2 Tau Patuiki

Ko e Tohi Ua ke he Tau Patuiki

1 KUA mole e mate a Ahapo ti fakafualoto ai a Moapi kia Isaraela.

2 Ne to hifo a Ahasaia he mena fakapūpū po ke kupega he fakamaama he hana poko ki luga i Samaria, ti gagao ai a ia; ti fakafano age e ia e tau fekau kua pehe age a ia kia lautolu, Kia o a mutolu, ti hūhū age a mutolu kia Pelesepulo ko e atua a Ekerona po ke malolo nakai au he gagao nai.

3 Ka kua pehe atu e agelu a Iehova kia Elia ko e Tisepi, Matike a, ti hake a koe ke feleveia mo e tau fekafekau he patuiki a Samaria; ti pehe atu a koe kia lautolu, Kua nakai fai Atua kia i Isaraela ne o ai a mutolu ke huhu atu kia Pelesepulo ko e Atua a Ekerona?

4 Ko e mena ia kua talahau mai pehe a Iehova, Nakai hifo mai a koe he mohega kua hake a koe ki ai, ka e mate ai ni a koe. Ti fano a Elia.

5 Ti liliu age e tau fekafekau kia ia, ti pehe age a ia kia lautolu, Ko e heigoa e mena kua liliu mai ai a mutolu?

6 Ti pehe age a lautolu kia ia, Ne hake mai e tagata ke feleveia mo mautolu, ti pehe mai a ia kia mautolu, Kia o a a mutolu, kia liliu age a ke he patuiki ne fakafano atu a mutolu, mo e pehe age a mutolu kia ia, Kua talahau mai pehe a Iehova, Kua nakai fai Atua kia i Isaraela, ne fakafano atu ai e koe ke huhu atu kia Pelesepulo ko e atua a Ekerona? ko e mena ia nakai hifo mai a koe he moheaga kua hake a koe ki ai, ka e mate ai ni a koe.

7 Ti pehe age a ia kia lautolu, Ko e tagata fefe kia ne hake ke feleveia mo mutolu mo e tala atu ai kia mutolu e tau kupu na?

8 Ti pehe age a lautolu kia ia, Ko e tagata fulufulu, kua pipi foki hana tokupu ke he pipi kili manu. Ti pehe age a ia, Ko Elia ko e Tisepi haia.

9 Ti fakafano age e ia kia ia e takitaki he tokolimagofulu mo e hana tokolimagofulu. Ti hake a ia kia ia, kitiala, kua nofo ai a ia ke he tapunu mouga; ti pehe age a ia kia ia, Ko e tagata he Atua na e, kua pehe mai e patuiki, Kia hifo mai a koe.

10 Ti tali age ai a Elia ke he takitaki he tokolimagofulu kua pehe age, Kaeke ko e tagata he Atua au, kia to hifo e afi mai he lagi ke fakaoti ai a koe mo e hau a tokolimagofulu. Ti to hifo ai e afi mai he lagi, kua fakaoti ai a ia mo e hana tokolimagofulu.

11 Ti fakafano age foki e ia kia ia taha takitaki he tokolimagofulu mo e hana tokolimagofulu; ti pehe age foki a ia kia ia, Ko e tagata he Atua na e, kua talahau pehe e patuiki, Kia hifo fakaave a koe.

12 Ti tali age ai a Elia kua pehe age kia lautolu, Kaeke ko e tagata he Atua au, kia to hifo e afi mai he lagi ke fakaoti ai a koe mo e hau a tokolimagofulu. Ti to hifo ai e afi he Atua mai he lagi kua fakaoti ai a ia mo e hana tokolimagofulu.

13 Ti fakafano age foki e takitaki he tokolimagofulu ke tokotolu aki mo e hana tokolimagofulu. Ti hake e takitaki he tokolimagofulu ne tokotolu aki, kua hoko age a ia mo e fakatokotui ke he hana tau tulihui ki mua a Elia, ti ole atu a ia kia ia, kua pehe age kia ia, Ko e tagata he Atua na e, kia fakaalofa mai a koe ke moui ai au nai, ke momoui foki e tokolimagofulu nai ko e hau a tau fekafekau.

14 Kitiala, ne to hifo e afi mai he lagi, ti fakaoti ai e na takitaki tokoua fakamua he tau tokolimagofulu, mo e tau tokolimagofulu ha laua; ka ko e hanai, kia fakaalofa mai a koe ke moui au nai.

15 Ti pehe e Agelu a Iehova kia Elia, Kia o hifo a mua mo ia, aua neke matakutaku a koe kia ia. Ti matike ai a ia, ti o hifo a laua ke he patuiki.

16 Ti pehe age a ia kia ia, Kua talahau mai pehe a Iehova, Kua fakafano atu e koe e tau fekafekau ke huhu atu kia Pelesepulo ko e atua a Ekerona, ha kua nakai fai Atua kia i Isaraela ke huhu atu kia ia hana finagalo? ko e mena ia nakai haele hifo a koe he moheaga kua haele hake a koe ki ai, ka e matulei ai ni a koe.

17 Ti mate ai a ia ke lata mo e kupu a Iehova ne vagahau mai ai e Elia. Ti eke a Iehoramo mo patuiki ke hukui aki a ia ke he tau ua ne patuiki ai a Iehoramo ko e tama a Iehosafata ko e patuiki a Iuta; ha kua nakai fai tama tane a ia.

18 Ko e tau mena ne toe ne eke e Ahasaia, nakai kia tohi ke he tohi ne tohi ai e tau tala ke he nofoaga he tau patuiki a Isaraela?