Esoto

21 KO e tau kupu hanai ke fakafili ai ke tuku age e koe kia lautolu;

2 Ka fakatau e koe e fekafekau Heperu ti ono ni e tau ke fekafekau ai a ia; ka ko e tau fitu kia toka noa ai e koe a ia ke fano.

3 Kaeke kua tokotaha a ia he hau, kia fano tokotaha a ia; kaeke kua faihoana a ia, kia o a laua mo e hana hoana.

4 Kaeke kua āge hana iki e hoana kia ia, ti fanau mai e ia māna e tau tama tane po ke tau tama fifine, kia toka ai ke he iki hana e hoana mo e hana fanau, ka e fano a ia tokotaha ni.

5 Kaeke ke vagahau fakatonu mai e fekafekau, Kua fakaalofa au ke he haku iki, mo e haku hoana, mo e haku fanau, nakai ni fano kehe au;

6 Ti uta he iki hana a ia ke he tau fakafili; to uta foki a ia ke he pahala po ke pou he gutuhala; ti huki ai hana iki e teliga hana ke he huki, ti fekafekau muatua a ia kia ia.

7 Kaeke ke fakatau he tagata hana tama fifine ke eke mo fekafekau fifine, aua neke fano kehe a ia tuga ne fano e tau fekafekau tane.

8 Kaeke kua kelea a ia ke he manatu he hana iki, ne fakatutane ki ai, kia toka e ia ke liu foki fakatau a ia he hana faoa; nakai tuai pule a ia ki ai ke fakatau a ia ke he motu kehe, ha kua fakavai e ia a ia.

9 Kaeke foki ke fakatutane a ia ke he hana tama tane, kia eke a ia kia ia ke tuga e tau tama fifine hana.

10 Kaeke ke liu faihoana foki a ia ke he taha, kia āge mau e ia hana mena kai, mo e hana tau tapulu, mo e mahani kua lata ke he tane mo e hoana.

11 Kaeke ke nakai eke e ia e tau mena na ne tolu kia ia, ti fano noa a ia, nakai āge ha tupe.

12 Ko ia ne keli e tagata ti matepopo, to kelipopo ni a ia.

13 Kaeke ko e mena nakai takahao a ia, ka e tuku atu ni he Atua a ia ke he hana lima; to kotofa ni e au māu taha mena ke hola a ia ki ai.

14 Kaeke ke fakatokoluga e tagata ke he taha, mo e kelipopo a ia ke he taha lagatau, kia uta kehe e koe a ia he haku a fatapoa kia matepopo ai a ia.

15 Ka keli he taha hana matua tane po ke hana matua fifine, to kelipopo e tagata ia.

16 Ko ia ke kaiha e tagata mo e fakatau a ia, po ke moua a ia ha ia ia, to kelipopo e tagata ia.

17 Ko ia ke kaialu ke he hana matua tane po ke hana matua fifine, to kelipopo e tagata ia.

18 Kaeke ke latau e tau tagata, ti keli ai he tagata e taha tagata ke he maka, po ke hana lima; ti nakai matepopo a ia, ka e takoto ni ke ha hana mohega;

19 Ka matike a ia, mo e evaeva ki fafo mo e hana tokotoko, ti hao ai a ia ne keli a ia, ka e totogi e ia e tau aho ne takoto ai a ia, mo e fakamalolo ni a ia.

20 Kaeke ke fahi he tagata hana fekafekau tane, po ke hana fekafekau fifine ke he tokotoko ti mate hifo ai a ia ki lalo hana lima, to fakahala ni e tagata ia.

21 Kaeke ke moui a ia po taha po ke po ua aua neke fakahala a ia; ha ko ia ni ko e hana tau tupe.

22 Kaeke ke latau e tau tagata, ti pakia ai e taha fifine fatu, ti to ai hana tama, ka e nakai tupu ha mamahi kia ia, to fakahala ni a ia, to pule he tane he fifine ke he mena ke fakahala aki a ia; to āge e ia e totogi kua kotofa he tau fakafili;

23 Kaeke ke tupu e mamahi ke he fifine, to totogi ni e moui ke he moui;

24 Ko e mata ke totogi aki e mata; ko e nifo ke totogi aki e nifo; ko e lima ke totogi aki e lima; ko e hui ke totogi aki e hui;

25 Ko e vela ke totogi aki e vela; ko e motu ke totogi aki e motu; ko e ta ke totogi aki e ta.

26 Kaeke ke ta he tagata e mata he hana fekafekau tane, po ke mata he hana fekafekau fifine, ti poko ai, kia toka noa a ia ke fano ke totogi aki hana a mata.

27 Kaeke ke ta e ia e gutu, ti to ai e nifo he hana fekafekau tane, po ke nifo he hana fekafekau fifine, kia toka noa a ia ke fano ke totogi aki hana nifo.

28 Kaeke ke hoka he povi e tane po ke fifine ti matepopo ai, kia tauliti maka e povi ia ke matepopo; ka e aua neke kai hana kakano, ka ko e tagata hana e povi to hao a ia.

29 Kaeke kua mahani e povi ia ke hoka ke he tau aho ne mole, ti fakailoa ai ke he tagata hana e povi, ka e nakai ni leoleo e ia; ka mate ai ha tane po ke fifine, kia tauliti maka e povi ia ke matepopo, to mate foki mo e tagata hana e povi.

30 Kaeke kua kotofa kia ia e palepale ke ta mai mo lukutoto, to āge e ia e palepale he hana moui ko e tau mena oti ni ka kotofa kia ia.

31 Kaeke ko e tama tane kua hokaia, po ke tama fifine kua hokaia, to eke ni kia ia ke tuga e fakafiliaga nai.

32 Kaeke ke hoka he povi e fekafekau tane po ke fekafekau fifine, to āge ke he hana iki e tau sikeli ario ne tolugofulu, ka ko e povi to tauliti maka a ia ke matepopo.

33 Kaeke ke fufuke he tagata e luo, po ke keli he taha e luo, ka e nakai ufiufi, ti to ki ai e povi po ke asini,

34 To totogi he tagata hana e luo, to āge e ia e tau tupe kia ia hana e manu, ka e eke ne ia e manu kua mate māna.

35 Kaeke ke tulei he povi he taha tagata e povi he taha, ti mate ai ni; to fakatau e povi kua moui, ti vevehe ua kia laua e tau tupe, to vevehe ua foki kia laua e povi kua mate.

36 Kaeke kua iloa kua mahani e povi ia ke hoka ke he tau aho ne mole, ka e nakai leoleo he tagata hana e povi, to totogi atu ne ia ko e povi ni ke totogi aki e povi, ka e eke māna e povi kua mate.