na e, kua ui atu au kia koe, kia alumaki mai a koe kia au; kia fofoga mai ke he haku a leo ka ui atu au kia koe.

2 Kia tumau haku a liogi ke tuga ne tau mena manogi kua vela ki mua hāu; ko e nikiti ki luga he haku tau lima, kia tuga ne poa ia kua eke ke he afiafi.

3 Kia tuku e koe, Iehova na e, e leoleo ke he haku gutu, kia leveki e koe e gutuhala he haku tau laugutu.

4 Aua neke hagao atu haku loto ke he taha mena kelea, neke eke mena kelea au mo e hala fakalataha mo e tau tagata mahani kelea; aua foki neke kai e au ha lautolu a tau mena lolo.

5 Kia fahi au he tagata tututonu, ko e fakaalofa haia; kia akonaki mai foki e ia ko e puke lolo mo e ulu haia nakai tiaki he haku ulu; ha kua eke mau ni haku liogi ke totoko atu ke he tau mahani kelea ha lautolu.

6 To liti hifo ha lautolu a tau fakafili ke he mena tule; ti fanogonogo ai a lautolu ke he haku a vagahau, ha kua mitaki ia.

7 Kua tafola fano ha mautolu a tau huimotua ke he gutu he tukuaga, tuga ne gaafi kua vehevehe mo e ihiihi ke he kelekele.

8 Ka e hagao atu haku tau mata kia koe, ko e Iki na e Iehova; ko koe ni kua tua au ki ai, aua neke liligi e koe haku a moui.

9 Kia leoleo e koe au mai he hele ne tuku e lautolu maku, mai he tau matahele foki ha lautolu kua eke mahani kelea.

10 Kia puto e tau tagata mahani kelea ke he ha lautolu ni a kupega, ato hola leva ni au.