Tau Salamo

22 HAKU Atua na e, haku Atua na e, ko e heigoa e mena ne tiaki mai ai e koe au, he fakamamao a koe mo e haku a fakamouiaga, ko e tau kupu foki he haku a fakatutū?

2 Haku Atua na e, kua ui atu au kia koe ke he aho, ka e nakai fanogonogo mai a koe; katoa foki mo e po nakai okioki ai au.

3 Ka ko koe, kua tapu a koe, kua nofo ki luga he tau fakahekeaga a Isaraela.

4 Ne tua e tau matua ha mautolu kia koe; ne tua a lautolu, ti laveaki e koe a lautolu.

5 Ne kalaga atu a lautolu kia koe, ti laveaki ni a lautolu; ne tua a lautolu kia koe ti nakai fakamā a lautolu.

6 Ka ko au, ko e kelemutu ni au, ka e nakai ko e tagata; kua fakalialia au he tau tagata, mo e vihiatia au he motu.

7 Kua va mai kia au e lautolu oti kua kitekite mai; kua fakamaga ha lautolu a tau gutu, kua luelue ha lautolu a tau ulu, kua pehe mai,

8 Ne falanaki a ia kia Iehova; kia fakamoui e ia a ia; kia laveaki e ia a ia ha kua fiafia a ia kia ia.

9 Ha ko koe ni ne fakafanau au mai he manava, ko koe nakai haofia ai au ka kua kai huhu au he haku a matua fifine.

10 Ne tuku atu au kia koe tali haku a fanau mai, ko koe ni ko e haku Atua tali he nofo au ke he manava he haku a matua fifine.

11 Aua neke tu mamao ia au, ha kua tata mai e matematekelea; ha kua nakai fai lagomatai.

12 Kua agaagai au he tau povi tane loga; ko lautolu ne malolo i Vasana kua pa takai mai kia au.

13 Kua fakamaga ha lautolu a tau gutu kia au, tuga ne leona kua hēhē manu mo e ko.

14 Kua liligi au tuga ne puke vai, kua takōkō haku a tau huimotua oti; ko e haku a atefua tuga ne pili ia, kua faliu puke vai ki loto he haku manava.

15 Kua mago haku a malolo tuga ne kapa kapiniu, kua pili foki haku alelo ke he haku a gutu; kua tuku hifo e koe au ke he efuefu he mate,

16 Ha kua pa takai au he tau kuli; kua puipui au he moto tagata mahani kelea; kua huki e lautolu haku tau lima, mo e haku tau hui.

17 Kua maeke ia au ke totou haku a tau huimotua oti kana; ka ko lautolu kua kitekite mai, mo e matamata kia au.

18 Kua tufatufa e lautolu haku tau tapulu ma lautolu, ti kua eke e lautolu e vili ke he haku a tapulu tino.

19 Ka ko koe, Iehova na e, aua neke tu mamao a koe; haku malolo na e, kia fakaave mai ke lagomatai kia au.

20 Kia laveaki mai e koe au mai he pelu, kia laveaki au ne tokotaha mai he lima he kuli

21 Kia fakamoui au mai he gutu he leona; kia fanogonogo mai foki a koe kia au mai he tau hoe he tau rema.

22 To talahau atu e au hāu a higoa ke he haku a tau matakainaga; to fakaheke atu au kia koe ki mua he fakapotopotoaga.

23 Ko mutolu ne matakutaku kia Iehova, kia fakaheke atu kia ia; ko mutolu ko e fanau oti a Iakopo, kia fakaheke atu kia ia; ko mutolu, ko e fanau oti a Isaraela, kia matakutaku a mutolu kia ia.

24 Ha kua nakai fakateaga a ia, ti nakai fakavihia foki e ia e matematekelea he tagata matematekelea; ti nakai haga kehe e ia hana fofoga ia ia; ne tagi atu a ia kia ia, ti fanogonogo mai ai a ia ki ai.

25 Ko koe ni ke fakaheke au ki ai ki mua he fakapotopotoaga lahi; to ta atu foki e au ki mua ha lautolu ne matakutaku kia koe e tau mena ne omonuo ai au;

26 To kai ai e lautolu ne fakatokolalo, mo e mamakona ai; to fahaheke atu kia Iehova e lautolu ne kumi kia ia; to fakamanavalahi a mutolu tukulagi.

27 To manamanatu mo e liliu kia Iehova e tau kala oti he lalolagi; to hufeilo ki ho mua e tau magafaoa oti he tau motu kehe.

28 Ha ko e mena ha ia Iehova e kautu; kua pule a ia ke he tau motu kehe.

29 To kai mena, mo e hufeilo kia ia a lautolu oti kua gako ke he lalolagi; to fakatokotui ki mua hana a lautolu oti kua hifo ke he kelekele, katoa mo ia kua nakai fakamoui e ia a ia.

30 To fekafekau kia ia e fanau; to talahaua a lautolu ko e taha hau ia ma e Iki.

31 To o mai a lautolu, mo e fakailoa hana tututonu ke he motu nakala fanau mai, ko ia ni ne eke.