1 Tau Patuiki
8 TI fakapotopoto ai e Solomona e tau patu a Isaraela, mo e tau tupuna oti he tau magafaoa, ko e tau iki he tau magafaoa he tau matua he fanau a Isaraela, ke he patuiki ko Solomona i Ierusalema, kia uta e lautolu e puha he maveheaga a Iehova mai he maga a Tavita ko Siona haia.
2 Ti fakapotopoto mai e tau tagata Isaraela oti ke he patuiki ko Solomona ke he galue ke he mahina ko Etanima ko e mahina fitu haia.
3 Ne o mai e tau patu oti a Isaraela, ti uta he tau ekepoa e puha.
4 Kua ta hake e lautolu e puha a Iehova, mo e fale utafano he tutuutaaga, mo e tau mena tapu oti ni ha ha i ai ke he fale utafano; kua ta hake ni he tau ekepoa mo e tau tagata Levi e tau mena ia.
5 Ko e patuiki ko Solomona mo e fakapotopotoaga oti a Isaraela ne fakapotopoto mai ai kia ia, ha ha i ai a lautolu mo ia ki mua he puha, kua eke poa ai e lautolu ke he tau mamoe, mo e tau povi, nakai maeke ke talahau, ti nakai maeke ke totou ai, he loga lahi ni.
6 Ti uta he tau ekepoa e puha he maveheaga a Iehova ke he mena ke toka ai a ia, ko e mena ke vagahau mai ai, ha ha he fale, ko e mena tapu ue atu, ki lalo he tau tapakau he tau kerupi;
7 Ka ko e mena fofola ai he tau kerupi ha laua a tau tapakau ki luga he mena ne toka ai e puha, ki luga foki hana tau akau tauloto.
8 Kua fakaloa ai e lautolu e tau akau tauloto, kua kitia ai e tau potu akau he tau akau tauloto ke he mena tapu ki mua he mena ke vagahau mai ai; ka e nakai kitia i fafo; ti ha ha i ai ni ke hoko mai ke he aho nai
9 Nakai toka ai ha mena ke he puha, ka ko e tau lapa maka ne ua ne tuku ai e Mose i Horepa, he eke ai e Iehova e maveheaga mo Isaraela he o mai ai a lautolu he motu ko Aikupito.
10 Kua hūhu atu ki fafo e tau ekepoa mai he mena tapu ti puke ai e fale a Iehova ke he aolagi.
11 Kua nakai maeke ke he tau ekepoa ke tutu ke fekafekau ai ha ko e aolagi; ha kua puke e fale a Iehova ke he lilifu a Iehova.
12 Ti pehe atu a Solomona, Ne pehe mai a Iehova, ke haele ai a ia ke he mena pouli.
13 Kua ta e au e fale mau ke haele ai a koe, ko e haeleaga ke haele ai a koe tukulagi.
14 Ti tafilu atu ai e patuiki, mo e fakamonuina atu e ia ke he fakapotopotoaga oti a Isaraela; kua tutu mai foki e fakapotopotoaga oti a Isaraela;
15 Ti pehe atu a ia, Kia fakaaue atu kia Iehova ko e Atua a Isaraela, kua vagahau mai a ia ke he hana fofoga ke he haku matua ko Tavita, mo e fakahoko mai ai ke he hana lima, kua pehe mai,
16 Tali mai he aho ne ta mai ai e au haku motu ko Isaraela i Aikupito, nakai fifili e au ha maga mai he tau magafaoa oti a Isaraela ke ta ai e fale ke ha i ai haku a higoa; ka e fifili e au a Tavita ke pule a ia ke he haku motu ko Isaraela.
17 Ne loto foki haku matua ko Tavita ke ta e fale ma e higoa a Iehova ko e Atua a Isaraela.
18 Ti pehe mai a Iehova ke he haku matua ko Tavita, Ha kua ha ha he loto hau ke ta e fale ma e haku a higoa kua mitaki ni ha kua ha ha he loto hau.
19 Ka e pete ia, nakai ta e koe e fale; ka ko e tama hau ke fanau ai e koe, to ta ai e ia e fale ma e haku a higoa.
20 Kua fakahoko foki e Iehova hana finagalo ne vagahau mai ai e ia, ti nofo ai au ke eke mo hukui he haku matua ko Tavita, ti nofo ai au ke he nofoaiki a Isaraela, tuga ne vagahau mai ai e Iehova kua ta foki e au e fale ma e higoa a Iehova ko e Atua a Isaraela.
21 Kua taute ai foki e au e mena ke toka ai e puha, ne ha i ai e maveheaga ne eke ai e ia mo e tau matua ha tautolu he ta mai e ia a lautolu he motu ko Aikupito.
22 Ti tu atu ai a Solomona ki mua he fatapoa a Iehova ki mua he fakapotopotoaga oti a Isaraela, ti nikiti ai e ia hana tau lima ke he lagi.
23 Ti pehe atu a ia, Iehova na e, ko e Atua a Isaraela, nakai fai atua ke tatai mo koe ke he lagi i luga po ke ha he lalolagi i lalo nai, kua fakamoli ai e maveheaga mo e fakaalofa mo e hau a tau fekafekau, kua o fano ki mua hau mo e ha lautolu a tau loto katoa;
24 Kua fakamoli e koe ke he hau a fekafekau ko Tavita ko e matua haku e tau mena ne vagahau mai ai e koe kia ia; ne vagahau mai e koe ke he hau a fofoga ti fakahoko ai e koe ke he hau a lima, tuga ne eke ai ke he aho nai.
25 Hanai, Iehova na e, ko e Atua a Isaraela, Kia fakamoli e koe ke he hau a fekafekau ko Tavita ko e matua haku e tau mena ne vagahau mai ai e koe kia ia, kua pehe mai, Nakai noa a koe mo e tagata ki mua haku ke nofo ke he nofoaiki a Isaraela; ka kia fakaeneene ni e fanau hau ke he ha lautolu a mahani, kia o fano a lautolu ki mua haku, tuga ne faifano ai a koe ki mua haku.
26 Hanai, ko e Atua a Isaraela na e, kia fakamoli e koe hau a finagalo ne vagahau mai ai a koe ke he hau a fekafekau ko Tavita ko e matua haku.
27 Ko e moli kia, to haele kia e Atua ke he lalolagi? Kitiala, ko e lagi, mo e lagi he tau lagi, kua nakai lata ia kia koe he apiapi, ti au atu he nakai lata e fale nai kua ta e au!
28 Ka kia haga mai a koe ke he liogi he hau a fekafekau mo e hana ole atu, Iehova na e, haku Atua, kia fanogonogo mai a koe ke he tagi mo e liogi, kua liogi atu ai hau a fekafekau kia koe ke he aho nai;
29 Kia fofoga mai hau a na fofoga ke he fale nai ke he po katoa mo e aho, ko e mena ne pehe mai ai a koe, To ha ha i ai haku a higoa; ke fanogonogo mai ke he liogi ke liogi atu ai hau a fekafekau ke he mena nai.
30 Kia fanogonogo mai foki a koe ke he ole he hau a fekafekau, mo e hau a motu ko Isaraela, ka liogi atu ai a lautolu ke he mena nai; kia fanogonogo mai a koe mai he lagi, ko e mena kua haele ai a koe; kia fanogonogo mai a koe, mo e fakamagalo mai ai.
31 Kaeke ke hala e taha tagata ke he taha, ti tuku atu e ia kia ia e omonuo, ke omonuo ai e ia, ti hau a ia ke omonuo ai ki mua he fatapoa ke he fale nai;
32 Kia fanogonogo mai a koe mai he lagi, ti eke ai e koe e fakafiliaga he hau a tau fekafekau, ke fakahala a ia kua mahani kelea, ke taui atu kia ia hana mahani kelea; ke talahaua tututonu foki a ia ne mahani tututonu, ke foaki atu ia ke lata mo e hana mahani tututonu.
33 Ka keli foki hau a motu ko Isaraela ki mua ha lautolu kua fai fi mai, ha kua hala a lautolu kia koe; ka liliu mai a lautolu kia koe, mo e totoku atu e lautolu hau a higoa, mo e liogi, mo e ole atu kia koe ke he fale nai;
34 Ti fanogonogo mai a koe mai he lagi, mo e fakamagalo mai e koe e hala he hau a motu ko Isaraela, mo e liuaki mai e koe a lautolu ke he kelekele ne foaki mai ai e koe ke he tau matua ha lautolu.
35 Ka pāpā ai e lagi, ti nakai to e uha, ha kua hala a lautolu kia koe; kaeke ke liogi atu a lautolu ke he mena nai, mo e totoku ai e lautolu hau a higoa, mo e liliu kehe a lautolu mo e ha lautolu a tau hala ha kua matematekelea a lautolu;
36 Ti fanogonogo mai a koe mai he lagi, mo e fakamagalo mai e koe e tau hala he hau a tau fekafekau, mo e hau a motu ko Isaraela, ha kua fakaako ai e koe a lautolu ke he puhala mitaki ke o ai a lautolu; ti foaki mai e koe e uha ki luga he kelekele, ne foaki mai ai e koe ke he hau a motu ke eke mo tufaaga ma lautolu.
37 Kaeke ke ha i ai e hoge ke he motu, kaeke ke ha i ai e tatalu, po ke fifigo, ko e polopologa, po ke tau he akerise, kaeke foki ke ha i ai e tau he kasili; kaeke foki ke pa takai a lautolu ke he motu ha ha i ai ha lautolu a tau maga kia lautolu kua fai fi kia lautolu; po ke heigoa e malaia, po ke heigoa e gagao ha ha i ai;
38 Ko e tau liogi oti, mo e tau ole oti, ke eke ai he tagata, po ke hau a motu oti ko Isaraela; ko e takitaha e tau tagata oti mo e iloa e malaia he tau loto ha lautolu, mo e fakaolo atu e lautolu ha lautolu a tau lima ke he fale nai;
39 Kia fanogonogo mai a a koe mai he lagi, ko e mena kua haele ai a koe, mo e fakamagalo mai, mo e eke, mo e foaki mai e koe ke he tau tagata takitokotaha ke lata mo e hana a tau mahani oti, kua iloa ai e koe hana loto; ha kua iloa ni e koe e tau loto he tau tagata oti kana;
40 Kia matakutaku a lautolu kia koe ke he tau aho oti ke momoui ai a lautolu ke he kelekele kua foaki mai e koe ke he tau matua ha mautolu.
41 Ko e tagata kehe foki, nakai ko e tagata he motu hau ko Isaraela, ka hau ai a ia he motu mamao ha ko e hau a higoa;
42 (Ha ko e mena logona e lautolu e tala ke he hāu a higoa lilifu, mo e hau a lima malolo, mo e hau a lima fakaolo;) ka hau a ia, mo e liogi ke he fale nai;
43 Kia fanogonogo mai a koe mai he lagi, ko e mena kua haele ai a koe, ti eke e koe ke lata mo e tau mena oti ne ui atu ai e tagata kehe kia koe; kia iloa ai he tau motu oti kana he lalolagi hau a higoa, mo e matakutaku a lautolu kia koe, ke tuga ne motu hau ko Isaraela, ke iloa foki e lautolu kua ui ai ke he higoa hau e fale nai kua ta e au.
44 Kaeke ke o atu hau a motu ke tau mo lautolu kua fai fi kia lautolu, ke he mena ke fakafano atu e koe a lautolu ki ai, ti liogi a lautolu kia Iehova mo e haga mai ke he maga kua fifili e koe, mo e fale kua ta e au ma e hau a higoa;
45 Ti fanogonogo mai ā koe mai he lagi ke he ha lautolu a liogi mo e ha lautolu a ole atu, ti eke ai e koe e fakafiliaga ma lautolu.
46 Kaeke ke hala a lautolu kia koe, (ha kua nakai fai tagata kua nakai hala,) ti ita mai a koe kia lautolu, mo e tuku atu e koe a lautolu kia lautolu kua fai fi kia lautolu, ti uta e lautolu mo tau tagata ne fofo he tau ke he motu ha lautolu kua fai fi kia lautolu, po ke mamao po ke tata mai;
47 Kaeke ke liu manatu ai e tau loto ha lautolu ke he motu kua uta a lautolu ki ai mo tau tagata ne fofo he tau, mo e liliu mai a lautolu, mo e ole kia koe ke he motu ha lautolu ne uta a lautolu mo tau tagata ne fofo he tau, mo e pehe atu a lautolu, Kua hala a mautolu, to mahani hepehepe, to mahani kelea a mautolu;
48 Kaeke ke liliu mai a lautolu kia koe mo e ha lautolu a tau loto katoa, mo e ha lautolu a tau agaga katoa ke he motu ha lautolu kua fai fi kia lautolu, ne uta a lautolu mo tau tagata ne fofo he tau, ti liogi ai a lautolu mo e hahaga mai a lautolu ke he motu ha lautolu ne foaki mai e koe ke he tau matua ha lautolu, ko e maga ne fifili e koe, mo e fale ne ta e au ma e hau a higoa;
49 Kia fanogonogo mai a koe mai he lagi kua haele ai a koe, ke he ha lautolu a liogi mo e ha lautolu a ole, ti eke ai e koe e fakafiliaga ma lautolu,
50 Mo e fakamagalo mai e koe ke he hau a motu kua hala kia koe ke he ha lautolu a tau holifono oti kua holi ai e lautolu hau a tau fakatufono, ti eke e koe ke ofania a lautolu e lautolu ne uta a lautolu mo tau tagata ne fofo he tau, kia fakaalofa mai a lautolu kia lautolu;
51 Ha ko e motu hāu mo e tufaaga hau a lautolu ne ta mai ai e koe he motu ko Aikupito, mai loto he gutuumu ne tunu ai e lapatoa;
52 Kia fofoga mai ā hau a na fofoga ke he ole he hau a fekafekau, mo e ole he hau a motu ko Isaraela, kia fanogonogo mai a a koe kia lautolu ke he tau mena oti kua tauui atu ai a lautolu kia koe.
53 Ha ko e mena ko e Iki na e, Iehova, ne vevehe kehe e koe a lautolu mai he tau motu oti he lalolagi, ke eke mo tufaaga hau tuga ne vagahau mai ai e koe ke he hau a fekafekau ko Mose, he ta mai e ia ha mautolu a tau matua i Aikupito.
54 Kua oti he liogi a Solomona kia Iehova ke he liogi nai mo e ole oti nai, ti matike ai a ia mai mua he fatapoa a Iehova, ne fakatokotui ai a ia ke he hana tau tulihui, mo e nikiti ai e ia hana tau lima ke he lagi.
55 Ti tu ai a ia mo e fakamonuina atu ke he fakapotopotoaga oti a Isaraela mo e leo lahi, kua pehe atu,
56 Kia fakaaue a kia Iehova kua foaki mai e okiokihaga ke he hana motu ko Isaraela, ke lata mo e tau mena oti ne vagahau mai ai e ia; nakai to noa ha kupu taha he hana tau kupu mitaki oti ne vagahau mai ai e ia ke he hana fekafekau ko Mose.
57 Kia ha ha i ai mo tautolu a Iehova ha tautolu a Atua, tuga ne ha i ai a ia mo e tau matua ha tautolu; aua neke tiaki e ia a tautolu; ti aua neke toka e ia a tautolu;
58 Kia fakahagao atu e ia e tau loto ha tautolu kia ia, ke o ai a tautolu ke he hana tau puhala oti, mo e omaoma a tautolu ke he hana tau poakiaga, mo e hana tau fakatufono, mo e hana tau fakafiliaga, ne poaki mai e ia ke he tau matua ha tautolu.
59 Ko e tau kupu nai foki kua ole atu ai e au ki mua a Iehova, kia tata ia kia Iehova ha tautolu a Atua ke he aho katoa mo e po, kia eke e ia e fakafiliaga ma e hana fekafekau, mo e fakafiliaga ma e hana motu ko Isaraela, ko e aho mo e hana tau mena;
60 Kia iloa he tau motu oti he lalolagi, ko Iehova ko e Atua haia, ti nakai ha ha i ai taha.
61 Ko e hanai, kia katoatoa ha mutolu a tau loto mo Iehova ha tautolu a Atua, ke o ai ke he hana tau fakatufono, mo e omaoma ke he hana tau poakiaga, tuga ne eke ke he aho nai.
62 Kua eke poa he patuiki mo e motu oti ko Isaraela fakalataha mo ia ki mua a Iehova.
63 Ti eke e Solomona e poa fakaaue ne eke ai e ia kia Iehova, ko e tau povi ne uafulu e afe ti ua e afe, mo e tau mamoe ne taha e teau afe, ti uafulu e afe. Ne fakaulu pihia he patuiki mo e fanau a Isaraela oti e fale a Iehova.
64 Ko e aho ia ne fakatapu ai he patuiki e pa ki loto ki mua he fale a Iehova; ha kua eke e ia ke he mena ia e tau poa huhunu, mo e tau poa mena kai, mo e gako he tau poa fakaaue; ha kua tote e fatapoa apa kula ki mua a Iehova, nakai ni lata mo e tau poa huhunu, mo e tau poa mena kai, mo e gako he tau poa fakaaue.
65 Ko e vaha ia ne eke ai e Solomona mo Isaraela oti fakalataha mo ia, e galue ki mua a Iehova ha tautolu a Atua, ko e fakapotopotoaga lahi ke kamata mai he mena ne hu atu ai ki Hamato, ti liu mai ai he vailele a Aikupito, ko e po fitu, mo e po fitu, ko e katoatoa ko e hogofulu ma fa e po.
66 Ko e aho valu ne fakafano atu ai e ia e motu; kua fakamonuina atu e lautolu ke he patuiki, ti o ai a lautolu ke he tau fale ie ha lautolu mo e olioli mo e loto fiafia, ha ko e tau mena mitaki oti ne eke e Iehova ma e hana fekafekau ko Tavita, mo e hana motu ko Isaraela.