Mareko

15 KO e magaaho pogipogi ti pulega ai agataha e tau ekepoa ne mua, katoa mo e tau patu, mo e tau tohikupu, mo e fakapotopotoaga oti, kua lili e lautolu a Iesu, ti takitaki atu a ia, mo e tuku atu kia Pilato.

2 Ti hūhu age a Pilato kia ia, Ko e patuiki kia a koe he tau tagata Iutaia? Ti tala age ai a ia kia ia, kua pehe, Haia.

3 Ne hokotaki a ia he tau ekepoa ne mua e tau mena loga.

4 Ti liu foki hūhu age a Pilato kia ia, kua pehe age, Ai lea mai a koe he ha? Kitiala, e tau mena loga kua talahau mai e lautolu kia koe.

5 Ka e nakai tali atu a Iesu ha kupu taha; ko e mena ia kua ofo ai a Pilato.

6 Ko e tau galue oti kua vevete atu ai e ia kia lautolu ha tagata lili, ko ia ka ole e lautolu.

7 Ha ha i ai taha kua higoa ko Parapa, kua lili fakalataha mo ia e tau fakafualoto, ne keli tagata foki ke he fakafualoto ne eke.

8 Ti tauhea atu ai e moto tagata, mo e kamata ke tala age kia ia, kia eke e ia kia lautolu, tuga hana mahani.

9 Ti tali age ai a Pilato kia lautolu, kua pehe, Loto nakai a mutolu ke vevete atu e au kia mutolu e patuiki he tau tagata Iutaia?

10 Ha kua iloa e ia ko e mahekeheke ne tuku atu ai he tau ekepoa ne mua a ia.

11 Ka ko e tau ekepoa ne mua, kua fakalagalaga e lautolu e moto tagata, kia vevete mai e ia a Parapa kia lautolu ka e tokai a Iesu.12 Ti liu foki tala age a Pilato kia lautolu, kua pehe age, Ti kua loto a mutolu ke ha ke eke e au kia ia kua talahaua e mutolu, ko e patuiki he tau tagata Iutaia?

13 Ati liu foki tauhea a lautolu, Kia fakasatauro a a ia.

14 Ka e pehe age a Pilato kia lautolu, Ko e heigoa e mena kelea kua eke e ia? Ti au atu ai he tauhea a lautolu, Kia fakasatauro a a ia.

15 Kua loto a Pilato ke fakalotomafola e tau tagata, ti vevete atu e ia a Parapa kia lautolu; ti tuku atu e ia a Iesu ka kua oti he fahi a ia, kia fakasatauro.

16 Ti takitaki atu he kau a ia ki fafo ke he fale, ko e fale he iki a ia, kua fakapotopoto ai foki e lautolu e kau katoa.

17 Ti fakatapulu e lautolu a ia ke he tapulu kula uhi, kua fakavihi foki e foufou ke he tau akau fotofoto, mo e fakafoufou aki a ia.

18 Ti kamata ai a lautolu ke fakaalofa atu kia ia, kua pehe age, Fakaalofa, ko e patuiki he tau tagata Iutaia na e!

19 Ne ta foki e lautolu hana fufuga ke he kaho, ti tauanu kia ia, ti fakatokotui mo e hufeilo kia ia.

20 Kua oti tuai he va e lautolu a ia, ti vevete kehe ai e lautolu e tapulu kula uhi, mo e fakatapulu a ia ke he tau tapulu hana, ti takitaki atu a ia kia fakasatauro.

21 Kua fina age e taha tagata ko Simona ko e Kurene, ne hau he tutakale, ko e matua foki ia a Alesana mo Rufo; kua fakamakamaka a lautolu kia ia, kia fua e ia hana satauro.

22 Ti uta e lautolu a ia ki Kolokota, ko e hana kakano ka fakamatala, Ko e mena ne toka ai e tau ulupoko.

23 Ne age foki e lautolu kia ia e uaina kua fiofio mo e muro ke inu ai; ka e nakai talia a ia.

24 Ti kua fakasatauro e lautolu a ia, ti tufatufa e lautolu hana tau tapulu, mo e eke ai e vili, kia kitia ai e mena he tagata.

25 Ko e magaaho tolu ne fakasatauro ai e lautolu a ia.

26 Kua tohi foki e tohi he mena kua talahau ai kia ia, KO E PATUIKI HE TAU TAGATA IUTAIA.

27 Ne fakasatauro foki e lautolu fakalataha mo ia tokoua e tagata fofo mena, ko e taha ke he fahi matau hana, ko e taha foki ke he fahi hema hana.

28 Kua fakamoli ai e Tohi, kua pehe, Kua totou fakalataha a ia mo e tau tagata holifono.29 Ko lautolu foki ne o age ai kua vagahau kelea a lautolu kia ia, ti luelue ha lautolu a tau ulu, mo e pehe age, Fiu! ko koe na ne ulu e faituga mo e eke foki ke he tolu e aho.

30 Ati fakamoui a e koe a koe, mo e hifo mai he satauro.

31 Kua pihia foki mo e tau ekepoa ne mua, kua va a lautolu fakalataha mo e tau tohikupu, kua pehe age, Kua fakamomoui e ia e falu a tagata, ka e nakai maeke ia ia ke fakamoui e ia a ia.

32 Kia hifo mai a he satauro mogoho nai e Keriso ko e Patuiki a Isaraela kia kitia ai e tautolu mo e talia ai. Ko laua foki ne fakasatauro fakalataha mo ia kua vagahau kelea a laua kia ia.

33 Kua hoko ke he magaaho ono, ti pouli ai e motu oti ni kua hoko ke he magaaho hiva.

34 Ko e magaaho hiva, kua hea ai a Iesu mo e leo lahi, kua pehe atu, Eloi, Eloi, lama sapatani? Ko e hana kakano ka fakamatala, Haku Atua na e, haku Atua na e, ko e heigoa e mena kua tiaki mai ai e koe au?

35 Kua logona ai he falu ne tutu ai, kua pehe a lautolu, Kitiala, kua ui a ia kia Elia.

36 Ti poi ai taha, kua fuifui e omomi ke he vineta, kua tuku ke he kaho ti fakainu aki a ia, kua pehe age, Tokai a, to kitia e tautolu, po ke ne hau nakai a Elia ke ta hifo a ia.

37 Kua hea a Iesu, mo e leo lahi, ati matulei ai a ia.

38 Ati maheua ai e ie he puipui he faituga, kua kamata hifo i luga, kua hoko ke he kelekele.

39 Ko e takitaki he tokoteau, ne tu ai ki mua hana, kua kitia e ia kua hea pihia a Iesu, ti matulei ai, ti pehe age a ia, Ko e moli, ko e Tama he Atua e tagata nai.

40 Ha i ai foki e tau fifine, ha ne mamata mamao age, ha i ai foki ia lautolu ko Maria ko e Makatala, mo Maria e matua fifine a Iakopo tote mo Iose, katoa mo Salome;

41 Ko lautolu ia ne mumui atu kia ia ka kua ha i Kalilaia a ia, mo e fekafekau kia ia, katoa mo e falu a fifine tokologa, ko lautolu ne o hake fakalataha mo ia ki Ierusalema.

42 Kua hoko ke he afiafi, (ha ko e aho ia ke taute mena ai, ko e aho ia he fahi atu he sapati,)

43 Ti fina age ai a Iosefa ko e Aramataia, ko e taha ia he tau patu lilifu, ko ia foki taha ne talifaki ke he kautu he Atua, kua fano fakamalolo atu a ia kia Pilato, mo e ole atu ai e tino a Iesu.

44 Ati ofo ai a Pilato he matulei vave a ia; kua ui atu a ia ke he takitaki he tokoteau, mo e hūhu atu ki ai, po kua leva nakai hana matulei.

45 Kua iloa e ia he takitaki he tokoteau, ti age ai e tino kia Iosefa.

46 Ne fakafua foki e ia e ie lino, kua ta hifo foki a ia mo e taute ke he ie lino, ti tuku a ia ke he tukuaga ne tuki he kaumaka, kua fuluhi atu foki e maka ke he gutu he tukuaga.

47 Kua kitekite foki a Maria ko e Makatala, mo Maria e matua fifine a Iose, ke he mena ne tuku ai a ia.